梅酒成熟時

April 18, 2014, Friday, 復活節假期

復活節假期開始....真開心呀!

一年時間過得真係快,  記得去年清明過後, 青梅時節, 買咗九磅青梅返嚟浸梅酒, 到今年青梅又出現, 咁快就一年, 亦即是我去年浸嘅梅酒成熟啦.

今晚鄰居有聚會, 可以叫佢地試吓我的梅酒呀!

一陣約咗agent去揀工人姐姐,  出去前攞兩瓶梅酒出嚟 ,  放入雪櫃雪凍佢, 咁幾時飲都得啦.


去年四月二十一日浸, 仲有兩日就一年啦, 呢一大瓶係用白雪15度上撰加冰糖及黑糖浸嘅, 加了黑糖, 顏色比較深色

呢一酲係用九江雙蒸浸, 五月五日浸, 仲有十幾日先夠一年, 哈哈, 無所謂啦, 應該可以飲啦.  呢一酲都係用冰糖+黑糖, 所以顏色都比較深色.

當然兩款都倒的出嚟試吓....嘩, 好味呀!   意料之外, 九江雙蒸浸出嚟嘅梅酒, 更為香濃.  原來用酒蒸度數高的嘅酒浸梅酒, 真係可以令梅味更出來.  九江雙蒸29.5度, 浸起嚟真係唔錯.   另外我仲有一酲用九江三蒸嚟浸, 試飲過, 酒味太烈, 要再浸耐的.  或許遲的倒一瓶出來, 加的蜜糖, 希望酒精度可降低的.

換上呢的闊口瓶, 方便放入雪櫃.  左手面兩瓶用九江雙蒸浸的, 第三瓶係用白雪上撰, 而最右手面淺色的那瓶是用廣東米酒浸,  這一瓶先前已試飲過, 浸了六個月後加了30g蜜糖, 真係好好味呢.   呢一瓶只有400ml, 亦都係唯一一瓶蜂蜜梅酒, 唔夠請人飲, 留番比自己慢慢飲呀! kakakakaka

放入雪櫃門則, 一排四瓶啱啱好, 天氣熱, 飲雪凍了嘅梅酒, 正呀! (流口水中.....)