去年連續做咗八次, 由四月開始到十一月, 每個月都揀三日斷食, 只飲蜜糖, 水, 花茶. 到咗冬天就停, 因為天氣凍, 我手腳又容易冰冷, 都係要食野先夠energy. 點解會開始呢個斷食? 事原哥哥介紹我睇咗一本書, 蜂蜜三日瘦身法(作者: 原久子, 徐玉枝 譯)
為咗進行呢個斷食法, 連飲咗十幾年嘅咖啡都戒埋(因為唔可以飲任何刺激性飲品). 突然間有個理由叫我唔飲咖啡, 又成日頭痛, 決心戒咗佢.曾經係一個咖啡迷, 每日飲兩三杯. 去到每一個國家, 都買唔同嘅咖啡番嚟飲... 飲嗰時好enjoy架, 但副作用就嚟嘞, 每日十一點前唔飲咖啡, 個頭痛到爆... 曾試過一早返公司開會, 無時間飲咖啡, 跟著就開始頭痛, 連諗野都諗唔倒. 為此, 立定心腸, 戒咗佢. 用咗十日時間, 痛苦, 痛苦, 再加頭痛(好似重病咁), 卒之甩咗啦... 而家有時都會飲吓咖啡, 但已經唔會比佢支配.
斷食咗咁多次, 有無瘦咗好多? 斷食第一次, 減咗成八磅, 但當復食之後, 體重會慢慢回升. Overall 可能瘦咗小小, 好似無以前咁水腫.
如果覺得斷食三日太長, 可以選擇一日或者兩日, 當然效果並不一樣. 但係, 千祺唔好偷偷地食小小餅乾, 或者同自己講食小小菜同生果都唔怕啦. 如果咁諗, 不如唔好開始.
有朋友問我, 唔食野, 會唔會胃痛, 我試咗咁多次, 個胃會有餓的感覺, 但係未試過胃痛. 我嘅經驗, 如果連續唔食固體食物, 個胃唔會create好多胃酸出嚟, 雖然有肚餓感覺, 但只要飲蜜糖水或花茶就可以overcome. 但如果食野落去, 個胃會create胃酸, 會指使個大腦繼續食野. 每次我都依從呢個守則, 唔飲刺激性飲品或偷食. 如果有的情況或場合真係要食野, 我就索性停咗佢, 下次再做. 咁耐只試過一次.... 基本上,每次都做足三天. 反而平時食得過量, 個胃仲會痛.
上個月, 開始咗今年嘅三天斷食program(每次斷食最少相隔三個星期). 而今個月就係第二次. 感覺係點? 好肚餓架... 由其是第一日, 感覺好肚餓, 好疲倦, 會飲多的蜜糖. 第二日感覺會比第一日好, 精神的. 第三日感覺就最良好, 並無因為無食野而手軟腳軟, 反而最精神. 我試過幾次斷食日第三天去上yoga堂, 個身體更加柔軟, 可以摺埋的. 但係要大量體力嘅動作, 當然好攰啦(就算平時有食野, 都會好攰).
斷食之後兩日嘅復食期好重要, 開始第一,二餐應該食流質同易消化嘅食物, 令腸胃適應. 一開始復食, 會覺得好餓, 個大腦會不停叫食野, 一定要有所節制. 如果不停咁食, 會吸收得好快, 仲會有反效果.
今年開始斷食, 並唔係為咗瘦身, 只覺得平時食埋咁多美味食物, 真係肚滿腸肥, 斷食三天, 好似幫我做detox, 幫個消化系統休息吓, 覺得係一件好事.
今天係斷食嘅第二日, 好精神. 雖然好多魔鬼喺身邊引誘, 但我定力夠, 一的都無受影響. 過埋明天, 又完成三日嘅detox program. 輕鬆愉快...
沒有留言:
張貼留言