二公子生日快樂!

September 23, 2014, Tuesday

放工又要急急忙忙回家, 因為今天係二公子的生日.  我明示暗示不如出去食, 型爸見我呢排咁攰都幫口, 但二公子好堅持, 佢話都係响屋企食好的....哈哈, 今勻想懶的都唔得.

一早起身, 將今晚要整嘅食物由冷凍櫃放到冷藏櫃慢慢解凍, 十二個鐘, 時間應該啱啱好.

麵包蟹, 仲係有的冰, 但將蟹一拆開, 蟹凍就快好多.  呢隻蟹細細地, 但蟹蓋塞滿膏呀, 仲好甜美添.

帶子刺身, 攞出嚟仲有微冰, 但用刀一片開就啱食啦.  六隻四個人食, 醮的芥末豉油, 正呀!

 
鵝肝就一定要煎啦.  其實煎時已沒有放油, 但煎好就出好多油.  法國鵝肝, 二公子至愛.

 

今晚其中一樣主打, 三文魚子

  
我其實早上有同Cindy講叫佢煮白飯, 但返到嚟佢無煮都無辦法.   好彩用煲仔煮飯好快啫.  快速咁煮咗一杯米, 煮10分鐘, 焗10分鐘,  到我整好其仔野, 的飯都食得啦.

將一塊紫菜剪一半, 加一湯匙白飯, 再加一匙三文魚子, 一啖放哂落口....真 係 好 美 味 呀 !!!!!!!!

 
平時嘅無飯市民, 今日覺得唔夠飯食添.  250g三文魚子, 全部食哂.

最係係煎日和牛.   哈哈因為大家都食咗三文魚籽飯, 最後食咗三塊和牛就已經食唔落啦.

我今年實在太忙, 都無整二公子最喜愛的New York Cheese Cake.   二公子的女朋友買來三件Cheese Cake

另加一件芝士味的mouse cake.  

不過實在太飽, 我地分咗一件比Cindy, 我地每人食半件, 再留起一件.  (講真, 我整嘅cheese cake, 好味過呢的好多啦).  

二公子好滿意今晚嘅晚餐呀!  不過食完之後, 十點幾佢要去上班, 今晚返晚班, 又要捱通宵呀!

有時間都要整吓New York Cheese Cake 先至得, 好耐無整, 生疏哂啦.

放工後的七手八臂

September 22, 2014, Monday

Cindy來了超過兩個星期, 越來越覺得她對煮食無興趣, 每次都要我講她才動手, 所以呢陣子佢都只係幫廚, 我放工回來就好像七手八臂一樣, 盡量在30-40分鐘內煮好哂有飯吃.


焗豉油皇辣雞翼.  雞翼先要Cindy醃好, 我返到屋企, 即預熱焗爐, 跟著入爐, 每邊焗15分鐘.  其實好易, 但佢都仲係傻吓傻吓咁望著我做.

 
西蘭花帶子.  西蘭花又係叫佢焯幾分鐘至半熟, 我回來就切帶子, 炒至半熟, 再回鑊炒菜, 最後打個玻璃茨.


芝士雞蛋薯餅.  薯仔又係叫Cindy煲腍壓成蓉, 我回來調味, 加蔥粒, 加芝士饀, 醮蛋液煎成薯餅.


鹹蛋白冬瓜肉片湯, 呢個湯只要滾半個鐘就得.   昨天整黃金蝦用咗兩個鹹蛋黃, 剩低嘅鹹蛋白今日用嚟滾湯.

三餸一湯, 只要安排好, 其實真係好快就有得食.

雖然Cindy係識的英文, 但其實唔係真係好叻, 好多時我都覺得佢唔明, 所以我講完, 佢都仲係傻下傻下咁望著我.  唯有用最大的耐性去對待.

雖然煮嘅餸無咩難道, 但有幫廚總好過無人幫手, 最緊要有人洗碗已經好好.

漁屋日本料理

September 22, 2014, Monday

寶勒巷有好多家日本餐廳, 競爭都好大.   本來今日諗著去金田, 但到樓下見到個menu唔係咁啱食, 結果決定去漁屋.

 
漁屋响一樓泰國餐廳對面, 而金田喺三樓, 競爭真係好大.  所以呢附近午市嘅價錢, 大家都好接近.

 
平時日本餐廳午市都以定食為主, 漁屋都唔例外, 但選擇好多.   我揀咗平時好多日本餐廳午市都無供應嘅鍋物定食, 價錢只係HK$52

 
築地鍋立魚鍋, 轉咗地獄湯底

 
好好味呀,的湯少少辣, 的豆腐好滑, 覺得呢個鍋健康的無咁多肉.

麻煩鬼同事要咗壽司配麵豉湯烏冬...佢鐘意食烏冬, 但唔鍾意個湯底.   哈哈, 咁梗係無我個地獄湯底咁惹味啦.

 
慢麼麼同事加十元要了海蝦壽司三件(都真係好抵食)

另外叫了鯖魚定食, 呢個鯖魚定食好似HK$42, 比別家平, 但鯖魚有三件, 魚又比人家多.  不過食落我覺得的魚好腥. 加埋三件海蝦壽司, 都只係HK$52.

如果無記錯, 今餐三份午餐都係HK$52一份...抵食.

以前比較鍾情金田多的, 可能而家開始有所轉變啦.

XO醬鹹酸菜炒什錦海鮮

September 21, 2014, Sunday

星期天, 煮晚飯輕鬆一點, 唔使好似平日早上出門上班前, 要諗定晚上食咩.  下午執雪櫃見仲有半包急凍什錦海鮮, 今日就清咗佢.

下午浸咗的鹹酸菜, 晚上煮時, 搾乾的水份, 再用白鑊加糖烘乾.

用蒜蓉起鑊爆吓的什錦海鮮.   跟著推開的海鮮, 再爆香的辣椒及XO醬

兜炒再將的鹹酸菜回鑊, 加個茨汁再兜炒

咁就攪擔啦.  呢個菜非常惹味, 仲好送飯添.

今餐仲有豉油皇黑椒豬扒

黃金蝦

加個粟米紅蘿蔔薯仔魚湯.

三餸一湯,哈哈, 不過唔記得影大合照添.

極黑豚煙豬腩炒稻庭扁烏冬

September 21, 2014, Sunday

星期日下午, 今日又教Cindy炒烏冬

上次去超市買咗壽桃牌出品家庭裝稻庭扁烏冬

 
一袋入面有六包, 見唔係咁大包, 一次過煮哂.


用我嘅方法, 唔使煲, 只係用熱滾水弄鬆的麵, 順便去一去包裝烏冬有時有嘅酸酸地味.  弄鬆之後再瀝乾水份

 
今日嘅配料係美國出品嘅極黑煙豬腩


睇落都幾靚, 跟手將煙豬腩爆香

 
另外再加韮菜花同洋蔥, 為咗要靚的, 的花我剪哂, 尾部老咗嘅又唔要, 一紮半韮菜花所剩無幾.

蒜頭起鑊先爆香的韮菜花同洋蔥

加鳥冬加調味, 再將煙豬腩回鑊兜炒.

 
炒起幾靚仔, 仲幾好味添.

一大碟五個人食.  Cindy真係好開胃, 六個烏冬嘅份量, 佢應該食咗兩份, 多個型爸同二公子.  佢話緬甸無食過烏冬呀!

我話食多的無問題, 覺得好味就要學識點煮.

生昌潮州海鮮酒家

September 20, 2014, Saturday

二公子去咗五日旅行, 出發嗰日打八號風球, 無得call的士, 攪到型爸早上五點冒著風雨送佢去機埸, 好彩有準時去咋, 班機好準時, 早上八時零五分就起飛啦.   攪到我鬼咁擔心, 唉, 做父母就係咁.

今日返嚟, 一早whatsapp, 又氹型爸去接佢...哈哈, 型爸又點會唔接吖, 仲諗埋去邊食晚飯添.

 

好耐無嚟過生昌, 本來諗著打電話訂位, 點知佢地話訂位要食套餐, 唔食套餐無得訂, 到時搵位.  哈哈, 真巴敝.   我地五點幾接咗二公子, 嚟到都只係六點鬆的, 有位, 唔使等.

 

無叫凍蟹, 哈哈, 又係遷就二公子, 食龍蝦

 
的螄蛤好鮮甜呀!

 
要咗鹽焗烏頭, 條魚有黃油

 
仲條條都有label.  條魚靚, 不過鹽焗之後凍食, 的肉都係好嚡.

 
方魚肉碎蠔仔粥

滷水鵝肝

 
煎蠔餅

七點幾就食完, 埋單六百七十幾, 二公子爭著請呀!  大個仔啦.

食完返到屋企, Loki見到二公子, 係咁撲埋去錫佢, 幾日無見二公子, Loki好掛著佢呀!

食完返到屋企, 又收到Whatsapp, 鄰居又叫餐後小聚

大家高高興興吹吹水

今次又請我地食朱古力, 呢盒朱古力唔少野呀,四種味道, 由最少嗰款開始順時針食, 每款味道不同.  咁我問點解第一款咁少嘅, 主人家話個個由第一款食起, 但有時講講吓食咗一粒兩粒就唔道得食哂四款...哈哈, 真攪鬼.

今晚唔使煮飯, 出去食完飯返嚟又可以飲吓野輕鬆一下...開心!

Cindy好似仲開心, 佢都唔使煮又唔使洗添.