東海酒家一心滿足御蟹宴

2012年12月8日下午12:36公開累積瀏覽 335 2

Dec 6, 2012, Thursday Night

水尾啦...水尾啦.... 

突然好想食大閘蟹, 今年食過兩次, 但未去東海食過, 心思思, 今日就同型爸去東海食大閘蟹餐.

去到東海(The One店), 唔知係咪好早, 六點幾唔夠七點, 大堂無咩客, 近窗嘅海境位就差唔多滿....哈, 去年同型爸嚟, 都係坐咁上下位置.

有驚喜, 竟然減咗價, 有八折, 每位HK$298...唔使諗, 一定叫呢款, 因為有蟹粉小籠包同蟹粉蒜蓉包.

今日嘅小食係炸蝦片


落咗單啦.

覺得好親切嘅食蟹用具

花膠燉桃脂, 都唔知係咩, 原來係花膠燉冬菰(唔怪得唔用呢個名), 入面仲有雪蛤膏, 好清甜喎

蟹粉小籠包嚟啦, 每人有兩隻...開心.

睇吓幾正

第一隻蟹嚟啦, 唔係好大隻, 四兩道啦.

蟹公, 的蟹膏好正喎, "杰"到笠口, 即係無餓瘦喎.  好味

攞咗呢塊至陰至寒嘅星形蟹心先

第二隻蟹嚟啦, 呢兩隻大的喎, 起碼有五兩喎.

我呢隻蟹膏無之前嗰隻咁"杰", 但都鮮甜.  型爸話佢嗰隻都好靚...記著攞塊星形心出嚟呀!

食完蟹督到蟹粉蒜蓉包

罪惡的生拆蟹粉

香脆蒜蓉包

加的蟹粉喺上面...好正呀!

第二塊...不過我開始頂唔著要分一半比型爸

最清係呢碟白焯菜心

跟著每人一小煲臘味蒸飯

雖然迷你, 但應該都有碗幾.

加的甜豉油...不過我食唔到啦, 食兩匙羹, 要型爸幫手呀!

甜品, 薑茶湯丸.


埋單免茶芥, 但要收小食及加一... HK$670....

咁嘅價錢, 我地覺得好抵呀, 食咗我地想食嘅野, 質量滿意, 大閘蟹都差唔多要收爐啦.

鴻桃酒家- 20121205

2012年12月7日上午11:44公開累積瀏覽 213 0

Dec 5, 2012, Wednesday Afternoon

連續兩個星期三, 安排咗強積金半自由行講咗比的同事, 等大家可以瞭解多的.  下午約保險公司的人食飯, 相識多年, 今次都係第一次.  我地訂咗鴻桃酒家.  呢排又嚟多咗呢間酒樓, 覺得佢地的小菜同點心都唔錯.  仲有個午市套餐, 都幾抵食. 

上次嚟食過一個芋頭栗子煲, 覺得好好味, 今次嚟到已經轉咗餐牌, 無得叫食唔到添, 咁就試吓其他小菜啦.

燒味可以揀燒鵝或燒雞, 哈哈, 個個都鍾意食燒鵝多的, 自己好難整麻, 燒雞都尚可以自己整.

例湯係節瓜煲豬展, 的湯好甜喎.

點心叫咗潮州粉果同兩碟油菜


喬頭生炒骨, 整得唔錯

茄子斑腩煲, 味道好, 不過油膩咗的

再叫咗一個味菜排骨炒麵

我地5個人, 好豐富啦.

套餐有呢個甜品, 話梅糕...真係好特別, 入面嗰的真係話梅嚟架, 不過味道就有的奇怪, 好食又唔係, 唔好食又唔講得....只可以講夠創意.


另外再送呢個南北杏雪耳雪梨糖水.  好特別, 廚師將的雪耳切細, 的雪梨切成小片,  唔係煲得好腍, 食起又ok喎.  要送咁多糖水比客人, 呢個都係一個好方法.

香脆豬仔包

Dec 10, 2012 8:51 PMPublicPageviews 751 1

Dec 7, 2012, Friday night

上次參考高Ling嘅龐多米(Pain De Mie) recipe, 整咗個牛奶枕頭包, 覺得好正, 今日又整過, 今次唔止用嚟整白麵包, 仲要試吓整脆豬仔包, 明天唔使返工, 整夜的都無問題, 所以亦都無諗著用低溫發酵.

份量: 高粉330g, 糖27g, 鹽6g, 牛油17g, 固體菜油17g, yeast 5g, 冰水(4c) 235g (原recipe 217g)


嘻嘻, 我都係用機搓, 一次過搓兩個麵團, 兩個都係一樣份量, 不過做唔同嘅包

先落冰水, 糖, 鹽, 奶粉, 麵粉, 最後落yeast.   雖然係用機搓,但我一樣可以用牛油後下法.


牛油及固體菜油各17g, 兩份都已預備好


搓完第一程式, 的麵團開始變滑, 呢個時候就加牛油及固體菜油,   搓到第二程式完結應該差唔多啦.

 

跟著將麵團由麵包機取出, 自己再搓幾吓, 量過, 有658g. 蓋濕布發酵30-40分鐘, 翻麵, 靜置.

 

分割成10份, 搓圓再做形, 每個大約66g, 放在焗盤上, 蓋上濕布繼續發酵...我都唔記得等咗幾耐, 大概個幾鐘吧, 今日天氣冷, 發酵得比較慢.

預熱焗爐200c

咩都無搽, 入爐調低至190c

焗22-25分鐘

的顏色焗色焗到到差唔多就出爐啦.

摸上手覺得脆脆喎.


第二朝切開放入焗爐180c焗10分鐘令麵包更鬆脆

食時搽少許牛油, 再搽上鍊奶(要滿滿一茶匙先夠架), 好好味嘅奶油豬呀!   太心急食, 唔記得影相呀!

星期日又變身

脆豬和牛漢堡

不過今次就無昨天烘奶油豬烘得咁脆呀!

咬落的麵包都好軟熟架.

龍門酒家- 20121204

2012年12月6日上午11:31公開累積瀏覽 237 1

Dec 4, 2012, Tuesday Afternoon

最近龍門酒家成為我地午膳飯堂, 因為一個星期, 有時都會去兩次.   點解去得咁密, 因為價錢相宜而又保持到食物質素.

初時佢地剛啱轉手, 我地嚟食晏, 大把位, 仲有幾檯吉位.  但最近去, 好多時都滿座, 要搭檯.

可能好多人同我地一樣, 都覺得呢道的食物, 煮得唔錯.

今日例湯, 南北杏蜜棗菜軌燒豬骨湯,  今日天氣凍凍地, 一入去整碗熱湯, 好正呀!   好味, 但唔覺重味精喎!

平時嚟我喜歡叫梅菜蒸鯇魚, 但最近兩次, 我覺得的魚蒸到過哂火, 今次要試其他啦.


蠔仔魚湯泡飯 HK$40,  加的胡椒粉, 好惹味.  呢的湯就覺得右咗的師傅啦.


豉椒牛肉炒麵 HK$40,  真係抵食夾大碟, 仲炒得好夠火候.  我最鍾意食的脆卜卜嘅麵條


軌炒牛河 HK$42, 又係好大碟, 仲炒得唔錯, 唔算好油膩..不過唔見哂的蔥...


哈哈, 唔係無蔥, 只不過係我同事唔鍾意蔥同洋蔥, 夾哂比我啫.

我地今日要搭檯, 見到同檯另外三位男士叫咗三個小菜share 嚟食, 呢道的白飯裝到大大碗, 夠哂的男士, 真係一碗都夠啦.

下次要繼續報導, 因為我目到佢地叫一碟, 上湯豬潤浸溫室豆苗, 好似好正咁, 我下次要試吓呀!

AVA Restaurant Slash Bar - Panorama Hotel

2012年12月2日下午1:48公開累積瀏覽 249 0

 November 29, 2012, Thursday Afternoon

今日型爸同我食lunch, 地點佢揀, 佢話要去Panorama Hotel 38/F., AVA Restaurant Slash Bar.

雖然訂咗位, 但係要坐喺近門口位置, 因為的檯差唔多全部都已經預訂.  對著呢個甜品counter都ok嘅.

我地點咗個二人海鮮semi buffet lunch, 價錢都ok喎, 本來HK$238一位, 但兩位就HK$308, nice.

先出去攞的沙律食吓先, 的parma ham同蜜瓜唔錯, 凱撒沙律可以自己整.  各款沙律都唔錯

二人海鮮盤, 我地選生食(另外亦可選熟食).  但我同型爸都覺得呢盤海鮮麻麻.  生蠔係澳洲塔斯曼尼牙, 但無咩味.  蝦同蟹腳都係無味.  下次可以唔揀.

沙律吧攞嘅迷你鵝肝多士及糖心蛋.   隻蛋睇落好吸引, 但食落就淡咗的.

型爸攞咗個蘑菇湯同一小塊多士, 塊多士好鬆脆, 食咗唔記得影.....食到呢到, 我已經差唔多飽啦.  

型爸叫嘅此蘑菇意大利飯, 型爸話淡咗的, 要加鹽同黑胡椒.

我要嘅辣蝦扁意粉, 又係淡咗的.  不過加咗黑胡椒同少許鹽, 味道又ok喎.

其實真係好夠啦, 但見到的甜品又忍唔著出去貢吓...

馬卡龍, 一定好甜...整到大少不一嘅, 攞一件白色最細件試吓.

咁靚嘅蛋糕, 我唔啱啦.

唔抵得, 每樣攞咗一件返嚟同型爸一齊試吓, 不過型爸一向對甜品無咩興趣.

食完我同型爸異口同聲話唔得, cheese cake 粉嘅, 蛋蛋撻皮不鬆, 馬卡龍太甜, 其他都無咩突出, 蝴蝶酥已經算係比較好.  食咗一兩啖, 覺得麻麻都唔勉強食啦(亦都可能係太飽)

型爸話咖啡ok, 但我覺得苦澀味重的.

我要嘅capachino... 不過都飲唔落啦.

埋單加一HK$339.80, HK$1 Donation唔知係咪幫我地捐款呢?

臨走時在lift口見到呢個2012 Hong Kong & Macau's Best Restauants 喎.

咁講真overall的食物唔差嘅，又唔係貴，有機會都會再嚟嘅。