2010年6月29日 星期二

斷食80小時


2010年6月29日下午1:10公開累積瀏覽 157 1

去年連續做咗八次, 由四月開始到十一月, 每個月都揀三日斷食, 只飲蜜糖, 水, 花茶.   到咗冬天就停, 因為天氣凍, 我手腳又容易冰冷, 都係要食野先夠energy.  點解會開始呢個斷食? 事原哥哥介紹我睇咗一本書, 蜂蜜三日瘦身法(作者: 原久子, 徐玉枝 譯)
為咗進行呢個斷食法, 連飲咗十幾年嘅咖啡都戒埋(因為唔可以飲任何刺激性飲品).  突然間有個理由叫我唔飲咖啡, 又成日頭痛, 決心戒咗佢.
曾經係一個咖啡迷, 每日飲兩三杯.  去到每一個國家, 都買唔同嘅咖啡番嚟飲... 飲嗰時好enjoy架, 但副作用就嚟嘞, 每日十一點前唔飲咖啡, 個頭痛到爆... 曾試過一早返公司開會, 無時間飲咖啡, 跟著就開始頭痛, 連諗野都諗唔倒.  為此, 立定心腸, 戒咗佢.  用咗十日時間, 痛苦, 痛苦, 再加頭痛(好似重病咁), 卒之甩咗啦...  而家有時都會飲吓咖啡, 但已經唔會比佢支配. 
斷食咗咁多次, 有無瘦咗好多?  斷食第一次, 減咗成八磅, 但當復食之後, 體重會慢慢回升.  Overall 可能瘦咗小小, 好似無以前咁水腫.   
如果覺得斷食三日太長, 可以選擇一日或者兩日, 當然效果並不一樣.  但係, 千祺唔好偷偷地食小小餅乾, 或者同自己講食小小菜同生果都唔怕啦.  如果咁諗, 不如唔好開始.  
有朋友問我, 唔食野, 會唔會胃痛,  我試咗咁多次, 個胃會有餓的感覺, 但係未試過胃痛.  我嘅經驗, 如果連續唔食固體食物, 個胃唔會create好多胃酸出嚟, 雖然有肚餓感覺, 但只要飲蜜糖水或花茶就可以overcome.  但如果食野落去, 個胃會create胃酸, 會指使個大腦繼續食野.   每次我都依從呢個守則, 唔飲刺激性飲品或偷食.   如果有的情況或場合真係要食野, 我就索性停咗佢, 下次再做.  咁耐只試過一次.... 基本上,每次都做足三天.  反而平時食得過量, 個胃仲會痛.
上個月, 開始咗今年嘅三天斷食program(每次斷食最少相隔三個星期).  而今個月就係第二次.   感覺係點? 好肚餓架... 由其是第一日, 感覺好肚餓, 好疲倦, 會飲多的蜜糖.  第二日感覺會比第一日好, 精神的.  第三日感覺就最良好, 並無因為無食野而手軟腳軟, 反而最精神.   我試過幾次斷食日第三天去上yoga堂, 個身體更加柔軟, 可以摺埋的.  但係要大量體力嘅動作, 當然好攰啦(就算平時有食野, 都會好攰).
斷食之後兩日嘅復食期好重要, 開始第一,二餐應該食流質同易消化嘅食物, 令腸胃適應.   一開始復食, 會覺得好餓, 個大腦會不停叫食野, 一定要有所節制.  如果不停咁食, 會吸收得好快, 仲會有反效果.
今年開始斷食, 並唔係為咗瘦身, 只覺得平時食埋咁多美味食物, 真係肚滿腸肥, 斷食三天, 好似幫我做detox, 幫個消化系統休息吓, 覺得係一件好事.  
今天係斷食嘅第二日, 好精神.  雖然好多魔鬼喺身邊引誘, 但我定力夠, 一的都無受影響.   過埋明天, 又完成三日嘅detox program.  輕鬆愉快...
 

2010年6月22日 星期二

自家製蘋果醬

2010年6月22日下午12:55公開累積瀏覽 320 0
 

今次自家製咗個蘋果醬, 用咗五個青蘋果, 四份一個檸檬, 糖同肉桂粉..



做法都好容易, 將的蘋果去皮去核切粒(用鹽水浸著防變黑), 檸檬搾汁去白留皮, 然後加小杯水, 將所有野一齊煮至蘋果淋, 將佢壓成蓉.  至於甜度可因個人喜好而加減.

 待涼入玻璃瓶.
 
 加張招紙就好似買番嚟咁呀!
 
呢個果醬, 有咩野用途... 我諗...
1) 用嚟做醬汁
2) 加落雪糕或pancake一齊食
3) 用嚟整apple pie 或者apple turnover
4) 做果醬包都可能得
仲有無?!....

梳乎厘Soufflé


2010年6月22日下午2:23公開累積瀏覽 286 0

 
用咗三個蛋王, 兩個蛋白, 水(50ml), 牛奶(300ml) (我用咗北海道牛奶), 麵粉(50ml), 糖(60ml), 雲呢拿油小許, 牛油小許....
 蛋王加小許水拌勻, 將麵粉篩入拌成蛋漿.  將奶用慢火加一半糖煲熱, 加入蛋漿煮至稠.   再將煮好的蛋漿過籂至幼滑, 待涼..
 
 將兩個蛋白打至起泡, 加糖再打至企身, 然後同涼咗的蛋漿混合.  
用牛油將梳乎厘杯掃混, 再將糖加入杯搪混(的糖會黏上牛油).  然後落混合蛋漿至八分滿. 
响呢度又要多謝三號部屋Mrs. Kua, 上次佢見我整的法式焦糖燉蛋 (Crème brulee)用咁大隻碗, 佢去旅行前留低的梳乎厘杯比我用(其實我想買, 但未睇啱款).  佢就快番嚟啦, 點都要即極的用一次...
入爐啦..
 180-200c 焗12-15分鐘.  嘩, 升到幾高...
出爐啦... 要快的食...其實仲可以加的可可粉上去
 你睇, 慢的都開始跌番落嚟....
未焗之前, 我試過的蛋漿, 好滑好好味, 焗咗之後, 好似無之前咁滑... Anyway, good try.

2010年6月21日 星期一

香草牛油包,蒜蓉芝士包, 火腿芝士包, 果醬包, 紅豆包


2010年6月21日下午3:48公開累積瀏覽 280 2


 今次都係整咗鹹包同甜包.  型爸同二公子都鍾意食鹹包, 所以整多的鹹包.... 香草牛油包, 蒜蓉芝士包, 芝士火腿包... 我地一家都好鍾意食蒜蓉同芝士, 呢兩款可能成為每次指定出品.   果醬包係新嘗試, 本來整到好似布袋, 但係一發酵個麵團彈開, 的果醬又爆出嚟好核突...  個豆沙包就同佢試咗個新型像, 因為我想佢突的豆沙出嚟....好攪鬼呀!
入爐啦
出爐嗰陣, 已經晚上十一點....於是call 型爸同二公子落嚟宵夜.... 點知唔記得影相... 已經變成咁, 即刻叫佢地停, 比我影番兩張單頭相先.
個豆沙包新look 好得意, 我未食佢..

 個士多啤梨果醬包就變成咁, 但係味道好好, 我即時試咗個醜樣的, 味道好好, 唔太甜, 仲好鬆軟.
 呢三個就係三款鹹包嘞...
落咗老麵, 的包真係好鬆軟呀!  銷量好好呀!   不過我唔敢食咁多, 怕肥...

2010年6月19日 星期六

椰蓉包, 椰絲奶油包, 芝士火腿包, 蒜蓉芝士包 - Part II


2010年6月19日下午12:05公開累積瀏覽 306 1
                                                                 

 出爐啦, 今次我响盤底加咗的水, 的包一的都唔乾... 甜包有蛋同多的糖, 個麵好快轉啡色.
的麵包好正呀! 連底都影埋, 因為一的都唔燶.  上次的甜包個底燶小小, 有的硬, 今次ok 哂啦...的椰蓉餡都幾好, 唔係太甜.


 












個芝士火腿包都好正, 非常鬆軟, 芝士同火腿一向都好夾, 可能我地都好鍾意食芝士, 所以覺得超好味.

 
蒜蓉芝士包.....同上次一樣咁好味, 今次比上次更鬆軟, 二公子仲話出面買嗰的蒜蓉包都唔係咁嘅, 得少少蒜蓉.  呢的好味的.  嘩!開心死啦, 的蒜蓉香茜醬係自家製, 落咗勁多, 出面邊有呀!  

 
 
椰絲奶油包, 出爐後無時間整, 而家先再焗, 跟著將麵包掃上蜜糖水, 再响中間切開, 唧上奶油, 再灑上椰絲.   知道呢個包超肥, 唔敢整咗咁多個.   型爸同二公子食完話好得, 一咬落去, 的奶油唧哂出嚟, 好好味呀... 勁開心.
 
雖然我都係覺得鹹包同甜包的鬆軟程度有分別(鹹包比甜包更鬆軟), 但係做咗一兩次, 已經有咁嘅成績, 非常滿意..... 我呢個麵包初哥, 好似"升呢"咗.....好開心呀!  
當然我唔會自滿啦, 一定會繼續努力!!!

椰蓉包, 椰絲奶油包, 芝士火腿包, 蒜蓉芝士包 - Part I


2010年6月19日上午11:34公開累積瀏覽 447 0


整麵包, 當然唔少得我個partner, 今次佢真係好幫得手, 麵團整到啱啱好, 所以同佢拍多幾張寫真.
 又係整咗兩款唔同嘅麵團, 上次知道的甜麵團水份太多, 今次我將的水份減到同鹹麵團一樣.  呢張係啱啱落哂所有材料(除咗油), 本來麵包機嘅recipe的油應該同水份一齊落, 但我模擬手搓, 所以遲的落.

搓嗟無耐就知道的水份比例無問題..
個soft ball初步成形, 呢個時候先落油
跟著落埋老麵
第一次發酵, 跟著就唔使睇嘞, 由佢follow 個程式繼續, kneading, 放氣, 發酵.   我就去整椰蓉餡.
呢個就係椰蓉餡, 再拌勻就得啦
鹹麵包團分割, 滾圓, 鬆弛..
甜麵團分割, 滾圓,鬆弛...
椰蓉包, 做咗個肚臍型, 專登突的椰蓉出嚟...
 

芝士火腿包, 捲起, 兩邊突的火腿出嚟... 
上次整咗嘅蒜蓉芝士包, 好好味, 今次再Encore
全部8個鹹包, 10 個甜包.  右手面好細咩都無係用嚟焗好之後加奶油嘅奶油椰絲包.  比佢再發酵多40分鐘. 今次發酵得好好呀, 好開心..
 掃咗的蛋汁跟著就入爐.  

2010年6月13日 星期日

蒜蓉芝士包, 腸仔包, 提子包 & 紅豆包


2010年6月13日下午12:56公開累積瀏覽 211 1



 紅豆包, 提子包, 腸仔包 & 蒜蓉芝士包
上星期整嘅老麵, 响冰箱攞出嚟室溫解凍...跟著"叫埋"我個partner麵包機出嚟幫手..

 左面嘅麵團用嚟做鹹包, 右面嘅麵團用嚟整甜包.  鹹包麵團嘅份量非常準確, 但唔知點解甜包嘅麵團就好濕, 成唔倒個soft ball, (唔通因為我用咗一隻雞蛋?), 唯有加的高粉落去啦... 本來甜包嘅份量已經比鹹包多, 而家仲要加粉, 所以個甜麵團比個鹹麵團大好多.  我响第三個kneading程式, 先加的老麵落去.
今次全程比的麵團响部機入面發酵, 因部機會發出微溫, 好適合發酵(又唔使洗多幾個盤), 當我將甜麵包團攞出嚟分割做型時, 仍將個鹹包麵團留番响麵包機入面繼續發酵.

提子包 
蒜蓉芝士包 (我加咗的切粒cheddar cheese 落去).  好想買高溶點芝士但未有時間去搵.
 呢的係自製香茜牛油蒜蓉醬.  我將的蒜頭原個放係焗爐焗, 焗好待涼去衣, 然後放落個blender加牛油香茜同打, 最後加小許鹽調味...真係又香又好味..
 做型後放入焗爐再發酵, 四方型係紅豆包....總共有十二個甜包(六個提子&六個豆沙), 八個鹹包 (五個蒜蓉芝士&三個腸仔), 一盤放唔哂, 要分兩盤.
最後切開個芝士包再加的蒜蓉响面
 分兩層一次過焗. 我只响甜包面掃上蛋汁...
當我覺得一切都好美滿嘅時候, 我的烏龍大頭蝦又出嚟.....趕著換衫去打Driving Range, 入爐set咗時間就去換衫... 點知個溫度仲係set咗响快速pre-heat製, 唔記得轉番去上下火..... 換完衫落嚟, 已經遲了...

 火力唔均勻, 掃咗蛋嘅就好快變咗深色, 好似好乾(但係又無噴水), 其實可以先攞的甜包出黎, 再焗下的鹹包, 但諗下, 而家又趕著出去, 又啱啱食完的烏冬無耐, 仲係好飽, 唔想試食, 不如晏的番嚟先攪啦... 
 


 

 















唔係出爐即食, 的包可能已經無咁鬆軟, 到晚飯後的鄰居過嚟聚吓時, 先試食的麵包.  鹹包比較鬆軟, 但的甜包就實咗小小.   唔知係咪個甜包麵團, 我加咗好多高筋粉先至成個soft ball....  好彩整體都算ok.  鹹包就比較受歡迎, 今朝早餐, 所有的鹹包已經沽清,

紅豆同提子都係剩番幾個, 好快攪掂, 下次再試.....繼續努力...