止咳化痰兼驅寒 - 薑汁川貝冰糖燉雪梨

2012年2月3日下午1:30公開累積瀏覽 372 0

January 29, 2012, Sunday, 年初七人日.

昨天整咗川貝燉雪梨, 食咗都仲有幾聲咳, 咁就諗著繼續燉啦.

早上去咗藥材鋪, 同個老闆兼中醫師傾謁, 佢問我係寒咳定熱咳, 我唔知呀! 咁佢問我係寒底定熱底, 咁我就係超寒底.  佢同我講寒底嘅人唔應該燉雪梨, 燉果皮或薑會好的.

我聽咗返嚟研究吓, 我覺得自己係寒底, 但夜咳應該係虛火唔夠瞓嘅熱咳, 因為喉嚨好乾好唔舒服....咁點好呢....唔.... 一於照燉, 不過加的薑汁落去.

 

今次燉我都改埋方法, 去皮去芯, 淨係燉的梨肉.  因為我覺得原個雪梨燉有的麻煩, 一個燉盅又燉唔哂, 食時又食唔哂的梨肉, 黏著皮嗰的最後都掉哂, 燉起的雪梨水又流咗出梨外.  今次又係燉五個, 先將梨去皮去芯, 用鹽水浸吓, 等佢唔使氧化變色

 

再預備3 湯匙薑汁(其實多少隨意)

將的雪梨放入燉盅排滿底部


放咗三個之後, 加川貝粉, 冰糖, 薑汁.  不需要落水


再將其餘兩個蓋面


加埋三層蓋

 

燉3個鐘.  其實我覺得應該係水滾之後3個鐘, 但係我落熱水開制, 都要差唔多45鐘先至滾(我諗係電子燉盅, 火比較慢), 最終我調到4個鐘

燉好啦, 睇吓有好多梨水出嚟呀!  不過當晚實在太飽, 無法食得落, 原盅留到第二日先食


拌勻之後, 的梨湯變得好濃


食一啖先, 嘩, 好味喎, 加咗的薑, 入喉非常之舒服.

真係估唔到, 食咗之後, 當晚真係無咳, 仲好好瞓添... 使得...明天繼續燉.