五號屋的部落

2015年5月6日星期三

十大四小加四狗

April 26, 2015, Sunday

星期日, 又要我地行山舒筋活骼的日子. 天氣開始熱, 我地提早八點出發.

今日好誇張, 大隊人馬, 有十個大人, 四個小朋友, 仲有四隻狗. 所以今嘅行程都唔會行的太艱難, 大部份都係海邊平路, 唔會太曬.

由雞谷樹下出發, 最難嘅係有一段先上一百五十幾級樓梯, 再落一百三十級, 哈哈, 的小朋友行得慢, 但都唔使抱呀!

介紹吓四位叻叻小朋友, 係陶爸一對寶貝, 再加陶爸妹妹一對寶貝. 最大嗰個五歲半, 跟著係五歲, 三歲同兩歲半. 多咗小朋友, 我地行吓又停吓

去到宋伯士多, 大家停一停休閒一下

每人食碗豆腐花

呢間宋伯山水豆腐花, google map都有指示

食完我地轉入去行蘭桂騰芳, 比較陰涼的.

多咗小朋友行, 多咗好多休息點. 佢地見到咁多牛牛好開心, 見到的牛屎都咁開心呀!

跟著介紹四隻狗, 兩隻拉布拉多, 一隻迷你貴婦, 一隻混種西施比熊. 兩隻小狗望著用一方向, 因為女主人去咗洗手間, 佢地不停張望呀!

又行到呢個三义口

陶媽預備咗好多腸仔比的小朋友開餐, 我地休息一陣.

領隊約咗家人飲茶, 唔行得咁慢, 先走. 我地四大四狗都先行, 因為越到中午, 天氣越熱, 的狗會好辛苦. 分成兩隊, 陶家四大四小就繼續慢慢行.

我都行到差唔多返到雞谷樹下, 收到陶媽電話, 小朋友攰, 要在中途食午餐.... 哈哈, 無所謂啦, 我地都準備先送的狗狗返屋企, 跟著去榮昌食午飯.

攪吓攪吓都十二點幾, 行咗三個幾鐘. 去到榮昌都有的餓, 型爸要了客家豬肉飯

我地幾位女士要了碎蛋牛角包

跟著每人一隻BB鴿

哈哈, 再整杯紅豆冰....正呀!

晏的返到屋企, 陶媽傳來四位小朋友, 每個行完返到屋企, 都有彩虹雪條做獎勵.....哈哈, 個個都好叻呀!

2015年5月5日星期二

免煮日本料理

April 25, 2015, Saturday night

今日去一田買野, 見到的魚生好新鮮, 不如今晚就嚟個免煮日本料理. 再加上預備整蘿蔔糕, 都有好多功夫, 唔使煮晚飯就少咗一樣記掛.

買完返到屋企, 入雪櫃, 都整好蘿蔔糕入爐, 就開始食啦.

本來預埋林生林太, 但林生要同客食飯, 只有林太過嚟一齊食.

買咗一條鱸魚刺身

海膽一盒

八爪魚碎

湯巴魚刺身

兩盒壽司

哈哈, 四個人食咁多, 都真係好夠, 平均一個人要食九件壽司, 諗起都飽. 不過我有型爸二公子幫手, 佢地亦好樂意幫忙.

今日林老闆唔得閒, 無人陪型爸飲Whisky, 哈哈, 咁佢陪我地飲柚子酒啦, 一田減價, 一枝都係一百五十文咋.

我預告整咗蘿蔔糕, 明晚腍著煲粥+炒蘿蔔糕. 林太話有興趣join埋一齊食, 佢炒麵+炒菜...咁幾好吖, 一於咁話啦.

2015年5月4日星期一

蘿蔔糕

April 25, 2015, Saturday

蘿蔔糕, 平時都係一年整一次, 今年有的特別, 過年時整咗都係送比人, 自己食都食唔到兩件. 上次二公子問有無蘿蔔糕食, 要食, 一定有, 整咪得囉. 而家長年都有白蘿蔔賣, 酒樓幾時都有蘿蔔糕食. 都已經唔止係賀年食品, 算小食就差唔多.

橫掂都蒸, 都唔好整太少, 呢道有兩公斤多的蘿蔔(批皮後). 手切粗條, 咁整好先食到有蘿蔔絲呀!

蝦米一碗, 今次呢的係貴野蝦乾, 我叫Cindy浸好切碎, 哈哈, 佢切到成蓉呀, 不過無咩所謂啦.

四條潤腸, 四條臘腸, 汆水後切碎. 今次唔記得買臘肉, 咁就肥少的啦.

要用500ml雞湯, 8湯匙澄麵, 300g 粘米粉

潤腸臘腸白鑊爆的油出嚟, 盛起

剩下嘅油用嚟爆香蝦米, 盛起.

跟著都爆蘿蔔絲, 跟著加上湯, 加一小片片糖, 加蝦米水, 將蘿蔔煮腍. 一大鑊, 不過唔使驚, 只要煮軟咗的蘿蔔就啱啱好架啦.

煮腍後加胡椒粉加臘腸碎蝦米撈均, 煮滾就熄火. 熄火後就篩入粘米粉. 最花公夫就係呢段時間, 的蘿蔔糊變得好稠.

跟著蒸盒塗油, 加入蘿蔔糊櫈平. 放入蒸爐蒸一小時

攪掂啦, 四大盒, 每盒大概900g, 份量十足呀!

明天我要用嚟炒蘿蔔糕呀!

2015年5月3日星期日

住家飯

April 22, 2015, Wednesday Night

好耐都無講吓Cindy啦, 近來佢都做得幾好, 嚟咗我屋企七個月, 家居清潔嘅野都無咩問題, 煮食方面, 基本野都已經ok. 佢响我屋企都做得好開心. 只係佢做野比較慢, 但都要接受, 慢的就慢的啦. 屋企有聚會或開party就自己嚟啦.

Cindy久唔欠都會整的新餸, 但大部份都唔啱口味.

先兩日整咗個蛋餅, 味道都賣相都幾好架.

再加上雲耳蒸雞, 我同型爸都即刻比個讚佢.

今日佢無端端又整四個餸, 真係食唔哂

洋蔥西芹炒牛肉

青瓜麻醬手撕雞, 佢見我先兩日整咗, 今日佢自己整.

其實呢碟生菜可以唔使整, 今餐已經有西芹同青瓜

煎深海泥鯭

仲有花生蓮藕豬骨湯.

近來工作好忙, 每晚七八點先返到屋企, 返到屋企咩都唔使理有住家飯食, 我已經好滿意啦.

2015年5月2日星期六

Cafe De Fontaine

April 21, 2015, Tuesday

今朝十一點鐘開會, 開到差唔多兩點先開完, 餓到個胃都有的唔舒服, 馬上出去食的野先.

仲有好多野要做, 都係要就近搵間餐廳, 同事話噴泉餐廳都ok, 咁就去試吓

呢間响南洋中心地下嘅Cafe De Fontaine响尖東都好多年啦, 成日都好好生意, 望落去都客常滿, 但我就一次都未幫襯過, 因為我唔鐘意坐戶外, 佢地室佈坐位好少, 但室外霸出面嘅露天地方就好多. 因為露天, 滿足咗的食煙嘅客人, 但就唔啱我啦.

平時食晏時間都坐到滿, 但今日已經兩點, 咁就大把位可以坐室內.