菜茶

February 8, 2017, Wednesday

鄭媽媽真的有我心, 今日突然Whatsapp 張相比我, 問我有無興趣.

一睇, 即覆..."超有"

哈哈, 係我好鍾意食嘅菜茶呀!

結果呢....佢响媽媽道食完四大碗之後, 打包咗一盒比我.   唔, 一打開, 好香呀!  入面有十幾種菜, 粉絲蝦米臘腸

仲拎埋炸米同花生添

沖番壺茶

加落的菜茶

再加的炸米花生, 咁就食得.

好好味呀!   鄭媽媽話的菜剛炒起仲好食, 每款菜有不同軟硬度, 食落好有口感.

佢話有機會帶我去佢屋企食, 我話邊好意思吖, 佢打包嚟比我食已經好滿足啦.

不過今次美中不足就係我的茶比較淡, 下次要問吓用邊款茶一齊食先攻好味.

陳皮冰糖燉檸檬

January 10, 2016,  Tuesday

呢排真係多人病, 昨天早上09:45打去make appointment睇醫生, 竟然話上午booking已滿, 下午再打去啦.   我忙到死, 唯有叫秘書小姐幫忙, 下午四點幫我去book... 預約已經到晚上19:45. 到七點再打去reconfirm, 已經延到20:30.   無辦法, 都係要睇架.

結果九點幾先輪到我, 睇完攞埋藥都已經22:10, 我唔係最遲, 後面仲有十幾個病人.   開車返到屋企已經十一點..  Cindy留咗餸, 但我食幾條菜就去梳洗瞓覺, 明天都係要晨早, 呢排病都唔可以請假,  咁多客, 點都要頂著.

晨早返到公司, 秘書見到我包藥都打冷震.

佢突然醒起, 叫我快的飲嗰樽陳皮冰糖燉檸檬....又係喎

喉嚨唔舒服, 現在不飲, 等到何時

 

打開個樽, 好重檸檬味, 但唔覺好大陳皮味.   用木匙攪吓, 入面好多檸檬皮.

倒咗杯熱水, 加咗幾匙落去, 連檸檬皮都食埋.

飲完覺得個喉嚨舒服咗的, 一樣有咳... 都明白唔係仙丹, 等我飲多幾次睇吓係咪好先.

聖誕禮物

December 24, 2016, Saturday

型爸真係好好架, 佢一早就話要買聖誕禮物比我, 仲話要我去揀顏色及款式...嘻嘻嘻, 真係好開心呀!

今天晚上有Party, 要八點先開始, 我地就順便出去食個tea...

開車去上水中心, 啱啱過下午五點...又有泊車優惠.

之前去過嗰間餐廳, 竟然無下午茶, 咁早點食晚餐呀! ....哼, 退而求其次, 去快餐店食, 又慳的.

型爸要了個餐蛋麵配西多士&紅豆冰

我要了厚多士雞翼+甜品.

黑麻麻呢碗係紅豆沙, 好耐無食過, 又幾好味呀!

幾十文兩個, 食到飽飽呀!

跟著就去買聖誕禮物....

呢...要揀款揀色呀!


我地聖誕禮物....Apple Watch.... 配合我的Iphone, 正呀!

型爸咁好, 我有咩野回報比佢....哈哈, 深深一抱呀.   佢話咩都唔使, 我開心佢就開心.

陳皮冰糖燉檸檬

December 19, 2016, Monday

今早一返到公司.....檯頭收到份禮物

就係呢樣...

即刻忌唔著拆開嚟睇吓, 原來係一樽陳皮冰糖燉檸檬

入面仲有一木匙, 印著四季養生茶館

 

 比個close up 睇吓, 用20年的陳皮新奇士檸檬燉20小時而成, , 功效清熱下火, 化痰止咳, 潤喉養聲...淨係見到呢的都已經心甜

秘書小姐見我條氣管咁耐都仲係有的問題, 送呢樽比我,真的很細心.

多謝哂, 又要請佢食飯先得啦.

 

.

Patch Planter

December 8, 2016, Thursday

放完假返嚟, 真係好忙, 寫blog都寫唔切.

幾天前在公司檯頭收到兩pack東西, 跟著收到公司阿鬼仔嘅email. 叫我地參加種植比賽.  哈哈, 又幾好玩喎.

呢pack野好精緻架, 叫Patch Planter, 中文叫佢紙花盆吧!  係一個國人提倡在自己的廚房裡種植

打開包裝, 有好詳細的說明如何安裝

只要跟著說明書, 好容易就整好

跟著就加泥, 在那圓桐的地方加水

我無時間去買種子, 咁就種吓蔥先啦.

種咗不同品種, 一的白蔥, 一的紅蔥

突然記起上次留起咗一的洛神花種子, 另外整多盆睇吓得唔得先.

 

跟著在上面再加一層嚟.

在盆下面離底有每邊有兩個小孔, 永遠唔會淋太多水, 亦都可以在圓桐內看看夠唔夠水.

雖然家裡後花園已種了不少植物, 但覺得呢個Patch Planters 幾好呀!  由其是家裡沒地方, 只需放在廚房窗台就可以.   有時間去買的種子返嚟, 再種的可以食嘅植物 (哈哈, 睇吓呢個有時間要等到幾時先得)

黑椒花枝丸魚蛋梅麵 + 特辣王

October 8, 2016, Saturday

呢排顧著捉精靈, 星期六日午餐都好少响屋企食, 出開去就食埋先返.

今日唔想出行食, 決定晏的先出去, 摷吓雪櫃有的咩就整的咩

有四海黑椒花枝丸同魚蛋....好就呢兩樣啦.

再摷吓廚櫃, 仲有梅麵....要快的食埋佢啦.

哈哈, 好易煮....餸多過麵呀!

整多碟油菜

仲有飲品大豆鈣思寶

咁嘅午餐, 點都好過出去食吖...

今日仲要介紹呢樽特辣王....都唔記得係邊個送比我.

型爸係咁易用茶匙拎一的出嚟, 呢就係咁多即, 型爸食少少, 即刻唔掂, 馬上打"C Egg", 要即刻飲水. 

我見型爸咁, 即刻唔敢食, 用個魚蛋醮少少試吓, 真係好鬼辣呀!

最終, 都係食唔到,  哈哈, 我地都未試過呀!

下次只可拎好少, 再加少少豉油溝淡的先得呀!

IZUMIO 活美水素水

September 21, 2016, Wednesday

今日組長生日, 佢地一家人出去食晚飯, 差唔多十點幾, 組長夫人問我地賞唔賞面過去飲番杯兼食生日蛋糕....哈哈, 行幾步路就到, 點會唔賞面吖...

 組長生日, 點都要過去同佢慶祝吓

 個芒果拿破崙蛋糕好好味, 的酥皮好脆.
 

 組長又開香檳呀! 又係呢枝名貴香檳

我地帶咗兩包黑毛豬火腿, 用嚟送香檳都好正呀!

 咦, 睇到香檳後面的禮物袋, 組長夫人話買咗一對金的公公婆婆送比組長做生日禮物.

飲完一枝, 組長話再開多一枝,唔好啦...我地明天要返工...哈哈, 跟著佢拎咗兩包飲品出嚟

 我地睇咔係咩...佢話係氫水....氫水, 我地都係第一次聽.

飲落去又好清甜喎! 

 

 睇吓的成份, 標題咩都無, 只係純水加氫

 忍唔著上網睇吓係咩嚟, 原來香港有代理, 以下是 從佢地嘅網頁copy & paste 出嚟:

什麼是含氫水？

氫氣含量高的水被稱為含氫水。
「IZUMIO」中不僅溶存了高濃度的氫氣, 而且保留了礦物質。
在日常生活中補充氫氣變得如此輕鬆簡單。

氫氣 –由於多以水或有機物的形式存在，日常生活中很難感覺到它的存在。
但事實上，它是我們生活中不可或缺的元素之一。
氫氣在人體的比重以重量來劃分的話，是繼氧(65%)，碳(18%)的第三位(10%)。
而且，氧和碳等其他的元素也是基於氫氣而形成，故此氫氣可說是元素之母。 碳水化合物，蛋白質，脂肪等三大營養素也都含有氫氣。特別是碳水化合物(糖質)及脂肪是能轉化為能量的營養素，當這些營養素轉化為能量時，氫氣扮演了很重要的角色。氫氣對生物來說，是息息相關的物質。

 氫氣(Hydrogen)這詞語，起源自希臘文中的『水(hydro)』和『產生(gennao)』。氫氣是和氧氣一起構成水的元素。

 為了使『活美水素水』維持在最佳新鮮狀態、防止雜質混入，充填全程都在無塵的環境下進行，並且採用密封式鋁箔包裝，而升級後的鋁箔包裝比之前多了30%的厚度，完整保存鮮度與純度，隨時都可以享用到鮮味十足的『活美水素水』。

 原本的『活美水素水』，為了去除水中雜質，同時也去除了水中的礦物質，採用純水來製作。然而新『活美水素水』是運用所謂的『脫氣』法，成功地讓水質提升，更保留水中原有的礦物質。

 藉由原水流經中空系膜周圍，將溶於原水中的氧等氣體排除。中空系膜的管壁上開有無數個納米大小﹝納米為10億分之一﹞的孔。氧分子可通過這些孔，但水及礦物質無法通過而保留下來。經過『脫氣』程序後的『活美水素水』，不但健康，也更加順口好喝！

 新『活美水素水』除了『脫氣』外，更採用所謂『膜溶解法』這項最先進的技術來製作。『膜溶解法』適用於人工肺等最先進的醫療技術。而將這項技術運用於飲料水的新『活美水素水』乃是世界上首見的例子。

 其實睇咗咁多, 都係入唔到腦, 總之就係對人體好.

我地問組長幾錢一包, 佢話呢的要四十幾文一包, 不過佢呢的係行家送的.

吓. 四十幾文一包, 只有200ml, 真係好貴呢!

哈哈, 正常無咩事, 都唔會買嚟飲呀!