五號屋的部落

2016年4月6日星期三

燒肉雞

April 2, 2016, Saturday

上兩個星期, 提早去拜老爺, 今日同哥哥姊姊姪女, 去拜我爸爸. 女士比男士長壽又真係好啱, 我的奶奶健在, 媽媽健在, 爸爸及老爺仙遊多年. 媽媽的同輩阿姨, 好多仍健在, 但姨丈們都先走了. 佢地坐埋一檯飲茶, 都係女士們.

以前去拜山, 媽媽一定要來, 好執著, 要買呢樣嗰樣, 但近呢幾年行動不便, 我地唔比佢去, 呢的野等我地做仔女做啦.

拜山祭祖通常都會買燒肉雞, 但今日去拜爸爸, 燒肉雞都係自家製. 哥哥屋企個工人姊姊做咗多年, 每次去拜山, 佢早一天會買定兩件腩肉兩隻雞, 預先醃好. 今天一早, 先蒸雞再焗燒腩, 未夠十點就已經整好哂, 真係比個讚佢. 自家製經濟好多呢!

哥哥預備拜祭物品, 而開車接送的工作就由我同型爸負責. 一早去接哥哥, 去到鑽石山, 兵分兩路, 哥哥姪女先上山拜祖母, 我跟姊姊去拜爸爸. 哥哥姪女拜完祖母後來匯合, 分工合作, 一個小時就攪掂. 姪女及姊姊有事先走, 我同哥哥回家跟媽媽一起吃午飯.

工人姐姐先切一隻雞. 隻雞好滑,

燒肉的皮仲脆架, 不過五層肉, 瘦嘅比較多, 硬咗的呢!

魚肉煎蛋餅

炒肇菜

五個人, 簡簡單單食了一餐, 燒肉雞都幾好味.

好耐無同媽媽吃午飯, 今日同佢一齊食, 佢好開心呀! 我剪雞肉及燒肉比佢食, 佢仲識同我講笑話自己現在好肉BB要人照顧.

食完飯同媽媽一齊睇舊相, 時光飛逝, 重拾很多回憶呢!

2016年4月5日星期二

蛋家佬

April 1, 2016, Friday

今日約咗會計師朋友食飯, 上次同佢去過蛋家佬, 覺得的餸都煮得幾好食, 今日又再去過.

的野好食, 但去到唔滿座, 即時有位. 睇吓餐牌, 繼續做緊午市特價.

講真, 如果唔做特價仲少人嚟食呀. 無法啦, 咩都貴, 租加材料加, 淨係人工加得最少. 想有生意, 午市都一定要經濟小菜嚟做招來.

今日叫咗梅菜蒸鯇魚, 的梅菜好好味呀!

豆腐火腩飯, 都唔一定係男人的浪漫. 我都覺得幾好味

仲有碟什菜送(二人份). 以前一人一碟, 現在係每檯一碟.

兩個人三個餸, 每人仲有一碗例湯, 真係好夠呀!

埋單HK$114. 抵食.

2016年4月4日星期一

餃子餐

March 28, 2016, Monday, 復活節假期

眨吓眼又到復活節假期最後一天. 前兩天已經將文件雜物整理好, 至於的衣物, 實在係太大嘅project, 今日一定攪唔掂, 都係唔執啦, 無謂迫自己啦. 今日節目, 輕輕鬆鬆, 放吓狗, 上吓網, 同型爸出去行吓就算啦. 其實咁樣放幾日假都幾開心舒服. 至於去旅行, 盡量都唔响呢的旺季同人迫啦.

今日又要諗吓食咩野午餐..... 摷吓雪櫃有三款餃子....今日就食煎餃啦.

呢款好味點心青島煎餃, 二公子好鍾意食架. 一盒16隻, 雖叫鍋貼, 但的皮一的都唔厚, 似餃子多的.

另一款係CP出品的豬肉餃子, 呢款餃子配紅色泰國辣醬

仲有一款係CP嘅菜肉餃子, 呢款配黃色的泰式醬汁

三款口味.....個人意認為, 比較喜歡中式餃子.

呀!忘了今天飲品, 大豆鈣思寶.

2016年4月3日星期日

Ruby Tuesday - 荃灣廣埸

March 27, 2016, Sunday night, 復活節假期

食完午餐, 再整理吓的雜物, 大約五點, 我地又出動 - 家庭樂, 食晚飯, 去睇戲.

二公子在網上先訂戲票, 到時就唔會買唔到票.

六點鐘出到荃灣廣場, 大排長龍, 泊唔到位, 唯有泊去另一個停車場, 無免兩小時泊車了.

二公子話今天想食Ruby Tuesday, 又好呀!. 真係估唔到, 只係六時, 餐廳都差唔多坐滿, 好彩我地都有位.

餐廳做緊入會promote, 一陣考慮吓先.

睇落好吸引, 就叫呢兩樣啦.

叫咗野, 型爸先嚟一杯啤酒, HK$88, 好貴喎!

要了Nachos HK$138, 味道幾好. 但的粟米片並唔似平時食開嗰的, 一時間又講唔出有咩分別

今日特價蘑菇汁豬肉腸薯蓉 HK$40, 的腸好腍好軟, 又幾好食.

煙肉薯皮HK$118, 好味.

墨汁海鮮麵 HK$308, 呢款麵好淡唔夠味. 三百幾文貴的喎!

Triple Play HK$328. 下次真係唔好叫燒排骨, 真係唔鍾意食, 的肉煮到霉哂, 邊好食.

今日用HSBC咭入會有promotion, HK$1000就可以, 埋單可以50% discount. 我地計過數今餐最少都要HK$1000, 有50% 即大約減HK$500. 即時入會啦, 張咭開比二公子.

埋單正如我地所料, HK$1,020, promote 豬肉腸無折扣, 50%HK$490. 但加一就無discount. 最後埋單HK$632.

哈哈, 我地嚟食多一兩次就抵番入會費HK$1000啦. 呢的咪做生意嘅招來方法, 的價錢擺到明係貴, 但50%後又抵食. 咁每人嚟多一兩次, 咁就好生意啦.

食完我地去睇戲啦.

荃灣廣場的百老匯戲院

蝙蝠俠對超人.....呢套梗係二公子同型爸都鍾意睇架啦.

睇完戲去食糖水....開心!

2016年4月2日星期六

韮黃鮮蝦雲吞撈蝦子麵

March 27, 2016, Sunday, 復活節假期

星期天本來係行山天, 但組長出外公幹, 我地呢的組員, 個個都偷懶. 無辦法, 長假期日子, 一的出外旅行, 一的又提早去拜山....大家休息吓啦.

呢幾日過得好開心呀! 做咗好多野, 跟著又出去行吓, 唔使整日待在家中. 時間都係自己掌握之中.

積壓的文件昨天已大部份清理好, 今日就到的雜物, 平時左買右買, 有的買咗都唔記得, 今日就來個大整理.

做到咁上下, Cindy問我下午食咩.....諗吓先...有, 雲吞麵啦, 上星期五去超市買咗兩盒新出的急凍雲吞, 快的試吓先.