五號屋的部落

2012年4月25日星期三

蛋白花雕蒸花蟹..... 送蒸熟肉手半份

2012年4月25日下午2:28公開累積瀏覽 472 5

April 21, 2011, Saturday Night

先幾日睇報紙, 有個recipe整蛋白花雕蒸蟹, 好想整比型爸食呀!. 今晚二公子去街, 得我兩公婆撐檯腳, 啱哂, 因為二公子唔鍾意食蟹(大閘蟹羔除外)

去咗大埔街市, 買咗隻花蟹, 呢隻蟹要hk$120, 我問海解檔小姐點解咁貴, 佢話無法啦, 比的國內人搶貴哂.
買咗返嚟自己劏, 我劏蟹ok架, 洗淨切件, 再砌番個蟹型. 加片薑, 放入鑊大火蒸5分鐘. 先將蟹水倒起.

呢的就係蒸蟹水, 臨食前加兩茶匙紹酒.

120溫水, 加入半茶匙鹽, 1/3 茶匙雞粉

四個蛋白(大約又係120g)

加入已調味之溫水拌勻

再倒落已蒸5分鐘之蟹

原recipe教多蒸2分鐘, 但係唔得嘅, 的蛋白未凝固....(此時發生家局意外, 客後再說...)

我再蒸多幾分鐘, 的蛋白凝固就ok啦

再倒入加咗兩茶匙紹酒嘅蒸蟹汁...好香呀!

呢碟蟹真係好味, 真係連汁都撈埋....不過我隻玉手就......

唉! 都係關搵唔啱隻碟事.... 我本來想搵隻圓碟, 窩窩地, 放得落隻蟹, 又可以加的蛋白响碟底蒸. 發覺隻方碟幾啱喎, 咁就用啦, 點知隻鑊蓋唔夠大, 我就用個大嘅鋁盤反轉做蓋, 真係ok呀! 不過打開蓋時, 唔少心, 的蒸氣從鑊邊湧出嚟..... 就係一兩秒啫, 我隻"肉手"前腕就中招啦.....

中咗招即時有的痛, 隻手變咗粉紅色... 即時聽Ruby講, 用的牙膏搽落去....真係冰涼舒服好多....咁就繼續整埋的餸, 食完飯先處理啦.

食完飯上房, 將的牙膏洗去, 嘩, 一洗去的牙膏, 一掂水, 傷口就好痛, 睇著的水泡標出嚟, 本來兩三個細水泡

最後中間部位, 起咗一個大水泡, 仲越嚟越痛, 搽保膚靈....不過係無用嘅....越嚟越痛.. 個水泡好似越漲越大, 我見唔對路, 搵支針消毒, 刺穿中間個大水泡, 再刺穿兩個小水泡, 刺穿後就無痛得咁緊要. 但中間個大水泡好似會從生咁, 如是者我整穿佢幾次先至唔再漲大.

陶爸佢地過嚟飲酒見到, 叫我用的雙飛人藥水搽吓再消毒, 咁就試吓啦. 屋企有雙飛人藥水, 拎出嚟試吓. 搽落去都有的舒緩, 不過的藥水好快乾, 乾咗又痛, 痛又搽...唉... 都要瞓覺.

第二朝出去時, 都繼續搽雙飛人, 但係唔敢用紗布包著, 驚整穿的皮會好痛. 去到超市買鮮奶, 嗰位promote 姐姐見到我隻手, 你快的去買支破痛油啦, 搽咗會舒服好多架....咦! 破痛油, 上次我燙傷手指, 同事攞過返嚟比我用, 用完我還返比佢, 但自己就無買支嚟看門口. 去完supermarket, 即刻去藥房買先.

細細支, 膠樽裝, hk$27. 寫明燙火灼傷, 止血快止痛速 , 即刻攞嚟用啦.

搽落去又真係舒服的, 無咁痛(一的都唔痛就假嘅, 嗚嗚...隻手又紅又腫), 因為係油劑, 搽落的皮膚到就無咁乾. 但係就無咗的刺心之痛. 相比起, 呢支hk$27嘅破痛油, 比起個樽幾佰蚊嘅保膚靈, 好似好的喎.

星期一返工, 因為要打字, 唔用紗布包著唔得, 隻手壓落張檯, 掂到傷口好痛. 一包紗布, 雖然搽咗油, 但係黐著的皮, 的皮一穿, 好鬼痛呀......

今次個傷口好似心形咁, 真係"有心". 唉, 呢次唔知一個月攪唔攪得掂

2012年4月24日星期二

金葉餐廳酒廓

2012年4月24日下午2:50公開累積瀏覽 188 0

April 20, 2012, Friday night

型爸打電話嚟, 唔想返屋企食飯(kakakaka, 唔知係咪呢排Ruby煮的餸大退步呢?), 咁好啦, 出去食就出去食啦.

去邊道食好呢, 我地經過八鄉時, 見到有一間餐廳, 好似有人唱歌架, 不如去試吓啦. 型爸話好呀!

就係呢間金葉餐廳酒廊, 喺元朗八鄉上村三號, 近上大冒山嗰個路口

落好大雨呀! 車駛入去泊車嘅地方就見到餐廳好大個招牌

入門口有個牌寫著所提供嘅晚餐. 後來睇餐牌, 原來同出面個牌係一樣架.

我地去到七點幾, 無咩人喎, 其真地方都算大, 仲可以坐喺出面. 另外一個corner就係演唱嘅地方

餐湯嚟啦, 我要羅宋湯, 型爸二公子要忌廉湯, 配多士一塊

我要咗豬手餐, 問過係咪脆皮豬手先叫架. 好大隻呀! 不過的皮唔係全部脆, 配意粉. 味道ok, 但我要分咗一大半比型爸同二公子呀.

二公子要黑椒牛仔骨, 配飯, 味道ok喎

型爸叫嘅焗羊膝, 配飯. 但係呢份的味道就麻麻啦.

餐後有甜品及咖啡菜, 我要檸蜜要加hk$5. 呢個係Lemon 芝士cake, 不過芝士味就無咩啦.

呢道的野食麻麻地啦, 唔係好差又唔係好好, 算係舊式餐廳. 每位最低消費hk$80. 我地埋單hk$448.

原來呢間餐廳逄星期六晚上八點型九點四十五分有歌星獻唱, 星期日, 二, 三, 四, 五由晚上八點至十一點半就係自由唱, 即係有人伴奏, 上台唱live呀!

唔怪得之差唔多八點, 就多咗好幾檯人. 而且嗰的全部係熟客, 預備嚟唱歌架.

哈哈, 我地都唔執輸, 見人上去唱我咁高興, 我地都上去玩吓. 不過唔啱二公子啦, 年輕人, 邊會唱呢的老餅歌吖. 咁唱咗兩個round我地就走啦. 都係九點幾, 二公子話要返屋企睇電視拳王呀! 王浩賢做嘅年輕人角色, 真係好反映部份年輕人嘅態度呀!

2012年4月23日星期一

潮客 - 上水店

2012年4月23日下午12:58公開累積瀏覽 3 0

April 19, 2012, Thursday Night

今晚我地出街食飯呀! 型爸上次同個裝修師傅去食過個烤魚鍋, 佢帶我同二公子今日去試吓!

去到係上水廣場五樓, 咦, 係酒樓嚟喎, 叫潮客, 咁咪食潮州菜....等我仲諗... 烤魚...唔係grill fish咩, 以為係西餐添

上到去坐低, 二公子話, 嗰個小朋友咁似陶陶嘅, 睇真, 真係陶陶嚟架. 陶爸,陶媽, 陶妹, 陶公, 陶婆, 陶爺, 陶麻, 連工人姐姐, 全部係道, 真係齊人啦! 咁啱都有嘅. 佢地叫我地坐低一齊食, 梗係唔好啦. 邊好意思呀!

睇吓的menu先, 原來呢間係聯邦酒樓集團旗下一間食肆.

有的唔同嘅套餐, 都算抵食喎

仲有其他小菜, 潮州同客家餸菜, 咁下次想打冷, 嚟呢道咪得囉. 價錢比嗰間華記貴少少, 但係地方好好多...不過最緊要係好食.

原來型爸就係講呢款烤魚鍋, 吓潮爆, 真係咁潮? 啊, 剛剛見到陶爸佢地叫咗一鍋, 好似有酸菜, 不過唔辣嘅.

我地叫咗個客家炸豬大腸, 都ok喎

魚湯浸翡翠苗, 個魚湯好清, 好味但一的都唔鹹

我地叫咗一個辣烤魚鍋, 想叫小邊(hk$98), 佢地話全部賣哂, 只剩吓一個大邊(hk$118). 全魚都無啦(hk$198. 其實只得我同型爸食, 的鯇魚有骨, 二公子一定唔like.
不過無小邊, 大邊都要啦. 初時驚佢太辣, 叫咗小辣, 點知嚟到唔夠辣, 後來要佢地加辣. 佢地都係攞的辣椒油比我地加落去.