2014年4月20日 星期日

五號屋BBQ

April 12, 2014, Saturday 

哈哈, 新年家庭聚會仲未完, 人地話有心唔怕遲十月都係拜年時.  咁而家都只係啱啱過咗清明節啫.   再者, 我住得咁遠, 佢地都嚟, 都算好比面.  

型爸的家庭成員, 各住東南西北, 大嶼山都有, 平時返去奶奶屋企食飯都算地點適中, 但嚟我屋企真係好似去旅行咁.  佢地坐港鐵, 我地開車去接佢地啦.

下午四點幾嚟, 我第一時間焗的蛋撻比佢地食.   用屋企自己個焗爐, 爐溫真係容易控製得多.  200度20分鐘, 的蛋漿升起, 打開個焗爐少少散的熱氣, 等的蛋漿唔好爆開.  一打開焗爐, 香氣四溢, 等佢地流吓口水先.

一出爐就嘩嘩聲啦....外皮香脆, 的蛋仲震吓震吓...好快就KO哂啦.

有野食都有野飲, 整咗青檸什飲

今次仲煲的粟米水添.   平時燒粟米, 好多時都燒到燶哂, 浪費兼無益. 今次我將的粟米連衣(外皮唔靚就掉咗佢) 加水加冰糖煲咗佢.  的粟米水可以飲.

粟米煲好才拿出來切開

的栗米一開三, 好甜呀.   的栗米水仲搶手, 清熱氣又好味, 有三大壺, 好飲過汽水

蕃薯就唔可以煲, 都係用錫紙包好, 放入燒烤爐焗熟比較好味的.

仲預備咗個個都喜歡的蕃薯粟米粥

哈哈, 咁梗係唔會叫人淨係食蕃薯粟米啦.

牛扒

大蝦
兩款雞翼

羊扒
多春魚
入面有的名貴嘅長洲魚蛋, 成HK$80一斤, 係嬸母帶嚟架.  台灣香腸我都買咗兩款

什丸
雞肉腸, 麻辣腸

自家製麵包, 個個都鍾意食蜜糖麵包, 銷量第一呀


開始時個個都用义嚟燒, 到咁上下, 就改用架燒, 可以一次燒多的麻.

我地二十幾人,  結果的野都係食唔哂.   人多, 始終都係燒烤好的, 叫我煮, 點煮兩圍檯嘅野呀!

姪女婿整咗椰汁千層糕嚟, 非常好心機, 整咗十三層.   我覺得佢整得好味過Ruby添呀!  好味!

跟著仲有一大堆生果

 
當然仲有五號屋嘅白果薏米腐竹蛋花糖水啦.

嚟我屋企, 一定要食到飽飽先可以走啦.

咁多人離開都好大陣急, 我們三架車都要開, 型爸仲要走兩轉, 一轉去上水火車站, 一轉去西鐵錦上路.  我同二公子就走一轉錦上路就得啦.

好彩奶奶的工人姐姐同姪仔的工人姐姐都有一齊嚟, 走時全部碗碗碟碟都洗淨啦.   送完佢地返到嚟仲要幫Ruby收拾後園. 

忙咗一天....散哂!



沒有留言:

張貼留言