香草手撕雞

May 10, 2020, Sunday

同二公子佢地食完飯,  我就回家開工.   雖然話係母親節, 我都係要搵的野嚟做, 母親節晚餐自己煮.

今日要焗雞呀!

切碎的蒜蓉加牛油, 用嚟放入雞皮底.  即係由雞肚下面撕開, 慢慢推上去, 放的牛油, 好似推甩層皮咁.

檸檬放入微波爐叮一分鐘, 放入雞腔內

雜香草加紅椒粉加辣椒粉

搽勻在雞皮上, 放文焗盤

先預熱焗爐至250C

放入去焗30分鐘


同場加影, 焗鹹豬手.   隻豬手昨天已用來煲雜菜湯.  放咗入雪櫃一晚, 入爐前用豬插刺孔, 再搽白醋.

一次過焗兩樣, 慳電慳時間

焗好啦, 隻燒雞好靚

切開大腿位已經熟了

我跟手就做埋手撕呢部份.   手撕後唔係好大碟.   試一啖先....唔, 的雞肉好滑, 味道又好...正呀!

至於鹹豬手, 焗起都好靚, 但唔係成隻脆皮, 只有部份脆.  又順手起埋骨.

雞殼同豬手骨, 又可以留番嚟煲湯呀!   食得唔好嘥麻.

慢煮牛扒

Aug 25, 2018,  Saturday

Cindy 今天放假, 晚上只有我同型爸兩個撐檯腳, 今日一於食牛扒啦.   見到枝慢煮棒, 今日又慢煮呀!

我問型爸, 要飲湯或加咩野配菜...佢話唔使飲湯, 唔使配菜....吓淨食... 以佢嘅食量, 淨食要兩塊先夠喉呀!

 呢款係日本的雪花肥牛, 解凍後先用廚紙索乾的水份

 跟著兩面灑上海鹽上及黑胡椒, 再zipper bag

 今日有點錯誤, 預熱水時無測水溫就放咗的牛扒落去, 太心急了.

 到我set 好枝捧, 的水溫由四十幾升到去六十幾度, 用咗好幾分鍾先升到63.5 度

 咁即係煮時間可能耐咗...不過唔整都整咗, 慢煮溫度低, 希望唔好咁大影响

 20分鐘煮完, 外面睇熟哂

將牛扒夾出來用平底鑊大火每面煎了三十秒 (本來要每面煎一分鐘, 我將時間減少).

 煎起睇落好得呀!

 型爸飲Whisky, 我飲梅酒...飲杯!

 的牛肉好得呀!   呢款雪花牛非常有牛味!   型爸比likes 呀!

食完牛扒仲有甜品....

日式芝士蛋糕....哈哈, 梁九記買的, 解凍就食得.

呢餐慢煮都唔算慢, 20分鐘, 絕對接受到呀!   哈哈, 今日覺得枝慢煮棒有用呀!

欖菜肉鬆豆角

April 23, 2017, Sunday

昨天去菜檔, 阿姐係咁叫我幫手要埋兩札豆角, 好啦好啦, 幫妳要埋佢啦.

 豆角唔可以keep得耐, 今日就煮咗佢, 順便教埋Cindy點樣整乾煸四季豆.

的豆角切段, 先用油泡至軟身, 瀝乾油盛起備用

肉碎用少許鹽, 豉油豆粉糖醃好

仲有最重要的欖菜

先爆肉碎, 再加欖菜

將乾煸的豆角回鍋, 欖菜有點鹹, 試味後先再調味.

咁就攪掂啦.   好好味呢!

今餐仲有櫻花蝦蒸水蛋

椒鹽豬扒

三餸

仲有一湯.

又食到飽飽.....點知食完唔到半個小時, 組長佢地話幾個人正在燒烤, 叫我地過去.   好啦好啦, 唔食都過去飲番杯啦.

 去到, 組長將佢燒得好靚嘅的雞全翼比我地食....哈哈哈, 點好意思呀!

龍蝦湯 + 重量級牛扒

August 14, 2015, Friday

星期五晚, 五號屋又整西式快餐....

今日整一件重量級牛扒, 有1.2公斤, 大約45oz.   响大埔Cycon買架.  昨晚已經由冰櫃放去冷藏, 等佢响雪櫃慢慢解凍.

嗰日卒之走咗去荔枝角Ocean Three, 買咗我地覺得好好味嘅龍蝦湯 (嘻嘻, 買咗4樽, HK$130一樽, 加咗HK$2)


樽上面教1:1, 即係一樽湯加一樽Cream....嘩, 肥死咩, 我加咗一杯咋.... 最後再加的XO

 
 跟著焗埋個黑松露pizza

 

跟著整牛扒啦.   呢嚿係帶骨牛扒(帶骨部份只有那個彎位)厚過上次嗰件好多.

 

放落個煎pan, 嚿牛扒仲厚過個煎pan

 

每邊煎分半鐘 

220度預熱焗爐.   焗20分鐘

呢個時候先食頭盤餐湯

美味的龍蝦湯配黑松露pizza

但今日嚿牛扒大厚, 焗20分鐘太生啦.

 

 End cut 都仲可以, 粉紅色

 

但睇吓呢嚿中間太生啦.

屋企食嘅好處就係太生咪切開落鑊煎一煎囉.

呢嚿牛扒好有牛味, 比上次响觀塘買嗰嚿梗好味.

今次45oz, 兩位牛魔王都話好夠啦. 有多唔緊要, 仲有隻流緊口水嘅Loki, 等著我地比的佢食呀!