黃雨紅雨下的母親節

May 11, 2014, Sunday, 母親節

今日係母親節, 我同型爸講, 今日我咩都唔做啦, 亦都唔會煮.....咁我唔煮, 咁唔通型爸煮.

哈哈哈哈, 咁梗係唔會啦, 型爸係個只識煮即食撈麵的人.  不過今日有人救佢, 就係Ruby啦, 我唔煮啫, 都有Ruby煮麻.  不過叫型爸諗食咩, 佢都諗唔到, 在屋企,有關食的, 佢全部依賴我.

响呢的情況底下, 型爸都通常會, 媽咪, 不如我去呢去那去嗰道食啦, 但今天雨下不停, 的雨大到真係邊道都唔想去. 最後都係由我決定食咩.  咁好啦, 下午叫Ruby整個XO醬炒烏冬

 哈哈, 呢的簡單野, 平時Ruby成日都炒比二公子食, 無難度

 好耐都無飲過嘅蘆薈小麥草

 呢一份就係母親節午餐, 我同型爸每人一份嘅XO醬火腿腸仔炒烏冬啦.

咁晚餐有點呀, 二公子同型爸都係一樣, 煮食的情度, 又係响即食麵嘅level, 咁點算呢....哈哈哈哈, 又有人打救佢地.....今次係林老闆呀!

今日林家小姐同林老闆親自落廚煮比林太食, 叫埋我地.   型爸梗係叫好啦, 佢話不如去買燒肉燒鵝加餸, 咁大雨, 燒肉燒鵝買到返嚟都凍哂啦, 況且呢排大家都唔想食咁多肉喎.  林老闆整海鮮, 我地買燒味, 唔係好夾喎.  最後都係我幫佢諗, 睇吓屋企有咩, 整兩碟過去啦.

睇吓晚上食咩:

 林家小姐整的南瓜餅, 味道雖然淡的, 但係誠意搭夠, 第一次整, 我支持, 吃了三件呢!

 林家小姐跟林老闆一起煮的泡菜炒鮮魷

以下其他就係林老闆加工人姐姐整的.

 

 果皮蒸鮑魚

  
 麵醬蒸大白倉, 呢條魚好大呀! 好貴, 成HK$10一兩, 貴過食海班呀!

 

 白焯蝦, 呢道有兩款蝦, 林老闆話的海鮮今日非常貴, 因為母親節, 全都加了價.

  
 我家裡有北海道帶子, 加埋雞脾菇炒蜜豆, 好配合佢地嘅海鮮餐吖.

 
 再加多一碟蝦醬炒通菜

 七個餸加一個什菇什魚湯... 我地八個人食咋.

 林老闆型爸今晚飲了三款酒, 其中一款係呢枝Bowmore 21年, 佢地都只係飲少少高興吓啫.

 二公子唔識煮, 佢去買咗個蛋糕, 都算出一分力啦.

林家小姐又整了燉奶, 雖然淡了點, 但奶味很濃, 第一次整, 都係要讚.

今天雨下過不停, 黃雨, 跟著紅雨, 但我們在林家的母親節晚餐, 很溫暖溫馨呢!