去到東海, 入門有一個大雪櫃, 入面全放滿大閘蟹.
而雪櫃旁, 有一隻木船, 木船上亦放了很多大閘蟹, 廚師就在旁邊蒸大閘蟹.
套餐都有多個選擇, 一人餐, 四人餐, 但型爸希望朋友可以試到多款唔同菜式, 雖然我們只得四個人, 都叫了一個6位套餐.
喜歡這隻碟, 睇落專業專門一點.
第一道菜係蜂巢蟹粉
咬落去外脆內軟, 應該係用芋頭包著的蟹粉去炸, 好好味呀!
跟著就開始食蟹啦...
呢個餐共有12隻蟹, 我地四個人每人三隻. 當我打開第一隻蟹時, 發覺的膏好少, 我就問個Manager, 點蟹的今日的餐蟹咁少膏嘅. 佢望一望, 二話不說, 馬上幫我同另一位女士換過兩隻新蟹. 型爸同另一位男士就無投訴, 他們可能食得太快了... 我們兩位女士當然開心啦, 覺得佢地專業, 我地主要嚟食大閘蟹麻.
換過嗰隻新蟹, 好咗好多, 雖然唔係好滿膏, 但比第一隻多膏, 肉質鮮甜, 有食大閘蟹的感覺.
呢隻係第二隻, 非常多膏, 睇吓蟹身中間白色嗰的, 好厚嘅白膏, 好好味, 好正!
呢隻係第三隻, 直程係爆膏, 蟹蓋已經有一層好厚嘅膏, 打開蟹身, 入面都係滿膏... 好好味呀! 真係爆哂燈呀!
我地四個都覺得, 的蟹係一隻靚過一隻, 最後呢四隻, 我地非常滿意.... 今日食蟹, 好盡興呀!
食完蟹就去洗手間洗手, 酒家已經預備咗牙膏, 但我唔想用牙膏洗手, 因為我想睇吓一陣間仲有無蟹味. 所以只係用普通洗手液洗手.
其實食完三隻蟹已經幾飽, 不過而家先至開始食其他餸呀!
呢個山珍佛跳牆好清甜好味, 入面有冬菇, 花膠, 螺頭, 雞腳, 樣樣都好味, 全部食哂. 不過每人都係飲一碗, 再飲其他餸就食唔落. 另外多出嘅兩碗就pack咗佢.
跟著連續上咗幾樣餸, 成檯都係, 攪到唔記得影嗰個蟹粉蒜蓉包同蟹粉小龍包. 的蟹粉好好味, 蒜蓉包就食少少, 剩咗當然唔好嘥, 留番個蒜蓉包可以做早餐.
個蟹粉小龍包一樣咁好味, 我地女士食一隻, 要麻煩兩位男士食埋嗰兩隻. 蟹粉小龍包凍咗唔好食... 相比起嗰日响西湖春天食嗰的蟹粉小龍包, 真係天淵之別. 東海好好多!
蠔皇柚皮花菇. 平時我唔鍾意食柚皮, 但型爸鐘意食, 由其是蟹子柚皮. 呢個柚皮做得好好, 我都覺得幾好味. 兩位台灣朋友未食過, 不過佢地食咗, 都話分辨唔倒係咩野嚟. 太夠了, 我地試咗少少, 都係pack起佢. 比起上次响鴻星食嗰的柚皮, 呢道贏哂...
蒜香醬油雞, 我就放棄, 個胃留番的位置食其他餸. 但都要勸兩位台灣朋友點都要試一兩件...
清蒜老虎斑, 條魚蒸得好靚, 又要大家互相勸勉, 好努力咁食咗佢.
蒸臘味糙米飯. 呢個飯口感好特別, 無糯米飯咁膩. 我鍾意呀! 但當時的能力, 只可以食一兩匙羹 .... 大家都食一兩匙試吓個味道.
呢個權頭咁大個壽包我地點食得落, 我地用個蟹剪, 將一個壽包一開四, 每人食少少, 好開心呀!
呢碗薑茶湯丸, 令到這餐更加美滿. 初初送嚟嗰幾碗湯丸, 的湯丸仲係凍嘅, 可能煲得唔夠時間, 型爸即刻叫佢換咗佢. 新嚟嘅湯丸, 香滑軟熟, 再配埋個薑茶, 好好味.
呢餐食得非常愉快, 我地由七點食到十一點... 覺得每樣菜都做得唔錯.
今晚真的很開心, 最難得能與兩位台灣朋友一起吃晚, 大家談天說地, 食得盡興..
其實唔止我地開心, 見其他週圍嘅食客都食得好開心. 離開嘅時候, 看到大木船上嘅蟹已經賣哂, 大雪櫃頭一層已經無咗一半蟹. 我諗當晚可能已經賣掉兩三佰隻大閘蟹...
東海, 你係得嘅...
