五號屋的部落: 9月 2017

2017年9月22日星期五

北京老家

September 15, 2017, Friday

老友鬼鬼又從加國回港, 大家又約出嚟食飯. 每次都叫我訂位, 有時都唔知訂邊道好. 諗起都有一陣子無去過北京老家, 咁就訂咗呢間.

訂位七點, 大家都好準時, 當時無咩人...不過跟著好快就坐滿

我地研究咗一陣, 叫了一個四人餐再加一客小籠包, 咁應該夠五位女士食啦.

的菜快到無影就嚟到, 嗰頭落單, 嗰頭就上菜

頭盤有蒜泥白肉

海蜇大豆芽菜

涼菜整定唔出奇, 但估唔到片皮鴨都可以即上.

真係快過斬燒味. 用嚟包填鴨的粉皮比我地reject 咗兩次, 第一次朋友話係咪的粉皮唔熟, 見到的粉皮白色仲有乾麵粉. 第二次拎嚟, 的粉皮黐埋哂一齊, 一撕開就爛, 攪咩鬼. 到第三次老細再拎過嚟先得. 咁粗製濫造點得呀! 呢道有幾樣比較出名, 柚子魚, 草捆牛肉, 北京菜梗係有填鴨, 連個粉皮都做唔好點攪.

呢個柚子魚都幾好味, 但條魚炸得唔係好脆, 不過我地都無介意, 因為個柚子汁都係凍的.

炒刀削麵幾好味呀!

蒜蓉蜆菜, 的菜就老咗的.

另外仲有鐵板羊肉, 朋友唔食羊, 改了做鐵板牛肉

另外加了小籠包, 普普通通, 不過不失啦.

最大問題係的侍應不斷嚟收野, 我地仲有幾碟野未食完就上糖水. 最終係被我地退回叫佢地一陣再上. 到我地食完糖水, 都未叫埋單, 佢地就拎張單叫我地埋. 咁即係趕我地走.

整餐飯都只係食咗個幾鐘, 見佢地外面有人等位, 我地都費事阻佢地啦.

埋單HK$1178, 我地五個人食四人餐, 平均每位HK$240.

如果諗著可以坐耐的傾謁嘅, 就唔可以搵呢的餐廳啦.

2017年9月19日星期二

吉列豬扒

September 12, 2017, Tuesday

平時好少食吉列豬扒, 最唔喜歡那塊炸皮. 好多日式餐廳做嘅吉列豬扒, 上下皮加埋成塊豬扒咁厚, 有的為咗慳皮, 那塊豬扒薄一薄, 炸皮就厚一厚, 變咗唔係食豬扒係食炸皮. 最終當然係係掉哂的炸皮, 只食那薄薄的豬扒....哈哈, 咁就不如唔食吉列豬扒, 所以通常都唔會叫日式豬扒飯.

食日Cindy整咗吉列豬扒, 令我對佢另眼相看. 炸皮做得又薄又脆, 件豬扒又腍又鬆. 型爸食第一件, 即話好味, 叫我試吓. 一試下果真好味, 咬落外脆內軟....即刻比個like Cindy, 佢開心到四萬咁嘅口. 咁當然都要多得我買嘅西班牙豬扒啦, 唔係的肉質邊有咁好吖.... 二公了遲咗落嚟食飯, 聽我地講馬上食番一件, 呢個奄尖鬼都話好呀!

呢餐仲有紅蔥頭涼拌茄子

緬甸式蘿蔔煮黃立鯧

炒菜心

青紅蘿蔔豬骨湯

四餸一湯, 好味, 大家都得好開心.

最開心係被讚的Cindy呀!

2017年9月15日星期五

鳳坑谷埔 + 松記食海鮮 + 一哥晚飯

September 10, 2017, Sunday

打風落雨, 計吓計吓幾個星期無行山.

雖然天文台話今日局部地區性驟雨, 我地一行七人都堅持出發

安全起見, 都係行鳳坑谷埔, 大部份都係石屎路, 怕泥路濕滑, 組長同領隊都話烏蛟騰都唔行啦.

氣壓低, 天氣好焗

我地由鹿頸出發, 綞鳳坑去到谷埔, 再行過少少就回頭

去到松記都只係十點幾, 松記昨天開市, 組長同領隊話要幫襯, 咁我地再行一圈

今日行山組做了一件好事呀! 我地見到有一隻小牛跌咗落小徑邊離地大約兩尺卡在一條水管, 無法出來. 而母年在前面不見了小牛, 不斷在叫. 領隊哈叔馬上跳落去, 我地拉開水管, 他把小牛抱出來. 小牛兩邊肩膊受了傷, 慌不擇路, 我們把牠趕回母牛身邊. 好彩今天無下大雨, 要不小牛可能已經浸死. 去年底, 我地曾見過一小牛屍體就浸在小徑邊. 看見牠們母子重驟, 真替牠們開心.