脆皮椰汁年糕

February 5, 2019, Tuesday, 大年初一

裝修了幾個月, 仲未完住榻好, 裝修師傅幫我整到企企理理, 過咗年先再整.

焗爐都係新買, 送咗嚟唔係好耐, 我都仲未學點用.   但今日要焗年糕, 點都要用, 咁對著Manual, 一家識用嘅, 只係唔知呢個爐同以前西門子會唔會好大分別.

焗年糕的份量就一定唔會錯, 十隻雞蛋, 330g 糖, 500 ml (一盒椰奶), 500g 糯米粉

雞多打勻

加糖

加椰奶拌勻

加粉

拌勻

過篩刮粉

再過篩一次已經好滑

再過一次篩落焗盤

預熱焗爐180度, 焗1小時

呢個焗爐比以前嗰個仲大的, 不過都係唔可以平放兩個焗盤, 都係要上下放

焗到咁上下, 就上下調轉

大約35-40分鐘, 個面焗好

好拎出嚟反轉, 撕開式的牛油紙繼續焗, 咁就底面都咁靚.

個年糕焗得好成功呀!    拎哂兩底去奶奶家拜年.   的家人好開心, 佢地知我家裝修唔知我整唔整比佢地食.   拎丁去, 佢地都話要又食又拎呀!

初一上午食素, 今年姑奶在大自然素食訂咗個素盤菜...好好味呀!

蘿蔔糕/芋頭糕

February 4, 2019, Monday, 年三十晚

昨晚接咗Whisky仔返嚟, 比咗少少雞柳同半個蕃薯佢食, 無再嘔啦.  咁都放心的.

今日開爐蒸糕, 唔知係咪記掛著Whisky 仔, 落粉的份量錯哂, 仲要整完先知

手切蘿蔔條, 無題吖

粘米粉, 澄麵預備好, 跟著做開的份量

蝦米浸好, 臘腸臘肉切碎炒香備用

煮蘿蔔時都無問題

但一撈粉就有的唔妥, 到我篩的粉落去蘿蔔漿, 點解好似咁多粉嘅, 仲唔夠水要加雞湯

先做四底, 再整四底.   做完哂再腸吓的份量, my god, 原來我每四底用了八底份量的粉....救命, 點算呢!

無辦法都整咗, 咁咪照蒸啦,   結果第二日拎去奶奶屋企, 下午煎糕時, 切開蘿蔔糕, 覺得入面好粉, 我實在接受唔到自己整的糕咁樣, 一二三掉咗佢....設到屋企, 其他的都唔要.    Cindy話唔好嘥, 留起兩底佢切薄慢慢煎嚟食.....  整咗咁多年蘿蔔糕, 第一次嚐到失敗的滋味.

蘿蔔糕量咗粉, 整芋頭糕時就好小心.   但一樣出錯.   因為水浸, 連用開的電子磅都浸壞埋.  新嘅電子磅無舊的咁好用, 可能就係咁睇錯份量

煮起第一鍋芋溶. 點解好炒咁少嘅

好小心量好粉漿加落去

只係整到三盒多的的.

跟著再整第二鍋, 呢鍋正常喎.  做了四盒

因為粉漿的份量正確, 應該係量芋頭時, 睇錯個磅.   只係整少咗一盒, 都唔係問題. 

辛辛苦苦整了八底蘿蔔糕, 七底芋頭糕.   今年只有芋頭糕可以請的親友食.

焗雞蛋年糕 - 花奶版

March 3, 2018, Saturday

今日林老闆邀請我地去佢屋企燒烤, 佢上次話好鍾意食嗰個椰汁雞蛋年糕, 咁今晚又唔知帶咩野過去, 不如就焗年糕啦.

摷吓個廚櫃, 竟然無哂椰汁...無問題, 總會有代替品的.

屋企有礶花奶, 就用佢啦.

10隻雞蛋, 320g 糖, 一礶花奶先拌勻.   今次的蛋細隻的, 加上花奶比盒裝的椰汁少了100ml, 拌落去感覺到比之前做的有的稠

跟著加了500g 糯米粉

跟著過篩, 要用鐵匙不斷的刮

過到第三次就好滑啦.

預熱焗爐180度

預設一小時

焗到大約半小時,個面好靚,見個糕已經昇起,應該可以攞出嚟後轉

反後撕去牛油紙焗個低, 十五分鍾已經昇到好高, 應該熟啦.

哈哈, 昇得高就跌得低, 個底好皺皮呀!  不過唔使驚, 反翻轉用個面見人咪得囉.   皺咗個皮底, 凍咗之後好脆呀!

我先切一半, 再切少少出嚟食, 味道都ok喎, 仲無咁甜添.    比型爸試, 佢知道之後, 猛咁話有椰汁香的....哼, 我唔講你都唔知識唔識分呀!

跟著過去林家燒炸啦....

咩野都唔使講, 先睇睇的龍蝦先...林老闆去三勝村買, 隻隻生猛.   除了龍蝦, 仲有貴妃蚌, 大蝦, 牛扒, 羊扒....

最重要仲有年輕一輩燒埋比我地食...

林老闆仲開埋之Amrut 同型爸一齊品嚐....嘻嘻, 呢的鄰居去邊道搵呀!

芋頭炆臘味

February 16, 2018, Friday, 大年初一

忙完整年糕又要煮餸, 因為姑奶要求, 咁我就預備一個素菜午餐, 另外兩個餸就晚餐.

至於素菜, 一早就包好素鵝.  另外再整了燻蹄, 現在只要煮多一個餸就得.

今次整芋頭炆臘味, 哈哈, 呢的餸平時好少煮, 真係過時過節, 人多食先煮咋.

今次諗著煮一大鍋, 跟著留起一半, 年初三家人嚟又可以煮少一個餸.

今年的臘味好靚呀!   哈哈, 同整芋頭糕一樣, 都係臘腸潤腸加臘肉, 先爆香的臘味, 盛起.

臘味油再加少許油爆香的芋頭 (其實可以先炸的芋頭, 但我唔想咁多油呀!)

跟著加水加臘味煮腍, 煮到咁上下先加椰汁.   我今次煮多的汁, 跟著用個樽裝好.  而芋頭臘味就分裝在另一個盒.

咁晚上拎出嚟煮時,只要叫工人姐姐加的汁落去芋頭臘味就得啦.   呢碟餸, 淨係的芋頭蓉連埋的汁已經好好味啦.

煮好就即刻換衫出發....

今年姑奶都係盡量以唔使點煮為原則, 訂咗一個素盆菜做午餐

我拎咗九條素鵝嚟, 下午先煎三件 (工人姐姐用咗好多油呀!).   下午唔係太多人, 一個盤菜加埋素鵝都已經夠食.  奶奶另外有一碟羅漢齋, 今日佢任天食素呀!

不過個素盆菜唔掂呀, 味道唔好, 墊底的蘿蔔仲有少少酸味呀!

至於晚餐又係盆菜, 姑奶在大家樂訂的, 味道又幾好喎.   攞到返嚟仲熱辣辣, 唔使翻熱.


盆菜仲有大蝦雞鴨西蘭花另上.

嬸母整了糖醋骨

我整的燻蹄

 
 仲有芋頭炆臘味.

其實我唔鍾意食盆菜架, 但奶奶年紀大做唔到, 姑奶又係處理唔到, 我自己又唔可以嚟煮十幾樣, 咁食盆菜都係一個選擇啦.  咁我整到幾多嚟就幾多啦.

又係嗰句, 食咩唔重要, 最緊要係一家人齊齊整整, 開開心心團聚就得啦.

至於大公子, 今日重要任務, 由佢陪 Grandma 打麻雀, 輸的錢氹佢開心呀!