可憐的Whisky仔

February 12, 2019, Tuesday

唉, 都真係唔想過年唉唉聲, 但係唔唉唔得.

唔知的狗會唔會犯太歲呢!  我隻Whisky仔點咁可憐, 年廿八無端端嘔, 嘔吐物入面有血.   睇開間Vet又話唔接急症, 等型爸周圍搵, 結果搵咗元朗間24小時診所Victoria.   初時話可能腸塞, 照咗X光又無事, 身為主人嘅我地, 都唔好話荷包輕咗好多, 頻頻撲撲, 死咗好多精神同細同胞.

啱啱整完一鑊, 見到佢好留的, 點知呢鑊仲大的.   

今日放工開車差不多返到屋企, 型爸打電話比我, 送緊Whisky仔去醫院.  吓! 咩野事??

事情是這樣的....型爸好似平時咁拖兩隻寶貝行街, Whisky仔一向都係要一狗當先, 好興奮咁衝出門口, 點知一出到門口突然慘叫一聲跌咗落地, 兩隻腳唔郁得, 嗚嗚聲慘叫.

型爸當時不知如何是好, 馬上打了幾個電話, 經睇開間Vet介紹 (佢地又話醫生有手術, 唔收急症), 去咗另一間Vet, 睇吓咩事.   不過睇完醫生都唔係比藥, 話唔知咩事, 要照MRI云(磁力共震).   如果要照MRI, 全港只有一間太平道寵物診所, 要寫轉介信, 唔係Walk in 又話唔收症.   當晚抱咗Whisky 仔返屋企, 佢六十幾磅, 型爸抱上抱落都好辛苦, 又唔知佢咩事, 好驚佢癱咗, 以後行唔到, 我一諗起, 喊到睇都腫埋.

第二天, 早上打去催個醫生寫轉介信, 咁帶Whisky 仔去睇太平道寵物診所, 睇個全科醫生, 醫生話佢應該係急性椎間框盤突出, 壓著的神經線, 所以行唔到.   有兩個方法醫治, 做手術, 有八至九成機會痊癒, 手術費大約八萬 (加埋共他住院, 藥物, 醫生費, 起碼十萬元).   另外一個方法是食藥, 需時兩至三個月, 有四至八成機會好番.   對於我地嚟講叫無選擇, 一定是做手術, 因為復原成數高的.  而且傷及脊椎, 首幾天是黃金時間醫治, 遲了可能醫唔好.

醫生話要留院, 如何醫治都要照完MRI先可確定做手術定可以藥物治療.   做唔做手術未知, 但要先付訂金七萬.

Whisky,  知你好驚, 今晚一家要留院, 你要加油呀!

老友團拜

February 10, 2019, Sunday

昨日澳門快閃遊早出晚歸都真係好攰, 但今日星期日, 行山天都無偷懶, 晨早起床陪組長一齊去行山, 大埔滘林徑, 行紅路呀!  組長話好意頭.

行完紅路都只不過係十一點幾, 我地開車去錦田紅磚屋, 覺得嗰道的野都幾好食.  不過時間太早, 咖啡屋未開, 哈哈, 我地食小食都食到飽呀!

期間傾開謁, 組長話佢年三十晚訂咗隻乳豬, 非常脆皮好食.  仲發張相比我睇.   副組長今晚有家人嚟, 天氣唔好唔可以戶外燒烤, 咁副組長就訂咗隻乳豬, 再加一隻燒鵝.

我見佢訂得咁開心, 我都訂咗一隻, 今晚老友鬼鬼嚟, 多的人一齊食開心的呀!

下什的朋友一到, 就煎糕比佢地食.  佢地一樣祈待我整的焗椰汁年糕.   跟著同佢地開檯打番姆圈....哼哼, 我張電動麻雀檯年幾無用過, 好彩張檯放在一樓, 無浸壞呀!

本來無腍著訂乳豬, 其他餸一早預備好, Cindy煮就可以.

燻蹄....(必殺技, 一早整)

素鵝(另一必殺技), 又係預早整好

白焯白菜鯪魚球

粉絲蝦米炒椰菜

麻婆豆腐

黑木耳炒什錦, 本來是素菜來的, 點知Cindy切咗的魚蛋牛丸落去, 咁又無所謂

焗雞翼


訂嗰隻乳豬都好大隻, 的皮好脆, 不過皮下脂肪太多....好肥呀!

整吓整吓都好豐富呀!   呀, 仲有個蘋果黑木耳湯, 食得咁肥膩, 通吓血管呀!

眨吓眼就過咗九天新年假期, 明天要上班開工大吉.

澳門快閃遊

February 9, 2019, Saturday

真係無諗過去新年會去澳門.   今次去都只係頂姨甥同佢太太個位. 

本來姨甥訂一家人同家姊姊夫一齊去澳門睇show, 點知佢太太個膝蓋有事, 要即時做手術唔可以去, 咁叫我同型爸頂佢兩個位.   好彩型爸的家人改了日子來我家, 咁我地可以頂上, 他的大女兒跟我們一齊去, 而小兒子的票就沒辦法, 唯有放棄.

真係晨咁早起身, 七點半去接佢地, 八點二十分到中環, 車泊林士街停車場.  在信德碼頭美心餐廳食早餐, 跟著坐九點船去澳門

去到澳門, 先同佢地去大三巴影相....周圍附近的街道都掛上紅燈籠(新年氣氛), 有好多內地遊客, 大三爸人頭湧湧, 我地係咁意影吓相.

跟著行上砲台山

其實嚟咁多次澳門, 每次都係飲飲食食, 無真正行過砲台, 原來個砲台向正新萄京

跟著同佢地一齊入澳門博物館, 我地只需要買四張票, 因為姊夫及一個小朋友免費.   我都係第一次嚟, 睇吓都好吖

家姊同姨甥孫女都好開心, 佢地兩個好鍾意影相, 咁我就做攝影師啦.

跟著帶佢地去漁人碼頭, 來斯酒店Vic's Restaurant 食萄國菜

呢道地方消靜, 坐得舒服的

要了一jar Sangria, 小朋友要了西瓜汁

呢道嘅house bread 都幾好味的.

要了一個萄國什錦小食拼盤

要了一個蟹蓋

風乾火腿

本來侍應介紹我地要一客大的海鮮飯, 足夠6個人用, 但我地想試多的不同的食物, 要了一客細的

另外要了一客黑毛豬牛肉串燒配飯

萄國燒乳豬

呢餐食咗1,800, 大家都覺得唔貴.  細姨甥仲話多謝我地好介紹, 下次佢會有帶女朋友嚟.

個鬼佬廚師真攪鬼, 我地埋單起身, 佢行埋嚟問我地的食好唔好食, 仲同我地影張相添.

跟著行出去漁人碼頭行吓, 再坐車去氹仔新濠影匯

行到入去, 呢今好多車display, 一陣就係睇呢個show, 賣緊好多廣告的狂電派

商場入面呢幾隻恐龍好受小朋友歡迎, 影咗好多相呀!

睇4:00pm, 入場啦

講真, 個show真係好普通, 有的悶場, 有段時間閤眼瞓

睇完show帶家姊去買手信, 點知佢一買就成個鐘, 本來諗著同佢地去六記食米通鯪魚球竹昇麵, 我地坐八點船唔夠時間, 咁就近食魚翅撈麵

睇間鋪就知係老字號

達榮魚翅撈麵

哈哈, 唔係肥滔嚟咗, 貼咗佢張相啫.

兩面牆上都貼上好多張名人嚟幫襯的照片

呢碗係魚翅湯麵, HK$70

我同型爸都要了魚翅撈麵HK$90

店家介紹我地加的佢地自製辣椒醬一齊撈嚟食.   不過的麵煮得唔夠腍, 我覺得的麵中心"有骨", 對我嚟講大硬啦, 我要把的都放落的湯浸腍的食.

個魚翅ok啦, 無咩驚喜.

其他的炸鯪魚球, 釀辣椒都係麻麻.

加埋飲品, 六個人食咗HK$770.,   跟著行去對面食個萄撻, 咁就飽嘞.

食完去碼頭搭八點二十分船返香港.

返到香港去停車場攞車再送他們回家, 我地返到屋企已經十一點幾, 澳門快閃一天遊, 好攰呀!   

明天仲有老友來拜年呢.