涼拌茄子

May 16, 2020

今日除了整肥义, 仲整咗個涼拌菜

估吓呢三樣係咩....咦, 有雞絲呀?   唔係呀, 三樣都係素菜來的.

第一樣係茄子, 煮熟手撕, Cindy留了茄子皮, 最後都比我私了(撕了)

第二樣係杏鮑菇, 蒸熟手撕

第三樣係新鮮蟲草花, 蒸熟, 唔使撕都一條條

只要拌個醬汁就已經可以食....懶唔懶的呢....用日式麻醬唔使整....

最後都係唔懶, 用鎮江醋, 魚露, 糖, 麻油, 加少許辣油....好味呀!

整好食埋都唔記得影相, 最後剩番少少先記得.   撕咗的茄子皮, 好睇又好食的.

不過最近收到WhatsApp信息, 茄子唔好同菌類一齊食, 會中毒...

係咪架, 我地一家食咗都無事喎.  仲唔係第一次食.

資訊泛灠, 唔識分真偽呀!

薯蓉蔬菜餅

May 10, 2020, Sunday

將香草雞及鹹豬手放咗入焗爐之後, 就輪到整蔬菜餅啦.

薯仔四大個 (屋企只有三大兩小薯仔, 湊拼就夠啦) 之前已經放咗入蒸爐蒸30分鐘.   Cindy問我點解唔加水煲, 會快腍好多.  我話比佢聽因為整蔬菜餅, 唔想薯仔太多水份.   蒸完30分鐘, Cindy話好似未完全腍, 咁咪蒸多5-10分鐘囉.

蔬菜就用咗西蘭花加椰菜花

的梗切咗出嚟, 先切片.

小煲加水, 先將梗放入煮分半鐘, 再加的葉煮3分鐘, 將的菜用過濾水過冷河等佢保持脆綠

隔去水份, 用剪刀剪碎.  (唔用攪拌機因為唔想的菜太碎).

我叫Cindy幫忙切半個洋蔥切碎炒軟.

蒸好的薯仔去皮壓碎 (唔需要好似薯蓉咁碎)

加入牛油及芝士 (我用了四塊片裝芝士撕碎.  趁的薯仔仲熱伴勻, 的薯蓉就會好有黏性.

再加入炒軟了的洋蔥

加調味: 鹽及胡椒粉, 蒜粉, 亦可加入些香草

再加入蔬菜拌勻

取蔬菜薯蓉整成球, 碌一碌粉(麵粉或粘米粉) 減去黏性.  鋼模塗少許油再將薯球壓入定型.

退模時要慢慢, 跟著包保鮮紙入冰格定型.

雪硬後再用保鮮紙獨立包裝再入膠盒, 咁就幾時食都得啦.   嘻嘻, 似唔似宜家賣嗰的呀!

呢個份量做了十一個

今晚只有我, 型爸同Cindy, 整三個就得.

食時可以煎或入焗爐焗熱

哈哈, 唔係讚自己, 味道真係好好呀!

蓮藕豆蓉夾

May 6, 2020  Wednesday

呢幾個月, 沒有出外食飯, 每天煮煮煮, 就不停諗點樣可以食得唔好嘥.   Cindy都好好, 我同佢講, 佢好上心, 仲幫手一齊諗一齊做.

今日要介紹呢款係五號屋食得唔好嘥系列之蓮藕豆蓉夾, 係Cindy 諗出嚟架.

話說我家差不多每星期都會煲蓮藕湯,  的蓮藕通常都會留起, 第二天用南乳炆嚟食(都係食得唔好嘥).  咁煲湯用多款豆 (綠豆, 赤小豆, 扁豆, 眉豆, 紅腰豆, 通常都唔會食, 就會倒掉.   今次Cindy利用埋的豆整成豆蓉, 非常有創意呀!

本來的蓮藕切粗件的, 佢將的蓮藕一開二成薄片, 釀的豆蓉, 再黏麵包糠半煎炸, 又幾好味喎.

首先外型都算唔錯

而的豆蓉餡就加咗香茜粉, 茴香粉, 孜然粉調味, 非常可.

本來呢的二次創作的餸唔會請人食, 但第二天我帶飯回公司, 秘書小姐見到好想食, 咁就分一件比佢啦....哈哈, 佢大讚好味呀!

二公子就好好笑, 第一嚿夾起食落去話好味....後來知道係"湯渣", 根著就無表情....靚仔, 你唔使諗啦, 阿媽絕對係食得唔好嘥支持者.

素鵝

January 28, 2018, Sunday

 响樹記買咗腐皮, 無偷懶, 馬上去買埋配料, 返嚟就即刻包.

睇吓, 樹記的腐皮真係好靚, 又薄但又唔會爛, 外圍修哂邊.  買咗六塊, 一開四, 即可以包24件.

至於配料, 用咗紅蘿蔔兩個, 翠玉瓜兩條, 沙葛兩個, 蓮藕三節, 仲有黑木耳.   全部刨絲, 黑木耳就切碎.   其實每樣大約同等份量.   我叫Cindy幫我炒, 我要調個豉油汁

呢個豉油汁係要用嚟搽响腐皮上面, 等塊腐皮有的味.  用咗三湯匙生抽, 一湯匙老抽, 兩茶匙糖, 一湯匙麻油, 兩湯匙水, 試吓味, 啱口味就得啦.

炒好之後, 放上大盤, 稱吓總重量, 跟著除24, 咁就知每件可以包多少餡

我包時就叫Cindy稱的份量, 順便令的配料快的涼, 咁就可以包

腐皮用掃均勻塗上甜豉油, 跟著放一乒配料....包包包

一共24件, 分三個蒸盤.

哼哼哼, 一次過放入蒸爐, 100度蒸8分鐘.   點解要蒸? 因我要的腐皮變腍, 待涼之後就可以用保鮮紙分件包好.   如果的腐皮仲係脆, 咁放入冷凍櫃之後, 的皮會碎呀!

整好咗, 可以放的比媽媽及奶奶, 佢地好鐘意食架.

白蘆筍配荷蘭醬

Jun 18, 2017, Sunday

煮緊海鮮飯時, 我又整另外一樣.

係白蘆筍呀!  呢包白蘆筍係林老闆從歐洲回來送比我地的.

仲送埋呢盒荷蘭醬.....哈哈哈, 咁成件事就改變得好容易啦.

只需將外皮刨去

煮10鐘就得啦.

跟著拎上嚟, 淋上荷蘭醬就得啦.

不過我刨的皮刨得唔夠多, 外皮仲有的硬, 但蘆筍好清香好味, 啱哂做今日的配菜呀!

涼拌茄子

Jun 12, 2017, Sunday

今晚我地有potluck聚餐, 又要諗整的咩.  會整三樣野, 己經响個腦諗咗, 一個冷盤, 一個炆, 一個焗,  總之就可以5:30 happy hour 啦.

今日專登出去街市買呢款瘦瘦長長嘅茄子, 用嚟做涼拌茄子呀!  呢款茄子比較腍呀!

 

哈哈, 講少咗一句, 的茄子如果用水煮就唔好切, 切咗的話就用蒸.  Cindy 幫我調轉哂.  的放哂落鑊, 咁就試吓壓著的茄子睇吓會唔會變色.    哼哼, 未煮都開始變呀!

煮咗兩分鐘, 用過濾水加冰降溫

跟著就整個醬汁啦.

其實醬汁好講個人口味, 喜歡就得架啦.

我用了乾蔥頭, 蒜頭, 薑, 蔥

加埋各款調味, 仲加咗的櫻花蝦乾落去.

將的茄子排好上碟, 加的醬汁上去就得啦.

顏色睇落唔靚, 但味道都唔錯架.

黃金海鮮扒冬瓜

April 29, 2017, Saturday

好耐都無煮呢個餸, 今日心血來潮, 買咗嚿冬瓜煮呢個菜

冬瓜洗淨切粒, 入蒸爐蒸20分鐘.  冬瓜水留起

急凍海鮮用少許鹽, 胡椒粉略醃

蒜蓉起鑊將海鮮略炒盛起.

三個鹹蛋黃蒸熟壓成蓉, 用油爆香至起泡, 將海鮮回鑊, 加上湯, 試味.   如要稠一點可以埋一個玻璃茨.

冬瓜蒸熟

加上黃金海鮮....咁就攪掂啦.

今餐仲有蒜椒蒸馬友

梅菜炆豬肉

螺片烏雞翅湯

今晚非常豐富, 型爸又比likes呀!