香烤芝士蛋糕

May 23, 2020, Saturday

星期六日, 又搵的野嚟攪


一見呢個焗盤就知做咩....係呀, 又係氣炸芝士蛋糕呀!

 兩隻蛋

 糖, 平常應該用大概60g, 但我要減甜, 用了35g 木糖醇, 12g 低筋粉

Cream Cheese 250g, 加糖

 全程都用個food processor 攪拌

再逐隻蛋加入, 最後加110g whipping cream, 麵粉及少許青檸汁

 倒入焗盤....睇落今次有的稀

預熱氣炸鍋200度5分鐘

 今之用200度焗30分鐘...焗起好靓呢!  (上次用180度, 個面無咁Burn)


二公子話要試吓熱食

咁切出嚟大家試吓啦.  咦, 同凍食好大分別, 好似Sponge咁.   二公子話都ok.  但我喜歡凍食.

第二天, 真奇怪, 個texture唔同哂, 食落綿密creamy,  我覺得咁先係食cheese cake囉.  正呀!

裸麥粉合桃香蕉蛋糕

April 30, 2020, Thursday 佛誕假期

呢排整咗好多次香煎蛋糕, 因為覺得好食過古早味蛋糕.

材料: 香蕉3隻(先壓成蓉)，雞蛋1隻(打散)，60g溶牛油，木糖醇60g, 1茶匙雲呢拿香油，5g Baking Soda, 鹽少許，245g 中筋麵粉 (今次用了裸麥粉)，牛奶1/4杯.

香蕉壓成蓉, 加打散雞蛋一隻加糖鹽拌勻, 加溶牛油牛奶雲呢拿香油,
將baking soda加入麵粉內, 再篩入香蕉糊內, 拌至無粉粒,
最後加入合桃

焗盤先塗油, 倒入麵糊, 櫈平

預熱焗爐175度

焗一小時

每次都好成功

用裸麥粉都一樣得.

厚麵皮千層蛋糕

Apr 18, 2020 Saturday

今日攪攪震系列....厚麵皮千層蛋糕....做咩攪作要整?

1) 為咗要清咗包Pan Cake Mix
2) 為咗要試吓個餅皮機

我覺得自己真係好好笑, 又要整又要怕麻煩, 個腦係咁諗點樣整簡易版.

我用Pancake mix 加蛋加水(或奶)開成粉漿. 

為免有粉粒, 我將的粉漿過篩.

今次經驗話我知, 的粉漿要稀的, 咁的餅皮可以薄的.   仲有, 用餅皮機係快係好玩, 但餅皮中間會黏漿多咗.  會厚的.

的餅皮大少不均係唔好睇, 但只再用個圓模cut 咗的邊就會整齊靚好多. 

但我係試玩性質, 食過的餅皮又幾好味,  又唔係送比人, 咁就無cut 的邊.   只係順大細排得整齊的.

跟著用300g whipping cream 加糖打成甜忌廉, 將的忌廉逐層掃上餅皮上

嗱, 就係咁啦.   我仲將最厚最大嗰塊放响頂, 整到好似帽咁.   跟著放入雪櫃

食完飯拎出嚟做甜品.

睇吓, 都真係好多層架. 

其實粉漿稀的, 可以整多好多層, 但cream 就會搽多好多, (個腦咁多野諗又要整)

哈哈, 整過就算數, 個樣唔好睇, 但味道都ok架.    純粹搵的野嚟玩吓, 諗起咁多cream, 呢的蛋糕, 都係整一次好啦.

氣炸古早蛋糕

April 18, 2020, Saturday

又到星期六日,  防疫在家最好搵的野嚟做吓.

呢排成日都用氣炸鍋, 貪快及易於清洗.   炸鹹豬手, 炸燒用, 炸多春魚, 炸雞軟骨, 炸雞皮,  炸芝士蛋糕....炸得就炸....

今日炸古早蛋糕....其實係咪真係想食, 哈哈, 呢個唔重要, 主要係搵的野嚟做吓.

先把一個6"焗盤包好

材料: 雞蛋三只, 牛奶50ml, 油30ml, 糖 10g/30g 打蛋白用, 低筋麵粉50g .  兩片芝士, 可加可不加.

先將蛋黃蛋白分開

小鍋加入奶, 油, 糖煮至糖溶

離火, 篩入低筋粉成麵糊, 再加入蛋黃麵糊拌勻. 

 另外用廚師機打發蛋白(分三次加入糖)至略為企身

蛋白糊與麵糊混合

先將一半麵糊倒入焗盤, 中間放了兩片芝士, 再倒入餘下麵糊

櫈幾櫈排的空氣, 可以入爐

預熱氣炸鍋160度5分鐘

160度焗20分鐘.  拎出嚟, 用木簽插入, 覺得個底仲有的濕, 再入爐150度焗多10分鐘.

出爐時唔得閒理佢啦....因為另一邊箱又整緊另一個蛋糕.

至於味道, 咪好似紙包蛋糕囉.   中間放咗兩片芝士反面麻麻, 又鹹又甜咁.

New York Cheese Cake

September 23, 2017, Saturday

呢排真係好忙, blog 都無時間寫.   但就算點忙都要滿足二公子的要求.

佢話好耐都無食我整嘅New York Cheese Cake, 趁佢生日 整比佢食.

Cindy 話我應該兩年無整過.....吓, 真係有咁耐咩?

首先要攞個甩底模出嚟, 唔要個底, upside down 用牛油紙包好個底, 再用另一個碟盛起, 咁一陣做餅底就客易好多.

點解要兩個模? 因為一次過整兩個囉.   一個送比二公子, 另一個送比行山組員呀!

消化餅一條有17塊, 我分成兩袋,  用木棍壓碎

兩份溶牛油, 每份50g

將壓碎餅乾加入溶牛油拌勻, 壓成餅底, 跟著放入雪櫃

一公斤cread cheese 分成兩份

每份500g cream cheese

每份加140g糖,  一隻雞蛋, 一個蛋皇.  打勻後加一茶匙vanila oil, 半盒sour cream (115 g)

打完後就滑一滑

呢個時候預熱焗爐 170度

將餅底從雪櫃取出, 模內掃油.  跟著將芝士漿倒入

將芝士漿"櫈"平, 盡量將芝士漿入面的空氣"櫈"出, 焗起實實綿綿先靚架.

個爐夠大, 一次過焗兩個啱啱好.

.

焗到差唔多我就將兩個蛋糕調換位置,  等兩個都受熱均勻

 

呢個時候就預備餅面的sour cream.   頭先蛋糕用咗半盒sour cream, 剩低就加28g 糖拌勻, 一陣用嚟整餅面

焗好啦......好靚呀!  

先甩咗餉鋼模

再將sour cream 均勻掃上餅面

再放入焗爐焗10分鐘

攪掂啦!

我覺得做得唔錯呀（哈哈，自己讚自己）

整好待涼放入雪櫃, 最少雪四五小時食先好味.   最好就雪一晚啦.

整好蛋糕, 可以同二公子去按摩啦....呢個係佢生日要求的節目呢!