素炒厘粒

October 17, 2014, Friday

自從上次整咗個三色椒炒什錦, 十分美味, 有點念念不忘, 今日再嚟過.  但今次唔加用, 要整素什錦.   但個名稱都係喜歡兒時嘅稱呼, 炒厘粒.

唔想咁大碟,用咗三色椒每樣半隻, 半隻沙葛加一大條菜甫.  點解多的菜甫, 因為呢樣係整個餸嘅靈魂, 要有菜甫先好食.  但菜甫偏鹹, 最好浸幾個鐘先去咗的鹹味.   咁當然沙葛都好重要, 沙葛又甜又爽脆, 無咗沙葛, 炒起都一樣無咁好味.

跟著拎個免油炸鍋出嚟...哈哈, 整素炒什錦拎個炸鍋出嚟攪咩鬼?

我要嚟氣炸腰果呀!

平時就唔攪咁多啦, 但今晚係Friday night, 明天唔使返工, 心情輕鬆的可以攪吓"花臣".   不過焗腰果都好快啫,  汆水兩三分鐘.  瀝乾水份, 掃點油, 再用免油炸鍋, 用160-180焗15-20分鐘.  一樣合乎我30分鐘內有飯食嘅原則.

炒炒炒炒炒, 炒好加的什錦先加焗好嘅腰果.   哈哈, 型爸最鍾意食腰果, 的腰果焗好, 馬上比佢"試食"咗好多啦.

咁呢餐仲有蒜頭豆豉豆卜蒸排骨

仲有水瓜肉絲蛋花湯

 

今晚二公子要返工, 只得我同型爸, 兩餸一湯夠哂啦.  

其實淨係食碟素炒厘粒,  都夠哂飽啦, 好營養又有益, 好味呀!

呢個素炒什錦, 真係得,迎年整呢個素菜, 又靚又好味.....可惜, 農曆新年好似無沙葛, 只有粉葛.