2018年6月11日 星期一

Cook House

June 9, 2018, Saturday

今天一早型爸就收到林老闆的電話約今晚食飯, 哈哈, 我睇睇日子...今天係林太生日呀!  林老闆 約埋幾家好鄰居, 一齊同佢慶祝呀!

 林老闆訂咗呢間响粉嶺聯和墟 CookHouse.  我地之前都嚟過, 的野食整得唔錯架.

 林生同兩位老闆都幾熟, 餐廳安排咗樓上, 拍起的檯連成一張大檯, 可以坐14-15人

 我地早到, 叫佢地拎的小食嚟送酒, 馬上整咗個Nacho 比我地食著先.

 型爸帶了一枝21年, 林老闆帶了一枝25年...另外仲有一枝台灣Whisky.. 夠啦夠啦, 幾位男士, 飲兩枝都好多啦.

女士先飲了一枝白酒, 跟著就改飲柚子酒.  (突然諗起自家製嘅柚子酒...幾時熟成可以飲呢!)

原來林老通知餐廳大約人數, 食咩野就由廚師發辦...  今日嘅食物有的驚喜, 因為有的係無响餐牌架.

食物預得太多啦, Appetizer 有五款, 主菜又四五款, 每款每人都有一件...

之前食嘅Nacho係其中一份, 餐廳預咗兩個orders

 串燒牛柳, 每人有一件

 吞拿魚羊奶芝士, two orders, 我地喜歡食芝士, 覺得呢款好好味呀!

 鵝肝多士食得多, 鰻魚多士食過未?

 跟著仲有煙肉焗元貝

 迷你龍蝦湯

 智利鱸魚配蘑菇汁...呢款都唔知係前菜定主菜....好好味!

跟著嚟嘅主菜, 我地係完全食唔落...份量實在太足

咖哩鴨

 煎肉眼扒

 燒大蝦

另外取消了焗春雞

 甜品係餐廳自家整的Tiramisu

 我地請餐廳兩位老闆飲Whisky, 佢就請林老闆飲蒙古嘅牧歌酒...  我叫型爸千祈唔好飲, 一溝酒飲醉就唔好啦.

今晚食得好開心, 但呢餐都唔平, 大約七千文呀!  下次唔使預咁多人嘅食物呀!

祝林太生日快樂, 青春美麗, 身體健康!   林小弟聽教聽話....


2018年6月5日 星期二

雞丁豉油皇炒麵 - 加辣

June 4, 2018, Monday

今日型爸同二公子都話唔返屋企食晚飯.  到我放工返到屋企, Cindy 咩都無準備, 只係問我mom, 今晚想食咩, 炒麵?炒烏冬?   哈哈, 通常我 一個人食晚飯佢都係炒粉麵或炒飯, 咁又係, 如果煮幾餸一湯又食唔哂.

諗吓食咩先...今晚就豉油皇炒麵啦....佢問我加咩野肉, 吓豉油皇炒麵唔使落肉喎....好啦好啦, 妳想加的肉就加雞絲啦.   雞扒解凍容易, 切好醃一醃就得, 呢的Cindy攪啦.

 
今次用咗壽桃牌蝦子麵, 用熱水浸鬆的麵餅


 另外用一札韮菜, 一條京蔥

 哈哈, 我叫Cindy切雞絲, 佢切了雞丁, 無所謂啦, 都係咁食.   佢仲加咗的魚蛋牛丸


先炒熟

 跟著調個豉油汁, 用咗2湯匙老抽, 2湯匙生抽, 加糖...試到啱味, 要少少偏甜. 覺得濃可以加少少水, 但我無加.

 呢的係辣椒粉, 豉油皇炒麵加咗辣好味好多架.   亦都可以用指天椒, 但加辣椒粉夠快呀!

 跟著我去聽電話, Cindy 接手炒

 講完電話就見到咁, 馬上用筷子幫佢手鬆麵.   其實另一個方法, 先將的豉油撈落的麵先, 再落鑊炒.

咁就攪掂啦.

幾好味架!

2018年6月1日 星期五

拜拜 GE

June 1, 2018, Friday

佢高大威猛, 外型俊朗不凡, 同佢相處十年, 平時好幫得手, 突然生病, 無聲無息的靜下來.   打了好幾個電話搵了好位專業人士都說沒有能力可以幫他, 好心痛呀!

General Electric 淡出香港, 原來幾年前已被國內品牌海爾買了, 好辛苦咁聯絡到佢地維修部,   但佢地check 唔到有零件, sent email去星加坡問都搵唔到.  師傅話上門檢查可以, 但說明好大機會沒有零件維修, 叫我好好考慮.   自己上網Seach都搵唔到零件, 就算訂到都唔知幾時有貨, 始終十年機已停產, 訂到其中一件零件, 遲的可能又到另一件, ......大熱天時三十幾度, 無咗佢都真係好頭痕.   連維修員都叫我好好考慮, 最後決定, 無辦法唯有送佢走.

咁啱睇到電視林保怡同周嘉兒拍的環保回修廣告, 回收大型電器....電話號碼 26768888, 即刻打去問.    歐綠保受環保署委託,提供受管制電器「四電一腦」的免費上門回收服務,回收所得的物品會送至由歐綠保負責設計、興建及營運的WEEE·PARK 進行無害化處理及拆解.  仍能操作的電器將修復並捐贈予本地有需要的家庭。其餘的廢舊電器將被妥善儲存於區域性回收中心,直至廢電器電子產品處理及回收設施(處理設施)投入運作。屆時,回收物品將會被送到處理設施妥善拆解和循環再造。

今日就要送佢走啦...臨別拍照留念...

無法留你在我家, 希望你去到那裡, 他們可以延長你的壽命啦.


2018年5月30日 星期三

汕尾兩天為食遊 - Day 2

May 20, 2018, Sunday

今次住呢間顯達酒店要求唔包早餐, 因為我地要去飲茶, 唔想食酒店的自助餐呀!

早上約了八點半集合, 非常方便, 就在飯店隔離...

天成大酒樓, 時間尚早, 唔係好多人, 不過到我地差不多離開時就漸漸人多

哈叔第一時間去攞了健康食品, 蒸蕃薯, 蒸淮山, 蒸栗米.   跟著型爸同林老闆出去點點心...又叫到一檯都係....不過我顧著傾顧著食, 唔記得影相啦.....

只係最印象深刻....呢餐茶只係人仔303元, 超抵食呀!  我地九大一小, 即係三十文人仔一位, 超抵食呀!

飲完茶跟著再去shopping.  未買夠的繼續買, 唔買的去做Gym 或者返房休息.   約咗10:45check out, 我地要回程啦.  大約要開兩個多小時去到大小梅沙, 在那邊食午飯.

呢間叫五谷芳, 上次我地幫襯過另一店.    呢間餐廳的冷氣唔係好掂, 真係焗到出汗.

呢間出名食乳鴿, 我地唔敢叫太多, 每人半隻好啦.

要了海膽炒飯

蓮藕夾

义燒, 呢個义燒又幾好味喎!

吓, 林老闆又叫了梅菜扣肉....吓, 會唔會太多用呢!

仲有一個釀豆腐煲.

林老闆話昨天全天食海鮮, 今日叫番多的肉啦....呢餐好抵呀!  人仔七百.

食完午飯, 繼續行程, 我地開車出深圳, 去加州永泰水療按摩呀....呢個我同型爸鍾意呀!  不過沿路超塞車, 比平時用多咗成大半個小時呀!

四點幾到, 按了兩part身, 再多按一part腿, 跟著七點食晚飯, 就在加州永泰的餐廳.   我地其中一位鄰居係呢道嘅超級會員, 佢預付很多, 我地按摩食飯都有折扣呀!

呢道的晚飯小菜都唔錯架!

要了個燉湯, 多料好味, 無味精

要了一隻片皮鴨

不過呢隻鴨無咩味, 的粉皮仲頗厚

香煎什魚煲

水餃

南瓜排骨

羊肉夾餅

片皮鴨兩食, 苦瓜炆鴨殼.

另外好仲有一個涼瓜排骨煲, 不過嗰的涼瓜炆到腍哂我唔like呀!
 
仲有呢個魚仔炒飯, 好好味.  不過太夠啦, 食唔落.

呢餐埋單CNY1,600, 不過一打原折就好抵食啦.....

真係好開心架, 玩兩天, 仲有鄰居的專車返到屋苑, 超開心呀!


2018年5月28日 星期一

汕尾兩天為食遊 - Day 1

May 19, 2018, Saturday

今天約咗幾戶鄰居,  加埋行山組嘅領隊哈叔, 一行十人, 兩架中港車, 去汕尾兩天為食遊呀!

數數吓都兩年幾啦, 上次係2016年一月, 四戶鄰居共九人.  Mr. & Mrs Kua移居了歐洲, 今次組長同組長夫人頂咗佢兩個位, 再加埋哈叔, 剛好十個人呀!

早上八點鐘由屋苑出發, 一架車經皇崗, 一架車經深圳灣.   皇崗那架車, 路程比較短, 佢地那邊亦沒有那麼塞車, 大約十一點就到了食午飯的地方.   我地坐經深圳灣的車, 真係估唔到, 深圳灣多人到好似春運咁, 真係嚇死人, 加上去到深圳又塞車, 我們足足比他們遲了四十五分鐘先到達約定的食飯地點.

 
就係呢間响紅草鎮的東東飯店, 我地搵Google Map, 都搵到呢間飯店.   至於GPS, 當然係用高德地圖, 邊道有相機, 邊道限速, 全部都好清楚呀!

去到林老闆哈叔組長同組長夫人坐响道飲著啤酒食花生等我地.  我地一到, 馬上起菜.   因為早上七點幾食早餐, 到中午大家都好肚餓啦.

先嚟隻走地雞, 隻雞好有雞味喎!

呢隻焗鱔好好味呀!

珍珠蜆

九節蝦...呢道的花生都好好味呀!

炒白菜

呢道特色小食, 米粿, 入面有餡料有的肉及冬菜, 都幾好味架.

仲有呢個橄欖排骨湯, 林老闆話呢個湯對捱夜非常好呀!

呢條大紅班好大條呀!   貴就貴咗的, 要人仔1,200文呀!   林老闆話唔好意思, 聽錯價, 450一斤, 佢聽錯一條.  條魚非常美味呀!

埋單人仔2,000, 條魚都已經1,200, 其他菜唔貴呀!

食完我地開車去飲茶,  林小弟一聽到.... 吓, 食飽又去飲茶, 好飽啦, 點食呀!   哈哈, 我地真係淨係飲茶, 消消滯呀!

林老闆帶咗我地去一茶一生.....嘩, 兩年幾無嚟, 做咩間鋪大咗咁多, 咁好生意?

地下最主要係賣茶葉, 仲有的茶具.    本來我地訂咗三樓其中一個茶室, 點知嗰間房的冷氣壞了. 我地就在樓下品茶.

行上二樓, 呢層主要賣茶具, 仲有兩個茶室, 但兩邊都有人, 哈哈, 估唔到呢道咁多人來飲茶, 怪不得咁好生意, 成棟租落嚟都可以.
三櫻係用作教室, 主要教人插花及沖茶

飲完茶我地返酒店 check in

林老闆幫我地訂咗Nobel Hotel, 顯達酒店.  呢兩張相响網上cap落嚟, 網上評分有4.5呀!

大堂一樣keep得好靚

我地住商務樓層, 房間好大喎

唯有唔好就係從外望到入洗手間, 但那遮著的簾壞了, 咁就唔可以開著洗手間的燈來瞓.

我仲記得, 酒店對面起的樓叫黃金海岸.

放低的行理, 我地把握時間, 我地馬上到樓下商場shopping, 坐咗咁耐車, 食咗咁多野, 都真係要行吓.   估唔到短短一個小時, 大家都咁落力去買野...遇啱國內一款大品牌減假, 質量很好, 三折又真係幾抵....佢地好多收穫喎...哈哈, 我好克制, 無買呢!

其實買未夠架, 約咗三架車來接我地去食晚飯....佢地話食完晚飯返來再買過.

預備飲酒就唔好開車, 所以叫了三台車來接我們去食晚飯.   見到每台車頭都放呢款毛公仔, 隻狗仔幾可亂真....佢地個個都話想買一隻.  上淘寶一搵, 原來呢隻狗狗入面放了竹炭包要來除異味及去甲铨的汽車裝飾品.    我應承回到香港幫他們淘.

大半個鍾我地到了海邊, 又係呢間豐勝餐廳, Google search 都搵得到.

現在休魚期, 好多小船泊在出面.

食的咩就由的男士決定啦.

型爸同林老闆各自帶了一枝Glenfiddich 21人年...結果就係一晚就飲哂

女士飲天地一号蘋果醋

蝦乾送酒

先來個什魚湯

生吃新鮮海膽....好清甜美味呀!

不吃生東西的哈返就要吃這個呢.   海膽加了那麼多粉...怎會好味.   剛吃完了鮮海膽, 這個就覺得一點味道都沒有.

清蒸奄仔, 好味呀!

蒸三刀魚...非常美味.   他們說在香港這款魚比較少, 就算有價錢都好貴.  這三條魚大概人仔600元, 在香港吃要大約港幣一千元一條.   哈哈, 幾多錢我唔識, 我淨係識食.

呢碟我地香港人叫鬼爪螺, 本地人叫雞腳螺.   入面的肉好細, 我覺得好麻煩, 但型爸話好味, 唔怕麻煩, 佢拆的肉比我食.
蒜蓉開邊蒸龍蝦

蒸九節蝦

炒莧菜

今晚唯一的一碟肉, 走地雞一隻.

最後是一大窩白粥, 咸菜, 花生, 醃海膽送白粥, 林老闆話潮州人都係咁食法, 食完海解食碗粥暖暖個胃.

七點半我地食完晚飯就回酒店.   跟著各人又去shopping.

組長覺得唯一美中不足就係無出去夜消,  因為個個男士都飲咗酒唔可以開車.  呢道又唔覺有計程車, 另外再叫車又麻煩....最終都係早的覺覺豬啦.

其實全天都係食食食, 我唔食宵夜都覺得好夠啦.