2014年5月31日 星期六

血拼後的早午餐

May 25, 2014, Sunday

買買買買, 買完就要盡快食, 如果唔係, 放下放下, 好易唔記得, 由其是一入咗冰櫃就會遺忘,  要記起時先出生天.

呢款腸特價, 平時兩間超市都賣HK$49.90, 特價都要HK$42.90.   一田大減價賣HK$36.90, 係咪要入貨吖.  Hot & Spicy款辣腸好好味, 的皮又脆, 我買咗三包, 芝士味都買咗兩包.

哈哈, 我當佢熱狗腸咁食呀, 不過我唔用熱狗包, 改用小法包.  加的蕃茄, 加的沙律醬就已經好好味.

早餐配杯咖啡, 五呀!

午餐本來諗著用芝士腸雞柳整卡邦尼意粉, 點知林老闆打比型爸話去買外賣, 型爸話無所謂, 有人去買外賣, 咁唔使煮, 歡迎之至.


 林老闆去咗粉嶺好出名嗰間買咗一客豬手, 一客腐皮牛肉卷, 牛丸米, HK$90.   十一點幾買到返嚟,  佢地係食brunch,  但我地已經食咗早餐, 對我地嚟講就早咗的. 型爸話食啦食啦, 人地咁好買外賣都預埋我地, 而家食完, 下午再去high tea rt1.

以前食過都覺得好味, 但上星期我地响汕頭食咗隆江豬手及手打牛丸, 相比起, 呢的就唔係咁好味啦.

 
雖然食外賣, 但都馬上記起响一田買咗呢款蘋果汁, 昨天已經入咗雪櫃, 今日攞出嚟飲啱哂.
我第一次買咋, 又幾好味.   買咗咩都要快的清咗佢.

哈哈, 不過下次可以買多兩盒.



2014年5月30日 星期五

餐後茶聚

May 24, 2014, Saturday Night

餐後酒聚就好多時都有, 但今次餐後茶聚又係第一次呀!

上個星期同的鄰居一齊去汕尾汕頭旅行, 其中一個節目係去品茶.  品茶時八號部屋男女主人睇中了兩件沖茶時的盛器(我都唔知係咪咁叫), 今日要幫佢剪綵呀!

晚飯後大家一講起, 馬上成事, 即到八號部屋茶聚.

八號部屋女主人學過泡茶(己經覺到中級), 家裡已經有好幾套茶具及盛器, 今次買了兩件木製品.

呢就係一塊(另外仲買了一塊小的, 放在茶几上深色那一塊).   大的那一塊是原件花梨木造, 大約一點二米闊, 有3-4吋厚.   真係好型呀.   當我地去到, 女主人已經準備好, 那些沖茶器皿, 佢地一向都有架.

呢的小木碟也是上星期在那品茶店買的.

用來墊著茶杯, 拿起時就不會燙手啦.

仲有朱古力可以送茶, 不過大家嘅興趣都不在朱古力, 我們要喝茶呀!   其實我都係捨命陪君子, 咁夜飲茶, 我今晚實瞓唔著啦.

另外一塊比較細及深色, 係黑紫檀木, 真係好靚呀!

木板底部刻了材質及規格.

大概沖了八個round, 換了三款茶葉就停啦, 我地飲就好容易, 但女主人不停咁泡茶, 好熱加麻, 我地唔想女主人咁辛苦呀!

最後就係食我煲嘅糖水, 又幾好彩喎, 我地九個人, 每人都有一碗.

林老闆話差咗的, 咁我問差咗的咩呀, 佢話差咗的量呀, 唔夠喉, 最後還有兩碗, 林老闆同另一位男士可以添食.  咁當然我又收到likes啦!

哈哈, 都唔係煲得好少啫, 夠咁多人食.  只不過平時在家係用湯碗嚟食唔係用飯碗食之麻.

2014年5月29日 星期四

龍王杏黃耳木瓜糖水

May 24, 2014, Saturday

今日去一田超市買咗的黃耳, 第一時間要嚟煲糖水.  唔係放放吓又唔記得.

我只係浸咗五六顆咋

浸起發到幾大

去街市買咗幾個熟木瓜, 用嚟煲糖水好味架.

都有諗過用燉盅燉, 但煲就快好多囉.

加的龍王杏, 木瓜切大粒, 黃耳, 冰糖全部掉哂落去煲....煲咗大約40分鐘就攪掂啦.  的黃耳都好快腍.

睇吓,   煲得都好濃架.

煲嗰時都無諗著咁多人食, 但後來大家去八號部屋即興茶聚, 將的糖水攞出嚟同大家分享啦.  又收到likes 呀!

2014年5月28日 星期三

獅頭鵝肝雞肉火腿腸炒米粉 + 瑤柱白粥

May 24, 2014,  Saturday Night

在一田血拼兩小時都無問題, 但係跟著去街市買餸就好辛苦啦, 三十幾度, 一落車就已經開始出汗, 快的買完快的回家.

昨天沒有食的獅頭鵝肝,今日用嚟炒米粉.吧

 
一個太多, 切一半, 加其他配料, 另一半明天用嚟炒飯, 切片再切粒

 鵝肝太單調, 加三份一條雞肉火腿場

東莞米粉用水浸軟

 加的菜心

炒炒炒炒, 咁就一大碟啦.

仲有四份一隻獅頭鵝, 快的食埋佢.  不過今晚食飯有的唔慣, 餐檯上嘅spot light壞咗, 好暗呀, 睇吓影的相都昏昏暗暗.

每人仲有一碗瑤柱白粥呀!   炒米粉配白粥, 正呀!


2014年5月27日 星期二

血拼一田 + 越棧

May 24, 2014, Saturday

半年一次的一田大減價又嚟啦.  上次去過真係有的怕, 的人多到行都行唔到.   由其是大埔的一田超市, 買完排隊比錢都要等起碼半個鐘, 的人排隊阻著的貨架, 連睇野都睇唔到.  今日早上起來正躊躇去唔去好呢, 哈哈, 十點幾已經收到陶媽同林太whatsapp, 佢地分別在沙田及大埔一田, 佢地話都多人, 但排隊比錢都好快.

林太叫我要去就快的,早上始終少的人, 下午可能會再多的人.  既然係咁, 我十一點幾同型爸出發去大埔一田,  哈哈, 停車場都要排長龍, 型爸醒目, 寧願行遠的, 去泊多層停車場, 即刻有位.

其實都無諗著要買的咩, 最主要都係去超市買的火腿芝士....哈哈哈哈, 無咩野買?  結果就係咩野都買的, T-shirt, 風褸, 和牛, 辣腸, 蘋果汁, 小食, 連平時唔會買的黑金薑母茶都買埋.... 就係火腿芝士買唔到, 個counter淨係賣parma ham同十款芝士, 其他都唔賣呀, 即係唔肯減價啦.

  
結果買咗幾大袋, 好彩帶咗個大環保袋, 不過真係好重呀! 呢兩袋好重型爸拎 我的風褸T-shirt就好輕啫.  買完快快放入架車先去食野呀!

 
買完都只係用咗兩個鐘, 有免費泊車三個鐘, 仲有一個小時可以食飯.  哈哈, 坐低唔係食野, 係拎的單出嚟睇吓買咗幾多錢....無端端又使咗四千幾.

上次嚟去咗星泰真味, 今次試第二間

叫越棧

已經兩點, 以為可以食下午茶套餐, 點知再睇真吓的細字, 星期六日, 下午茶三點先開始.

都無所謂, 係咪都要食架啦, 型爸要了六星級咖哩牛腩紅飯, 我要了特別牛湯河

個咖哩飯嚟啦, 配個紅飯, 睇落好靚, 但食落一的味都無, Ruby整嘅咖哩, 一定好味過佢.  的牛腩好似渣咁.....唔得呀!

特別牛河又係著通, 個湯底又係好淡, 咁問佢攞魚露啦.

呢樽魚露又係好淡, 諗諗吓, 熟口熟面巳, 同上次去星泰真味一樣, 的味道都似, 唔通兩間同一個老闆, 隔一間鋪, 唔通連廚房都通嘅?

每人仲有一杯凍飲, 凍檸七及凍奶茶.

其實行到咁攰, 坐低飲杯凍野, 食咩都應好味架, 但係呢道的野唔啱我地口味囉.

 
埋單HK$102, 都係算平.

抖一抖又要出發, 呢道買完, 仲要去買餸呀!

2014年5月26日 星期一

大熱天時打邊爐

May 23, 2014, Friday night

有時對著型爸都真係無附, 佢久唔久就話要打邊爐, 今日天氣咁熱, 佢一樣咁有興致.  再加埋二公子又係打邊爐fans, 二比一, 就算我係特別喜歡, 都唔會say no.

型爸仲自己一人去街市買野, 我無投訴啦.

呢個花尾躉翅走唔甩啦, 而家係我地打邊爐必買之一.

想食貴牛肉都未必有我賣, 三百幾文一斤嗰隻竟然無貨, 呢隻都要一百九十幾一斤.  牛肩對上.  都ok啦.
 
二公子鐘意的水魷牛栢頁
 
急凍枝竹

型爸竟然無買菜, 淨係買咗芫茜.
 
呢的牛丸就十分靚啦, 係我地响汕頭帶返嚟架.   的牛丸又爽又好味, 一的"騷"味都無呀!

我地仲有一個獅頭鵝肝, 諗著打邊爐切片食埋佢, 但都係覺得太鹹, 決定留起明天炒飯或炒米粉.

三個人, 夠唒食啦.   的牛丸同牛栢頁食唔哂添.

大熱天時開行冷氣打邊爐, 兩仔爺食得好開心呀!

2014年5月25日 星期日

世華餐廳

May 22, 2014, Thursday afternoon

呢排又唔知去邊道食晏好.  上之去龍門, 點知的例湯入面有小強, 心理陰影, 呢排都無再去啦.  同事提起世華, 又係喎, 無一年都有八九個月未去過

呢間老牌餐廳, 估唔到都有一大班捧場客, 上到去, 差唔多全滿.



睇吓的餐牌, 原全無加過價.   呢的時勢, 無加即係減價啦, 我地估計呢間一定係自置物業, 唔係點頂得順的貴租呀!

三個人, 我們要了兩個餐及一個喇沙米線.

餐包餐湯熱飲

西冷牛扒餐, 每次嚟食呢個餐都好有懷舊的感覺, 佢地嘅煮法, 好似以前灣仔嗰間波士頓餐廳.  不過今日的黑椒汁好鹹呀!

芝士焗雞扒飯 HK$40, 的飯有炒底, 同事話都幾好.
 
 
另一位同事要了豬扒喇沙米線 HK$37, 哈哈, 似萄汁撈米粉, 味道非常一般.


埋單要加一, 共HK$135, 平均每人都只係HK$45, 價錢唔貴但味道一般啦.