早上6:45 起床, 7:30 約咗朋友太太响餐廳食早餐
落到餐廳因為早無咩人, 可以周圍影相...呢間餐廳setup 簡單而優雅, 全部的餐具都以白色為主, 感覺好乾淨. 的waiter/waitress, 全部都係著白衫白褲嘅年青人.
响呢道食早餐, 感覺好舒服, 呢道的食物都係簡潔為主, 每樣都係擺小量, 每次refill都好快. 每個客人都可揀一個主食, 其他就可以隨便出去攞. 覺得的食物好乾淨健康, 食得好愉快.
呢個係主食嘅餐牌
朋友主食揀咗Waffles
我就揀咗French Toast, 呢三碟就係我嘅早餐嘞. 食完我地就出發啦.
由酒店坐的士去cooking school都係好近, 大約10-15分鐘車程, 間學校好近surasak station.
8:45分前, 我地就嚟到呢間Blue Elephant Cooking School. 聽聞呢間Cooking School同埋Restaurant, 响Bangkok都好似幾出名.
入面裝修都比較古樸. 我地呢班有六個人, 有兩個美國黑人(一男一女), 兩個台灣女士加埋我地兩個香港女士.
一日開始, 唔係教我地烹飪, 而係每人派一張BTS ticket, 跟著帶我地坐一個站, 由Surasa 去Saphan Taksin去行泰國街市.
行街市都係咁, 不過嗰道有好多菜, 我地香港街市都好似未見過. 其中一張肉檯放咗成隻唔知咩, 牛又無咁細, 羊又好似無咁大. 我地估應該係羊, 無理由係狗架... 見到佢地用洛神花整咗的凍飲嚟賣, 佢地煮野食嘅香料亦有好多.
去到雜貨店, 又忍唔住買咗的野...
呢個人企到咁高做咩野, 原來佢响到打椰子, 嗰部機係用嚟將的椰子磨成椰絲.
個廚師請我地飲凍咖啡, 啱啱食完早餐我都唔想飲, 淨係叫朋友比我試一啖. 鍾意飲咖啡嘅我就會失望, 似阿華田咖啡多的.
自助洗衣都有, 不過係咁樣嘅.
見到的串燒青椒同蔥頭都幾得意, 但個肚仲飽, 無買嚟試. 响街市打咗個round就坐BTS回學校.
返到去就開始教我地煮第一道菜 Massaman Curry Chicken 紅咖哩雞.
所有香料配料已經預備好哂, 佢地教我地將的材料切碎, 落白鑊烘香, 再放落盅內用人手搥成蓉, 嘩, 好鬼攰架.
Massaman Curry Paste 整好啦, 整起都幾香.
都問埋佢點整綠咖哩同黃咖哩, 佢話綠咖哩改用青椒, 而黃咖哩改用黃薑.
跟著就教我地起鑊, 炒香的咖哩醬, 落椰奶, 落雞肉加調味(棕櫚糖, 魚露, 羅望子汁),加薯仔(奇怪, 佢地薯仔唔使煎或炸就放落去), 肉桂, 月桂葉.
呢份係廚師煮嘅, 比我地試食.
跟著我地就行過隔離廚房, 佢地已經準備好哂的材料等我地煮.
呢碟就係我整架嘞, 係咪似模似樣呢.
跟著下一道菜就係蟹肉春卷(Stuffed Crab Meat Spring Rolls), 佢地整完比我地試食, 但唔記得影相.
呢幾條就係我整架嘞.
跟著下一道菜就係Stir-fried Prawns with Thai Roasted chili Paste 泰式炒蝦.
呢碟廚師整嘅
呢碟係我整嘅
最後一味係Spicy Green Mango Salad with Crispy Fish, 辣汁炸魚.
呢碟係廚師整
呢碟係我整嘅, 不過唔係幾開心, 佢地炸定哂的魚比我地, 煮嘅時候已經凍哂, 點會好食.
我地留响餐廳食番我地自己煮嘅餸, cooking school 已經叫waiter幫我地set好哂的位. 我地梗係邀請埋我地另一半嚟做試食嘉賓啦.
呢四碟就係我煮架嘞, 好彩型爸嚟幫手食咋, 唔係都唔知點食得哂. 另外嗰四位學生就要自己食哂一份, 嗰位黑人男士好大隻, 不過佢地都食唔哂.
個waiter用個籮攞的飯嚟, 好盞鬼, 一邊白米, 一邊紅米.
食完仲送我地一份雪糕.....好夠呀!
其實我地煮嘅餸一定唔會差, 因為佢地已經量好份量, 相差嘅只係火侯. 嗰位黑人男士好勁, 每次都係佢最快煮好, 佢可以好快用大火嚟炒, 我地就唔敢, 驚燶. 基本上佢應該係煮慣餸, 覺得佢可能係廚師, 學完返美國煮泰菜.
食飽飽之後又要去做正經野啦, 就係去Wat Paknam拜神.
我地都嚟咗好多年啦, 以前常常都係住响近河嘅酒店, 方便坐船(yellow tail)過嚟呢間河口廟. 呢幾年每次都住唔同酒店, 改坐的士嚟, 仲平的添. 呢間廟經多年修建, 再擴建, 而家又大又靚.
拜完神, 朋友太太想出Siam買野, 型爸唔係好鍾意shopping, 我地都係決定去按摩, 我地分開各做自己喜歡的節目, 相約朋友晚上7:30 响餐廳見.
今次我同型爸, 改去Sukhumvit 55 Thonglor 嗰間店, 點知去到佢地話fully booked, 要個半小時先有位, 咁我地叫佢地打去Sukhumvit 31 Sawadee Shop 睇吓嗰邊有無位, 有, 我同型爸即刻坐的士去, 點知司機又唔識路, 攪咗成45分鐘先去到, 唉.. 都無辨法.
晚上同朋友約咗响呢間叫布吉市的餐廳見面. 雜誌介紹過, 話呢道係泰南菜. 右手面那位美女就係老闆娘嘞.
朋友未到, 我地叫咗個蒸魚蛋食著先, 味道非常一般, 無咩味, 都係要醮汁先有的味.
叫waitress介紹, 叫咗幾碟唔同菜式.
炸魚餅, 又係一般, 唔覺得好食
福建麵, 又係麻麻
咖哩米粉, 但係的配菜全部都係凍嘅, 個咖哩汁就幾好味
泰式炒菜, 又係麻麻
最緊要就係呢一碟, 中間嗰的辣蝦魷魚, 真係辣到叫, 我都算頗食得辣, 但係呢碟完全攪唔掂, 食咗少少(都幾勉強), 要不斷飲冰水凍著條脷, 跟著聲音開始沙, 嘩! 真係辣得緊要, 我地食唔倒.
雖然的野唔係咁啱食, 都同老闆娘影番幾張相. 老闆娘想要嗰張剪報, 朋友送咗比佢, 老闆娘打咗個九折比我地.
食飽唔想即刻坐車, 沿路行出去Thong Lo車站. 見到對面有好多大排檔, 又走去貢吓... 奇實頭先嗰餐, 大家都無食飽, 唔係好啱食.
結果又去幫襯咗呢間生滾粥檔, 哈哈, 都係第一次响泰國見到生滾粥檔. 好奇怪, 的粥咁熱, 佢地都係用膠袋嚟打包做外賣.
叫咗碗海鮮什錦粥, 不過的粥底杰咗的
跟著見到對面一檔整芒果糯米飯, 睇落好靚, 又打包一盒.
跟著坐的士返酒店. 盒芒果糯米飯型爸唔肯幫手, 我真係食唔哂, 唯有食咗的芒果(超好味, 又夠甜), 食咗少少糯米飯, 其他唯有掉咗佢, 唉! 無法, 太飽, 嘥咗的飯添.
今天好充實, 食飽要休息啦, 明天要去翟道翟....有排行呀!
沒有留言:
張貼留言