教!

October 27, 2014, Monday

星期六日連續兩晚無响屋企食晚飯,  昨晚好夜返到屋企, 今日又一早趕著返工, 淨係交帶Cindy煲湯,  今晚放工自己煮, 因為預備教佢幾款最近未煮過嘅餸.   對佢嚟講係新餸, 但對我嚟講都係好容易的家常小菜.

昨天雖然去咗食大閘蟹, 但我用高速煲炆咗清湯牛筋腩.  真係好方便, 牛筋腩汆水, 用凍水涼洗乾淨, 放落高速煲加入清水,滾起炆20分鐘就得啦.   跟著分開兩份放入雪櫃, 的牛腩清湯又分兩份放入雪櫃. 雪凍咗, 煮嘅時候去哂面頭的油就好容易.

今日返嚟用的清湯, 加柱侯醬同蠔油, 加白蘿蔔, 炆到的蘿蔔入哂味就得.  超好味呀!


炆牛筋腩時就釀尖椒, 先放入蒸爐蒸8-10分鍾, 再攞出嚟煎一煎先上碟,鍾意的話又可加個茨汁(我無加)

同一時間切好的茄子, 加上蒜蓉, 同的釀尖椒一齊放入蒸爐蒸.   蒸好再整的甜豉油加上面就得.

Cindy已經煲好雪耳木瓜雞腳湯.

哈哈, 我好快手呀!  大約30分鐘就炆好的柱侯牛筋腩 (預早炆腍的牛筋腩一份份放入雪櫃, 煮時真係快好多架).  而其他兩樣樣餸又差唔多時間煮好.  型爸都食得好快手, 我都未影相, 佢都食咗好多, 咁當然其中部份留起比Cindy.

今餐樣樣都好味呀!  的蒜蓉蒸茄子十分簡單, 但真係好好好好味呀!  掂! (咁樣讚自己都得!)