再嚟一方 - 清燥湯

2012年3月31日下午2:26公開累積瀏覽 166 1

March 29, 2012, Thursday Night

今日放工, 先去執中藥先返屋企.  今日下午去覆診, 又得醫師開咗另一張方比我.

上次醫生開咗一方用嚟補氣活血, 食咗食十劑, 唔知係咪補得制, 瞓醒口苦兼有眼膠, 醫師又開另一方比我.

醫師又再教導我一些中醫理論, 何為五液, 怎樣反映心肝脾肺腎, 唉吔, 我真係一窺不通, 只有唯唯諾諾...

話我知眼液有問題即反映肝臟, 口苦就反映腎臟, 把完脈就睇吓我條脷, 搵咗幾條方就揀咗一條叫清燥方, 再加幾款藥材.
佢寫緊方時, 我就影咗佢本天書呢一頁

清燥湯嘅配方入面有: 麥冬, 知母, 人中黃, 生地, 玄參.   佢話而家應該好難搵到人中黃,  佢就話如果無就用當歸, 丹皮, 赤勺,來代替, 最後再加天花粉.   佢問我知唔知人中黃係咩, 我梗唔知啦, 佢話人中黃嘅做法係將甘草放入竹筒, 用蠟封實, 放入糞便中浸49天, 再攞出日曬夜露七天.....吓, 救命呀, 邊個人發明呢的藥材架, 衛唔衛生呀?...最好搵唔到啦.

去到執藥, 藥店話無人中黃喎(好囉...), 人中白就有, 吓人中白又係咩野嚟架,  唔要啦, 就執嗰八樣, 要兩劑啦.   呢劑藥好平喎hk$19
返到屋企就上網睇吓醫師教嗰的係咩先.

原來五液：心主汗，肝主泣，肺主涕，腎主唾，脾主液，此為五液所出也。

淚是肝膽所生之水   眼有問題, 就與「肝」有關係了
汗是心小腸所生之水 汗出的問題，就要由「心」來討論了涎是脾胃所生之水   涎液出問題, 就與脾臟有關
涕是肺大腸所生之水 鼻涕就是「肺」的問題了
唾是腎膀胱所生之水 唾液的問題, 就要由「脾」來論治
但「肝」的氣會影響到「心」，故肝陰火旺時，也會造成「心」火旺盛.....

嘩, 實在太深奧啦....睇完好多都唔明.

呢的都係等醫師去解決, 等我煲完藥, 飲咗睇吓點先啦.  

The Glenlivet 18 years

2012年3月29日下午12:39公開累積瀏覽 214 1

March 25, 2012, Sunday Night 

上次去泰國, 响泰國機場嘅Duty Free 買咗兩支酒設嚟, 今次開咗呢支嚟飲

The Glenlivet 18 years

呢支抵飲呀, 好大枝架

 
因為係1 Litre裝.  平時香港買嘅Whisky, 都係700ml.

我食緊中藥, 唔敢試太多, 飲咗一啖, 咦! 酒力都夠喎, 舌頭仲覺有少少苦味, 仲有的好似咩木嘅味, 唔錯喎!


再睇吓酒身, 都有寫的tasting.....Elegant, comples, oat and fruit.  An Entrcing bitter-sweet symphony.

哈哈! 我條脷都使得吓喎, 咁都比我飲出少少味道.

當我save的相時, 先發覺以前飲過一枝The Glenlivet 25 years, 係林老闆帶過嚟, 個外盒仲非常精緻...  不過味道就唔記得係點架啦.  http://blog.yahoo.com/_ZO26MYYQI7TTZUY2IU55EK3PMU/date/2011/04/page/8

潤園四季福田店 - 椰子雞鍋

2012年3月27日下午2:24公開累積瀏覽 408 1

March 24, 2012, Sunday Night

型爸佢地今日打波好無癮呀! 佢地本來tee off 12:50, 結果等到差唔多兩點先開波, 開咗波都唔係好好玩, 因為大塞車, 四點幾先打完九個洞.  後九個洞排到差唔多五點先開波.  本來佢地都諗著打嘅, 咁就call我話晚上要夜的先食飯.  點知過咗一陣, 佢又打比我, 唔打啦, 再打八點都出唔到嚟.  原本出到去排隊, 遇普一家三口, 分開三個tee嚟開波, 亦都可能係新手, 要打多幾桿先上green.  佢地諗吓唔對路, 每個洞差5-8分鐘, 九個洞都已經慢成個鐘, 最後都係決定唔打啦.

佢地決定唔打, 時間就好充裕, 反而要等我.  知前我地想去食椰子雞鍋, 打去唔比訂位, 而家佢地早咗, 可以去等位添.


呢間潤園四季, 有三間分店, 我地去咗福田店.  我同型爸都未嚟過, 佢地話有的特色, 叫我試吓.

嘩! 去到真係多人, 型爸同朋友都係剛剛攞到位.   人太多(我諗都有一百幾十人等緊位), 唔係幾好意思影相. 


朋友問咗接待員, 呢道有一百張檯, 而我影呢個位置, 只係其中一部份.


其實我坐落睇見餐牌先知呢間叫潤園四季

 

我地五個人, 安排坐喺F1區

呢道係食火鍋, 所以每檯都有一個鍋, 每檯都有花生小食, 椒絲蒜蓉, 全部都要計錢架.  (我地計過吓, 呢的加埋, 仲有紙巾, 都超過五十蚊人仔)

朋友自攜兩支紅酒, 免開餅費喎.  不過我食緊中藥, 唔係點想飲

我地叫咗四款冷盤嚟送酒, 海浙, 拍黃瓜, 好味喎

 

涼拌皮蛋同豬耳, 又好味喎

每樣夾的, 自製四式拼盤.


再叫咗一碟白切東山羊, 都幾好味喎.


的雞嚟啦, 得的湯(係椰子水嚟架)滾咗, 就放的雞落去.


加蓋煮滾大約兩分鐘, 熄火.  再焗幾分鐘就得嘞, 咁樣的雞食起就好滑.  食完的雞就飲的湯, 的湯就真係好清甜, 椰子水嗰的清甜...食火鍋係鹹加麻, 甜甜地有的怪囉.

 

食完雞我地就焯木耳同大豆芽菜, 好味呀!

最後先焯呢的.  我地叫咗個椰子雞餐, 有雞, 肉丸, 炸枝竹, 同菜 加一個煲仔飯 $245.   而芽菜, 木耳係散叫 


的湯唔夠, 我地再加椰子水要$12.   的炸枝竹麻麻, 睇落已經煮腍, 但食落"有骨"咁.

最後就焯什菜....食到尾真係有的難頂, 的湯越嚟煲越甜.  佢地無出聲, 但相信同一感覺, 最後大家停手唔食啦.

 

最後嚟呢鍋雞什煲仔飯,  個套餐包架.  

呢鍋飯非常好味, 我地五個人都食唔哂呀!  入面有雞腎, 雞肝同雞腸.  佢地一日賣咁多雞, 整雞什煲仔飯都合理嘅.


埋單人民幣500.  ok喎.

走時可以從另一邊門走, 呢邊近停車場, 無咩人.  但係前門仲有好人呀!

呢餐都食得幾開心, 不過最後唔應該加椰子水, 應該加普通滾水就可以, 的湯味道"太甜", 食到尾都唔想當係甜品.

 

東北人 - 長安店

2012年3月27日下午12:22公開累積瀏覽 127 1

                                                                
March 24, 2012, Saturday afternoon

今天型爸約咗個朋友去東莞長安打Golf, 我肩頸有事, 唔敢去打呀!  但我都有事要做, 所以同佢地一齊上去, 佢地tee off 12:50, 去到我地先去食飯.

兩星期前, 型爸同陶爸嚟, 去過一間新開張嘅東北菜館, 叫我地今次嚟試吓!

就係呢間啦, 門口都好誇張, 好似辦緊喜事咁


出面仲有大紅花轎, 一頂掛綠, 一頂掛紅


呢個角度影到兩頂轎, 其實無野, 只係放唙到作招徠

一入門口有好幾餅浸酒, 仲布一酲好大嘅酒

 

裝修都有的特別, 最入面嘅牆用咗大小不一嘅推磨作為裝飾, 而燈就用一的花傘作為燈罩


我地坐中間就係一的大紅嘅檯櫈, (太多人唔係好方便影相).   而側面一排的檯櫈就有的不同.  呢兩張檯剛收拾好, 用大木車輪作屏封分開座位, 座位好似日式咁雙腳要放入檯底


去洗手間又見到呢個角落放咗個水井, 咁當然打唔到水啦


仲有好大架嘅大輪木頭車, 本來都幾有趣, 不過旁邊放咗咁多膠櫈.



型爸同朋友叫餸時, 我影吓其他餐牌.

有個紅色小盒子, 打開睇吓, 係紙巾嚟架.

 

另外每人仲有一包濕紕巾.   睇單先知, 一小盒紙巾一蚊, 濕紙巾都係一蚊一包.

我地先叫咗一份涼菜, 老醋野生木耳, 好味喎.

另外叫咗一碟新鮮涼拌雪里紅, 好味, 但唔記得影 

佢地見到呢份大餅, 叫一份嚟試吓, 後來佢地話送比我地食. 我相信煎呢個大餅個鑊起碼直徑有20寸, 因為呢個大位豎起都有10-12寸高, 煎好摺好豎起成一個三角形.  餅身好薄, 應該加咗雞蛋嚟煎.  但食落無咩特別味道, 好食又唔係, 唔好食又唔係.

 

呢入係羊肉餃

羊肉串配孜然粉 (哈哈, 朋友唔食牛肉, 咁我地就叫羊肉啦)

呢份係韮菜豬肉餃

 

凍豆腐五花腩炖白菜, 呢份好清都幾好喎.


而呢份係侍應小姐介紹嘅, 小雞燉蘑菇, 其實係木耳炆雞, 入面放咗的菇同透明嘅粉條一齊煮. 呢碟我地覺得麻麻地, 的雞好嚡呀!  後來先知道叫咗呢味餸, 佢地會嚟唱歌表演.

我地四個人, 都叫咗唔少野食, 除咗的雞, 大部份都食哂.

佢地嚟我地張檯表演時, 我唔好意思影相, 但佢地响第二檯表演時, 我就可以影相啦.   我地嗰檯表演時, 只一男一女, 但呢檯就有兩男一女, 一面唱歌一面表演.  原來叫唔同嘅餸, 唱唔同嘅歌.  不過佢地介紹時, 東北口音嘅普通話, 講得又急又快, 聽得唔係好明.


表演完仲送咗幾枝呢的煙槍比的男士作小禮物.

對對面的檯有的唔同, 用咗BB吊籃仍為裝飾

 

埋單唔貴呀, 人民幣178

食完先送佢地地球會, 我就去辦我嘅事啦.