五號屋的部落: 延遲了的泰國之旅 - Day 1 - 1, 好彩趕得切上飛機....Hotel Aloft Bangkok

2012年3月1日星期四

延遲了的泰國之旅 - Day 1 - 1, 好彩趕得切上飛機....Hotel Aloft Bangkok

2012年3月1日下午2:07公開累積瀏覽 6837 5

February 24, 2011, Friday

平時每年十二月都會去泰國旅行, 但去年泰國水災, 原來訂咗嘅行程, 都取消了. 本來同朋友夫婦一齊去, 今次夾唔到時間, 佢地農曆年前去咗, 我地就趁著農曆年假後無咁忙, 先補番我地嘅行程啦.

昨晚執行理整指甲攪到好夜, 但今早都係好早起身, 整吓呢整吓路, 十點半就出發.... 一開車出門口....呀! 唔記得帶泳衣太陽眼鏡...好彩, 預早咗時間, 即刻返去攞. 點知由石岡去三號幹線條路大塞車, 塞咗十幾分鐘郁都無郁, 唯有調頭走....唉吔, 好心急呀, 又遲咗半個鐘... 幸好跟著一路順利, 十一點九就到達機場, 班機十二點九起飛, 仲有一個鐘, 停車場喺Terminal 2, check in 又係响Terminal 2, 應該夠時間.... 不過一路心急, 真係腎上腺素激增.

Check完in要即刻入immigration, 12:05要到閘口, 都真係有的急...

過咗關心情就好輕鬆啦, 不過嚟到都係12:15分先至開始上機. 哈哈, 型爸眼利, 見到謝四哥同一個女伴同我地搭埋同一班機喎... 不過佢地坐business class, 我地坐economy啫.

呢份就係飛機餐, 咖哩雞同鴨肉飯. 仲有蝦沙律, panna cotta... 不過好唔好食呢...就.....

兩個半鐘頭就到曼谷, 時差關係曼谷慢香港一小時, 兩點四十分就到啦.

出咗機場, 第一時間攞番份update嘅曼谷地圖.

上次嚟搭的士, 有bad experience, 比的司機濫收車資. 我地今次改搭Airport Rail Link. 我地都係第一次咋

唔趕時間, 可以慢慢嚟. 行去Airport Rail Link 都只係十幾分鐘. 咦! 去市區都只係幾個站. 我地去Phaya Thai再轉BTS

Airport Rail LInk由場去Phaya Thai 都只需要45Baht....超抵. 呢個圓碌碌嘅chip 就係入閘用嘅 (深圳地鐵都係用呢的圓chip)

咦, 咩野嚟架... 原本係唔同嘅店舖, offer優惠, 比的遊客攞架.

去到Phaya Thai, 我地轉BTS, 而家先知BTS站設計唔好, 並無電梯或扶手樓梯落. 攞著大件行理都幾麻煩. 幸好我同型爸兩件都係細行型, 入面嘅野都只得一半, 好輕. 佢一個攞兩件行落去.

順手攞張BTS地圖, 不過無咩用, Bangkok地圖好的. 由Phaya Thai去Nana(上網check咗, 我地book嗰間酒店响Nana), 都只不過5個站.

呢兩張係BTS張, 同我地嘅地鐵飛一樣, 又唔係用圓Chip喎

好快就到咗Nana, 嘻嘻, 要型爸拎兩件行理落樓梯.

即刻攞張hotel coupon出嚟睇呀, 35 Sukhumvit Soi 11... ok, 出咗BTS第一條巷就係

唉吔, 行咗一陣都唔見間酒店, 呢間酒店都幾大架, 無理由睇唔到, 問吓人啦... 點知比的泰國人點咗我地入一條巷, 原來嗰到有間酒店, 就係叫Sukhumvit 11, 就係用個街名嚟命名. 嘩! 好多鬼佬住喎, 為三佰幾蚊晚. 不過我同型爸都唔係幾鍾意呢的酒店. 行返出條巷, 行多一陣, 卒之見到間酒店啦.