2012年2月27日 星期一

Nick Vujicic 要結婚啦!


2012年2月27日下午1:36公開累積瀏覽 432 1


睇吓呢份報導, 真係好替佢開心, 一個生命鬥士, 卒之都可以找到生命中的另一半.
 

將段新聞影咗幾個close up, 等大家都可以睇得清楚的.

上次同Nick見面, 我地全公司都好開心( http://blog.yahoo.com/_ZO26MYYQI7TTZUY2IU55EK3PMU/articles/182867/category/House+5+-+%E9%9A%A8%E5%BF%83%E9%9A%A8%E6%84%8F%E9%9A%A8%E5%AF%AB ) 見到佢咁即極人生, 令到同佢一齊嘅人都好振奮.   我地人生嘅少少挫折, 相比起Nick嘅天生殘缺, 仍可欣然面對, 還不斷去鼓勵其他人,  真係好佩服.

Nick 找到他人生的另一半, 將令他的人生變得更完美.   Nick衷心的祝福你.  

2012年2月24日 星期五

Lucullus White Peach Super Sour Chocolate - 一粒入面有幾種口味嘅朱古力


2012年2月24日下午12:13公開累積瀏覽 119 0


個盒由上面開

入面係一小袋用錫紙包著嘅朱古力豆


呢就係咁嘞.  有的白色加咗喺的朱古力上面.  一啖咬啦去, 酸嘅, 跟著苦嘅, 跟著又甜嘅, 仲有的桃味...
睇吓呢粒嘅橫切面就知係點啦.   最外面白色嗰的, 就係令到我地感覺酸味, 跟著入面嗰層係朱古力所以有朱古力嘅苦味. 再咬落去就係桃味嘅橡皮糖.

呢款糖又幾特別喎, 一粒就有幾種口味.  初時食就唔係好喜歡個的酸味, 但食落又覺得幾特別幾過癮.   咁比型爸試吓啦... 但佢唔鍾意呀!  佢最唔鍾意食有酸味嘅野...哈哈, 咁等我嚟啦 (放肆放肆, 又話減肥.....) 我覺得越食越好味呀!

2012年2月22日 星期三

春節後的第一次 lady's night


2012年2月22日上午11:22公開累積瀏覽 54 2


十五號部屋蘿蔔炆牛肉 


十五號部屋苦瓜煮鹹菜


十八號部屋, 奶奶整嘅豬頸肉
十八號部屋媳婦整嘅擊式炒炒絲
十五號部屋嘅炒菜心


十三號部屋三式樣炆雞翼 


十三號部屋西蘭花鮮魷


 三號部屋嘅肉碎四季豆


八號部屋嘅炸春卷

九號部屋無整, 帶咗盒朱古力嚟.  十號部屋身體不適無嚟食飯, 不過飯後就過嚟一齊傾謁.


我地八個人有九碟餸呀!


而五號屋呢, 就整咗呢個芝麻蜜糖炸麻花呀!   今次炸得好靚好滿意呀!  又脆又香口, 雖然整咗二十四件, 好快都食哂啦!

食完仲有餘興節目, 就係十五號部屋教我地拉筋呀!

傾吓攪吓又十點幾啦...明天要上班, 唔可以太夜啦!

2012年2月20日 星期一

情人節@Baby Blue Cafe & Bar (九巴樓上)


2012年2月20日下午1:25公開累積瀏覽 125 1

 

入到去坐低, 嗰restaurant manager 小姐, 快的影吓相啦, 佢花咗好多心機, 昨晚整到零晨兩點幾呀!....喧又整得幾有氣氛嘅.

 
今日主打賣呢個情人節套餐, 我地覺得唔錯, 就叫呢個啦, 價錢仲好抵食添. 
 
 
 頭盤係魚子多士配煙三文魚
 
 
 將的魚子塗上多士, 再加的煙三文魚喺上面....一啖咬落去, 好味!
  
呢個係seafood platter.
 
比個close up睇跅, 有大螺兩隻, 生蠔兩隻, 青口四隻, 蝦三隻, 蜆四隻.... 份量都好夠喎!


我地兩個都要咗龍蝦湯, 型爸鍾意呀!  煮得唔錯.


而主菜我地每人一份share 嚟食, 呢份美國西冷肉眼扒, 好大件喎.


而呢份係炸軟殼蟹配蘑菇意大利飯, 份量頗大..... 就嚟頂唔著啦.


仲有呢個assorted 甜品, 有雪糕, 心太軟, 酒浸梨, 焦糖布丁配士多啤梨....真係好夠呀!


最後型爸要咗咖啡, 我就要熱檸蜜.

今晚我地食得好開心呀!   最主要係餐廳氣氛好好.   其中我見到有三檯係父母帶埋小朋友一齊嚟慶祝.   其中一檯坐喺我隔離, 我聽到媽媽同個仔講(個男仔應該有十一二歲),  今日呢餐我地帶埋你嚟阻著我同Daddy撐檯腳呀!  睇吓, 的餐牌都係二人餐, 跟著佢地三個一齊kakaka笑.

我仲見到有老人家同太太一齊嚟食飯慶祝, 加上我坐嘅位置可以睇到電視, 剛啱播影介紹一對殘障夫婦互相扶持參加馬拉松, 仲有一對年邁夫婦, 年紀雖然大孫仔都有嘞, 但每一年都與太太慶祝情人節.

我嘅同事, 有兩個女兒, 情人節晚上邀請姨媽姨丈吃飯, 教女兒做朱古力送給親友, 大家一齊慶祝.

所以情人節並不是只給未婚少男少女去慶祝, 大家心中有愛, 個個都可以一齊慶祝情人節.

臨走時, restaurant manager送咗個心形氣球連朱古力比我, 我返到去, 見到林老闆佢地一家散步.... 哈哈, 我將個心形氣球轉贈林小b, 佢係我個小情人呀!

2012年2月19日 星期日

京滬燕雲莊


2012年2月19日上午11:37公開累積瀏覽 112 0
                                                                 
February 12, 2012, Sunday Night

下午食完炒年糕, 我同型爸走咗去按摩, 晚上唔想煮, 約埋林老闆出去食晚飯.  本來想去食西餐, 但林太話昨天佢同家人BBQ食咗好多牛扒, 唔想食西餐,  佢地提議去燕雲莊,   咁又好吖!


呢間燕雲莊响粉嶺, 上次都嚟過啦.


的野都係經濟抵食.... 嚟到都多人喎, 要等一陣位.

先叫幾個冷盤


呢個係豬耳, 我本來唔係幾鍾意, 但係片得好薄, 食落又幾爽口喎.
 
 
蒿筍海浙
 

雞絲炒皮
 

雲腿百頁

蒸小籠包

鐵板牛肉, 呢個唔係幾得, 用咗的無味嘅肥牛嚟炒


我點嘅炒鱔糊....真係得兩三嚿鱔, 其他都係冬菰片嚟架.


我地六個人, 叫咗六樣野, 不過型爸唔係幾夠


叫多一碗排骨担担麵同二公子兩份食...

我地由屋企出嚟閩, Mrs Kua 千吩萬咐, 你地唔好食咁飽呀!  我整咗Strawberry Shortcrust 呀!

怏的返屋企食甜品啦.

2012年2月16日 星期四

深圳新至尊海鮮酒家


2012年2月16日下午1:15公開累積瀏覽 645 1

下午食完飯, 的餸仲未落格, 下午四點又要預備出發去食今晚嗰餐啦.

訂咗架過境巴士, 一次過坐哂的同事.... 哈哈, 又有小插曲, 上到車係咁意提吓各位check吓的証件, 點知其中一位嘅回鄉証過咗期, 結果要去九龍塘放低佢...都算好彩, 如果唔係去到關口就仲麻煩.



都要一個鐘頭四十五分鐘先到呀! 新至尊海鮮大酒樓.  呢間酒樓, 開張無耐咋.



未夠六點, 國內的同事都差唔多到齊.   大家傾吓謁, 飲吓野....有危險呀!..  張張檯都放哂的白酒紅酒... 嘻嘻, 唔使驚, 我已經落咗order, 唔想見到的同事飲醉呀!  飲多的唔緊要, 飲醉就唔好啦.

今晚的餸菜非常豐富....
鴻運乳豬件, 幾好味喎!


金銀蒜蒸大連鮑, 超多蒜頭.  I like it.


高湯伊麵焗節蝦.  平時的九節蝦比較細, 但呢的好大隻喎.

靈芝石斛炖家雞. 呢個湯非常清甜, 唔覺有味精, 湯料多過湯...好味


金沙骨配春卷.  金沙骨我無食, 但係的春炮入面係炸芋泥卷, 好好味.


翡翠花支螺片.   同事問好似的伴碟都係西蘭花嚟嘅.  另一個同事啦, 梗係啦, 奉出嚟夠大碟吖麻.
 

鮑汁百靈菇鵝掌拌小棠菜, 都好味喎
 

雲腿竹笙菜胆. 一樣整得唔錯

清蒸老虎班, 條魚都蒸得好好喎.
至尊真味雞, 好香蒜味, 太飽, 無咩點食啦.
 
荷葉蒸糯米飯, 的糯米飯蒸得太腍, 呢味差咗的.   五號屋煲嗰的好味的喎.
我地一面食一面玩遊戲, 大家都好開心呀!   的餸碟碟都好大碟, 我地平均一圍得十個人, 食剩好多野呀!

老實講, 今晚呢餐的野食, 好過下午喺富豪軒.  中午同呢餐, 大家價錢差唔多(已折算港幣), 國內呢餐豐富又抵食好多.   咁當然, 香港嗰間話哂都係酒店中菜廳, 地方點都好的.

晚上九點幾, 我地要走啦, 好幾位同事都住得遠, 我地雖然訂咗過境專車, 返到香港每個人都住喺東車西北, 起碼都要兩個鐘呀! 
 
本來經骨醫治療完, 背部成個鬆哂, 但過咗幾個鐘, 隻手又開始有的麻痺.....唉吔, 攪咩呀! 唔怪得之同事之前已經同我講, 睇完骨醫, 會即時覺得好咗好多, 但好快推正咗嘅地方, 又回復舊位, 又會痛過.....唉! 我都知唔會一次就醫得好, 但係咁都幾辛苦喎..... 點算呢? 

明天星期六, 唔使返工, 心情都輕鬆的, 但係明天奶奶佢地嚟, 都要有排忙呀!