鄉村藝術館餐廳

2010年11月16日下午12:47公開累積瀏覽 60 0

打完練習場沿路開入大尾督, 睇吓去邊間食, 真係人多車多, 想搵地方泊位都好難.

後來去到呢間鄉村藝術館, 見佢地有位泊車, 就入去幫襯.

初初真係唔知呢間餐廳叫鄉村藝術館.

呢張檯墊好似幾容易清潔

今日嘅lunch special

蒜蓉包

我揀咗南瓜忌廉湯, 味道都ok

陶爸&型爸揀咗羅宋湯
我地分別叫咗三款唔同午餐share嚟食.

蒜蓉橄欖墨魚仔鮮蝦炒飯, 味道幾好, 但portion 好細, 每人得三四匙羹飯.

咸牛脷牛仔骨煙肉白菌汁飯.  portion又係好細, 的飯少到得四湯匙, 我都無食, 比型爸陶爸分咗佢.   的牛仔骨醃得好鹹, 唔好味

蒜蓉西冷牛扒, 的意粉都係好少.  的牛扒醃味又係奇差, 真係唔得.

我問過佢係咩野咖啡先至叫, 但呢度的咖啡又係唔得.
型爸仲叫咗個木槺布甸, 原價hk$56, 跟餐半價(啅頭兼搵笨).  呢個甜簡直可以叫唔合格, 不過型爸一定要食, 因佢每次去澳門食萄菜都叫木槺布甸, 佢覺得嗰間餐廳整得好食.   不過佢今次食到"寧寧頭". 可惜唔記得影相.

臨走影番張壁畫牆, 只可以影一部份因入面有其他客人, 唔可以影埋入鏡.

呢張就係個幅壁畫全圖, 餐廳比客人可以自取呢張水彩紙.

對呢道的食物有的失望, 下次要再搵第二間.

Ruby整的Cranberry香蕉蛋糕

2010年11月13日下午2:55公開累積瀏覽 188 0                    

屋企嗰幾隻香蕉熟哂出梅花點, 又想整香蕉蛋糕, 但呢排真係好唔得閒, 又唔想咁夜返到嚟先開爐整蛋糕.  Ruby同我講, 不如比佢試吓整啦.  諗吓都好, 唔使嘥咗的蕉.

搵咗基絲汀嗰個好容易整嘅香蕉蛋糕recipe, 連打蛋器都唔使用.   我用廣東話&英文口述, 叫Ruby用印尼文寫低個做法.

 

材料:   熟透的香蕉3隻 (用匙羹壓爛), 雞蛋1隻(打散), 牛油1/3杯(先行融化),糖3/4 杯,雲呢拿香油1茶匙 , 蘇打粉1茶匙,麵粉1-1/2杯,鹽少許

 

Preheat Oven 175C

 

用木匙羹先把融化了的牛油加入壓爛的香蕉蓉中。混入糖，打散的蛋汁和雲呢拿, 再灑下蘇打粉和鹽, 拌勻。分三次篩入麵粉，拌勻至沒有粒狀物。最後加入Cranberry拌勻.

將焗盤掃上油, 倒入粉漿焗1小時. 出爐放架上待涼.

哈哈哈! 呢個就係佢嘅製成品啦. 
我之前做過, 好好架, 又好味, 點解會攪成咁架? 

不過無論如何都要支持吓佢,  攞的出嚟試吓, 但真係攞唔起一嚿, 散哂, 唯有慢慢攞起一堆.  試吓, 味道都唔錯, 淨係個買相十分差.

Anyway, Good try la, 咁主動學整蛋糕, 不過今次佢自己要包底食哂佢, 哈哈哈!

橄欖油蒜蓉香茜醬

2010年11月13日下午3:40公開累積瀏覽 359 0

教Ruby整香蕉蛋糕時, 焗蛋糕, 順便幫我焗多幾個蒜頭, 今次改用橄欖油整香茜蒜蓉醬.

Parsley & Extra Virgin Olive Oil + 鹽少許

蒜頭三個, 連衣入焗爐焗30-40分鍾, 去衣, 放入攪拌機, 加入3-4茶匙橄欖油(多少隨意), 再加入香茜&少許鹽打成醬狀.

入瓶

今次的蒜頭無焗得過熟, 打起嚟都好似多的咁.

用咗好少時間, 又一樽自家醬啦.

呢樽醬真係好健康, 不過無落牛油就真係無咁香.   睇吓自己要的咩囉....

漁米粥晚膳

2010年11月9日下午2:57公開累積瀏覽 52 0                    

呢間漁米粥話會再返嚟幫襯, 點知第二日就真係返嚟幫襯, 因為非常就近我地做針灸嘅地方.  晚上同幾位朋友, 一行6人食晚飯.

昨日下午嚟食晏, 好多空檯, 個侍應仲話有一邊唔想開比我地坐.  點知今日嚟到, 幾十人响到等位, 晚飯真係爆哂棚.
差不多等了二三十分鐘, 初時比張細檯我地, 但張檯太細(張檯只可以坐四人), 唯有唔要, 寧願等多陣, 要一張8-10 人檯.
卒之有位啦... 一位朋友打開個菜牌好興奮, 話要揸主意叫餸, 咁當然好啦.

我地叫咗好多餸呀!

呢個湯好好味, 虫草花天麻炖野生水鴨.  的湯渣除咗有水鴨, 還有雞同豬肉, 唔怪得知咁甜.

鄉村蒸肉餅, 第一碟嚟, 個個都有的餓, 呢碟好快就食哂.

豬油渣炒菜心, 的菜心好靚, 但呢種炒法好油膩.

家鄉煎釀鯪魚.  普通, 唔覺特別好味.

銅盤鹽焗雞腎, 爽口惹味, 又係好油膩

虎皮尖椒炆黃牛什, 好味但油膩

沙薑炒爽肚, 好味, 但又係內臟...

銅盤鹽焗雞, 好味, 點解碟碟都咁多油架.

豉椒炒蜆.  送到嚟好似唔係好夠熱, 麻麻.

清蒸鹹三泥.  順德特產, 背的肉唔係好鹹, 但食肚腩部份都幾鹹.  但其他朋友都覺得好味.

辣豆醬炒通菜,  朋友食到有沙, 要求取消唔要, 不過見咁多油都好驚.

改叫咗上湯浸韮杞.  上湯面都係有好多油.

叫到一檯都係, 好豐富呀.  留意吓個轉盤, 設計得幾好, 中空位置有電鍋, 隨時加個鍋可打邊爐.

型爸最後叫咗個甜品, 紅豆綠茶煎薄撐, 一客六件, 但有的朋友唔食甜品, 剩咗一件.  我食咗一嚿試吓, 都幾好味.

埋單約港幣880,  朋友請客, 多謝哂! 如果的餸無咁油膩就更加好.

三棟屋博物館

2010年11月9日下午1:39公開累積瀏覽 79 0

星期日, 今天十分忙碌, 時間已經安排得密麻麻. 

一早帶備餸菜出去探媽媽, 比媽媽食吓我家嘅住家湯&菜.  
跟著約了朋友到荃灣辦點事.   辦完事經過三棟屋博物館.

哈哈! 我真係"背", 聽就聽得多, 但一次都未去過呢道.

去到門口, 見到有兩個師傅响到整火龍, 將一段段連接起來.

另外有工作人員在整理地方.  背後有個三棟屋布景板, 今晚應該有function.

門口有個大缸, 睇番張brochure, 原來大門兩邊都有棵樹同一個大缸, 唔知以前用嚟裝咩野呢.

入去之前, 攞咗呢張簡介

我影咗好幾張相, 每個房間, 都係閣樓式設計, 分上下兩層.   呢個設計, 都幾識利用地方, 但每個房間, 都唔係好大, 間間都差唔多size.

一條長巷, 排了一間間屋, 加埋加埋, 都有好多個房間.  不過點解間間房都好似無窗嘅?  地方頗大, 但唔覺似粵語殘片嗰的豪門大戶人家嘅裝修.

廚房, 仲放咗個灶君响道.  廚房嘅面積都係好細.
入去周圍行了一圈, 好快就出番嚟.

行完出嚟, 見到條火龍已經做好.

離開時, 經過三棟屋花園到綠揚新村攞車, 我地架車泊咗响停車場.

咁偶然嘅機會去睇咗呢個三棟屋博物館都幾開心.