鮮奶吐司- 快速版

October 24, 2013, Thursday night

燉落咗的冰糖雪耳燉木瓜, 順便整埋個麵包.

唔想整的四個幾小時嘅麵包, 今次整嘅鮮奶吐司, 改用快速版.

今次用了高筋粉 280g, 牛油 10g, 糖24g, 奶粉6g, 鹽5g, 凍鮮奶 195ml, yeast 4.2g


快速mode 3, 要兩個半小時

今次出爐, 尙算成功


個麵包頂係圓嘅

我量過個包嘅高度有16cm

快速版整包時間縮短咗, 但麵粉要用多的, 酵母又要落多的. 但係整出嚟嘅包就矮過要整四個幾小時嘅包, 咁正如型爸所講, 每片麵包要食多的麵粉囉..

哈哈, 咁都要接受架.  星期六日整就可以用長的時間囉.

鮮奶吐司- 麵包機製作

October 20, 2013, Sunday

今日好唔得閒呀, 仲要spare的時間出嚟整麵包, 不過有麵包機幫手, 真係落哂料, 按個製就得啦.

今次用了高筋粉 250g, 牛油 15g, 糖24g, 奶粉6g, 鹽5g, 凍鮮奶 175ml, yeast 3g


用軟式mode, 七點按制, 要晚上十一點二十分先做完呀!

 

按制之後唔可以打開嚟睇, 因為酵母未落, 大約一小時候, 打開面蓋見的酵母已落, 咁就可以打開個蓋嚟睇.   麵團已成soft ball, 不過我按落去, 覺得個soft ball 唔係好柔軟, 同我以前用其他牌子嘅麵包機唔一樣.


到剩下一小時再打開嚟睇, 個麵包發酵得好好呀!   呢個麵包機嘅recipe同其他牌子真係唔一樣架.

出爐, 有18-19cm 高呀!

用鮮奶代替水, 的麵包更柔軟呀! 

第二天的早餐

牛油果蕃茄三文治


再放入多士焗爐, 好正呀!

再過了一天....

加了火雞胸肉


的麵包一樣柔軟, 烘咗仲更好味添....型爸大讚好味呀!

提子全麥包-麵包機製作

October 12, 2013, Saturday

趁著假期, 今日又拎個麵包機出嚟整麵包.   今日整嘅麵包, 要等假期先可以整, 因為要五個小時呀!

全麥麵包

 

今次用了裸麥粉(Rye flour)125g, 高筋粉 125g, 牛油 10g, 糖25g, 奶粉12g, 鹽5g, 冷水195ml

 

按 program 6


今次加了提子55g 落乾果盒, 不要響鬧, 費事部機一叫, Ruby就嚟搵我.  呢個program, 足足要5個小時,仲無得調深淺色添!

整呢個包都有哂心理準備唔會發得好高, 個menu都有講, 麥粉用的比例越高, 個麵包發起嘅高度越低


仲有10分鐘先到時間, 我已經急不及待, 唉, 打開見到個包真係矮仔包嚟呀!  已經好深色, 用竹籤插入, 支竹籤乾身, 即係個麵包已經ok, 出爐停機唔再焗啦.


雖然明知個包唔會發得好高, 但個包頂係平(有少少微陷), 唔係圓高, 咁即係唔合格啦  我已經減了15g 水份, 無理由仲係水多架.


還好個包依然好軟熟.


個 texture 仲唔錯添.

型爸問了我一個很好的問題....如果兩款麵包落同一樣嘅麵粉, 一個出嚟發得高的 可以切10塊,  而另一個矮的只可以切8 塊, 咁食矮個款包咪食多咗麵粉, 多咗澱粉質囉?

唔唔唔...哈哈哈, 呢個係一個好值得思考嘅問題.....咁個包發得唔夠高, 係咪唔好食咁多呢!

軟式麵包－成功版

October 7, 2013, Monday

整丹麥麵包失敗了, 暫時唔再整呢款麵包, 整番的基本的, 等我摸熟的部機先啦.

上次整軟式麵包唔係好成功, 雖然個包一樣食得, 但我都好想再做好的, 口碑咁好嘅麵包機, 無理由响我手上攪佢唔掂. 

再嚟軟式麵包


金睛火眼睇清楚的用料


再睇一次個menu


最後加水, 今次我減了15ml水份, 即175ml.   上幾次失敗或唔理想, 全都同水份有關

再加入酵母...關蓋, 按制.

4小時20分鐘後......

哈哈哈哈, 今次好成功呀! 個麵包發酵得好好呀!

切開, 的麵包texture好綿密, 麵包好有彈性.

又嚟烘多士, 搽班蘭咖young....好好味呀!  的麵包皮有的韌, 但的麵包肉非常柔軟.   今勻ok啦.

下次做其他麵包, 我都會減少的水份, 到時覺得乾唔夠先再加, 咁樣比較保險.

睇本書, 麵包做起時陷下去, 通常都係水份太多.

用呢個PM105 做咗幾次麵包, 呢次算係最成功, 開心呢!

丹麥麵包 - 超失敗篇

October 6, 2013, Sunday

趁今日假期，又嚟研究吓個麵包機唔同嘅麵包食譜


好想整呢款丹麥麵包，呢個食譜跟新型號一同推出, 仲送埋預拌粉.


不過呢個食譜要用好多牛油，整起成個包有2155 kcal (嘩, 勁唔健康, 不過都要試吓）


仲好麻煩，要預先將的牛油切粒，放入冰櫃冷凍一晚


買機時送咗兩盒丹麥麵包預拌粉, 一盒入面有兩包250g粉


跟著隨機食譜份量，加了一包預拌粉，最後落了150ml冷水

3g 酵母(我個電子磅量唔到2.8g 咁準確）


跟著menu

 

按食譜７, 25分鐘後加入冷凍牛油

呢的牛油昨晚已經預備，最少要冷凍10小時。

響鬧10分鐘內一定要完成加牛油呢個動作

 

加完牛油後再按開始，大約要2小時30分

偷睇佢攪拌，覺得的麵團好濕呀！

攪掂的麵包，跟著我同型爸帶Loki出去行街，返到嚟剩吓52分鐘，時間啱啱好，呢個時候要掃蛋漿....

打開麵包機一睇，心情即刻由天堂落到地地獄，個麵團跟本無發起，即時要諗點好呢，再繼續焗都無意思，決定停咗部機。

 

跟著用保鮮紙蓋著繼續發酵

過咗半小時，個麵包真係繼續發酵呀！

 

發到差唔多同個container一樣咁高，我就掃上蛋漿(此時心中暗喜覺得救番個麵包）

已預熱焗爐180c

整個container放入去焗，諗著焗20-30分鐘

焗焗吓覺得個包越焗越縮...攞出嚟睇吓，個面ok, 再用竹籤插入，無黐麵粉，咁即係熟咗啦, 咁攞出嚟諗著等幾分鐘先脫模啦。

呢個時候啱啱食飯，Ruby叫我食飯先，一陣佢脫模。

到我食完飯，問Ruby點呀，脫咗模未呀，佢唔出聲，話的麵包唔得...

呢，就係見到呢堆野啦，麵包唔似麵包，蛋糕唔似蛋糕，一摸即散，攞少少放入口，都唔知咩野味, 麵包唔似麵包，蛋糕唔似蛋糕，好油膩添。

成個心實哂...又唔要得，又要去堆田區，真係好肉赤好浪費.  如果可以食得, 我一定唔會浪費. 

我用咗麵包機咁多年，整過無數次麵包，從未試過失敗如此，咁樣浪費資源, 呢個麵包機令我痛苦咗兩次啦。　

跟著就嚟賽後檢討.... 最後發現我用錯了跟機receipe.....

睇番送嗰盒預拌粉後面嘅份量，原本同跟機嘅menu唔一樣.  如果我用一包粉250g, 只可以用135ml水，加22g蛋漿。 冷凍牛油亦只需要98g.   而跟機menu係要落280g粉, 150ml ，25g蛋漿& 110g 牛油。

好明顯我呢個三不像太多水份啦。

失敗就失敗，唯有下次再試過。　無冷凍牛油，唔可以即時再整過，咁整番個普通軟式麵包先啦。