2014年4月30日 星期三

釀青梅酒 - 2014

April 19, 2014, Saturday, Easter Holiday

 食完火雞胸潛艇三文治, 又係時候要開工啦.

去年釀的梅酒收成了, 又係時候再釀梅酒啦.  

星期四晚去一田超市, 有一個位置專賣日本酒, 我問佢地要的度數高的, 佢介紹我呢款壹岐.

呢款壹岐20度, 嗰位小姐話仲有25度(好似仲有30度), 問我要邊款, 當其時我未買青梅, 去年的酒15度唔夠香, 咁今年買20度試吓啦.   (買枝酒時都未知幾時買青梅, 要放假去街市先可以賣)

星期五去完揀工人, 跟著去大埔街市見到的青梅, 真係唔抵得, 本來HK$20 三磅, 佢減到HK$18 三磅.   去年買了9磅, 今年買夠咗12磅.一年浸一次, 唔介意買多的. (不過最緊要有空瓶及地方存放)

試了用九江雙蒸浸的梅酒十分香, 今年再買九江雙蒸, 點知2.59 L瓶裝竟然全部賣哂(唔係咁多人浸梅酒呀?), 結果我要買最大瓶5.18 L, 好彩有型爸同二公子幫忙, 十二磅梅加5.18L酒呀, 我真係攞唔到呀!

今早先將青梅洗淨瀝乾,  到下午就可以開始動手整啦.  昨天將其中一瓶成熟了的梅酒轉瓶入雪櫃, 騰空了一個2.59L的大瓶, 今日洗淨入焗爐烘乾, 吹涼後馬上可以用.

首先挑去梅蒂, 再在每個梅用牙籤刺幾個孔.  今年的青梅比去年的細小小, 但好靚, 每一個都好實淨, 一個爛都沒有.   不過顧著做唔記得影相呀!

將刺了孔的青梅先入瓶, 加入單晶白冰糖, 今次用白冰糖, 幾個月後, 可以加蜜糖, 到時就係蜂蜜梅酒啦.

最後加入酒就可以啦.

盒壹岐有1.8 L, 加埋梅及糖, 一個2.59L唔夠裝, 我要分兩瓶, 一瓶多的一瓶少的


份量標籤好啦, 我今年將青梅的比例提高, 而糖的份量亦加了少許, 希望浸出來的梅味更濃更香.

壹岐燒酌1.8L 20度梅酒, 攪掂啦.

哈哈, 買咗12磅梅點會得咁少...我仲買咗5.18 L九江雙蒸, 黑糖味都未浸呀!

今次只買了一包太古原蔗黑糖

 好彩上次飲完的阿拉老酒1.5L裝的空瓶無掉咋, 現在大派用場呀!
 
1.5L 容量空瓶, 只可裝800ml 酒, 加500g 青梅, 245g 糖已經1.545, 啱啱好呀!   呢三瓶都加了黑糖


剩餘嘅2600ml九江雙蒸, 加了1500g 青梅, 800g 單晶黃冰糖, label 好就攪掂啦.  呢瓶將會係原味.

九江雙蒸釀製有四大瓶, 再加埋壹岐燒酌釀的, 共六大瓶.  明年將會大豐收呀!

夠未呢?


整咗咁多瓶, 仲有大約1100g青梅剩, 仲可以浸的喎.   心思思想買多一盒壹岐25度, 咁就好理想啦.


3 則留言:

  1. 你好呀,我一直都有睇你嘅Blog,不過無點留言過,因為突然留言好似好怪噤,希望你唔好介意!我對你嘅梅酒好有興趣呀,你介唔介意比個做法及份量我呀?因為我媽咪、家姐都好鍾意飲梅酒,我想試做比佢哋品嚐呀!唔該。

    回覆刪除
  2. 你可以去我個Blog自家醬汁道search 吓, 有幾篇都係講浸梅酒. 我呢一篇都有講做法. 我每一次浸梅酒, 酒, 梅, 糖的份量都有的偏差, 所以無一特定嘅份量. 妳可以試吓我去年浸的比例 1: 0.6 : 0.28 . 浸出嚟都好好味. 即係如果用1,000ml 酒, 用600g青梅, 280 - 300g 糖.

    做法: 青梅買回來洗淨後風乾, 去蒂刺孔. 預備空瓶, 清潔消毒. 空瓶的容量要多過酒的一倍(加梅加糖之後, 只留下少許空間). 先落青梅(刺孔, 可以令梅味更出), 加糖, 最後加酒. 咁就得啦. 浸一段時間後拿出來搖晃一吓等的糖不要全部沉底. 有的人話半年, 有的人話一年先飲得, 我就等咗一年呀!

    試吓浸啦, 其實好容易架.

    我今年將梅及糖的份量提高了少許, 但相差不遠. 每一個label就係份量啦.

    回覆刪除
  3. 多謝你呀,你真好人!我會嚐試去做!

    回覆刪除