流心芝士撻

August 26, 2017, Saturday

上次响紅茶冰室食過佢地嘅芝士撻覺得好好味, 好想自己試吓整.   咁就上網睇吓有咩野recipe啱使,見到Sunday More嘅流心芝士撻recipe好簡單,主要係Cream Cheese 同Yogurt, 就試吓呢個啦.   個recipe份量係做6個, 但我想整多幾個請組長食, 咁就自己調整份量啦.

忌廉芝士 250g, 無鹽牛油 23g, 純乳酪120g (其實100 g 都夠) , 糖26g, 雲尼拿油3/4 匙, 蛋白一個, 蛋黃一個(掃撻面用)

將忌廉芝士, 無鹽牛油, 純乳酪, 糖用慢火煮溶

跟著再加入蛋白拌勻

再加雲尼拿油

我本來用了100g Yogurt, 試味之後覺得甜, 所以最後加多20g Yogurt.

切勿大火煮, 不用煮得太稠

因為cool down之後就已經變稠.

我又急凍撻皮就無需搓

在撻皮用义插幾個孔

預熱焗爐, 180度焗大約10分鐘  (爐火及時間要跟自己焗爐)

焗好拿出來待涼

跟著加上芝士漿

再掃上蛋黃

220度, 再焗10分鐘 (又係要跟自己個爐火)

焗好拿出來, 先送三個去組長屋企.   回來馬上試味.    味道不錯, 個皮好鬆脆, 不過就唔夠流心, 可能的芝士漿稠咗的.    二公子話點解味帶酸（佢話酸味重咗的，但都好味），哈哈，我落多咗乳酪麻。

今問二公子仲要唔要食，佢話要，咁剩低嘅芝士漿用埋佢。

我仲有五個撻皮剩，三個甜皮，兩個鹹皮，一次過焗哂

剩低嘅芝士醬就平均落五個撻

今次我叫Cindy睇爐火，但佢唔記得，糖得過咗火。　甜撻皮同鹹撻皮的分別，甜撻皮有糖容易燶的。

今次的芝士漿無咁滿我覺得好的，芝士餡太多食落好膩架！

就算好味，呢的魔鬼撻久唔久整嚟食好啦。

炸漿

August 23, 2017, Wednesday

估唔到今年真係會打十號風球, 呢個"天鴿"咁犀利, 一路睇著電視見到海水倒灌, 水浸, 吊船被大風吹到撞入民居, 真係嚇人. 見到個心都離埋. 

早上十一點, 組長打電話嚟話煲咗粥及炒麵, 叫我地過去一齊食.   組長咁關照, 一於應承啦.  諗吓諗吓, 都唔好空手掉空腳過去, 不如整少少炸物啦.   組長夫人鍾意食香口野.

其實我係好想試吓整個炸漿, 個炸漿recipe 係從晨光第一線其中一個教煮食環節聽番嚟, 個Chef話呢個漿又薄又脆,今日就試整.

身上仲穿著睡衣, 只有40分鐘, 整好炸漿仲要梳洗裝身....要快快快!

呢個炸漿材料:  自發粉 10g, 麵粉 60g, 蛋白 一個, 油 30g, 啤酒 80g.   個漿調好後, 我覺得稠咗的, 最後加多了 20g 啤酒.  跟著放入雪櫃一陣

跟著忙著去換衣服, 換好就馬上開始炸....太忙咩都唔記得影啦.

但成品出來了, 非常成功呀!   我炸了8片蕃薯, 8片雞髀菇.  我預每人兩件, 而剩低嘅就留番Cindy慢慢炸, 佢想食幾多就炸幾多件.    我試食, 炸蕃薯好好味呀, 個皮係又薄又脆.   炸雞髀茹就無炸蕃薯咁香口.     唔...下次炸茄子.

組長炒了义燒油麵

 
仲有奄仔蟹鯪魚球粥

加埋我碟炸物, 四個人食啱啱好呀!

緬甸式鮮茄煮秋刀魚

August 19, 2017, Saturday

急凍的秋刀魚係平價魚, 如果煮得好食, 都幾美味,  Cindy 久唔久都叫我買.

今日佢煮咗鮮茄秋刀魚,  佢嘅煮法, 的魚骨腍哂可以食埋落肚, 味道好似沙甸魚,  煮起非常香.

佢嘅做法係先將秋刀魚煮大約30分鐘, 的骨腍哂但魚肉並沒散, 跟著再用鮮茄泣洋蔥去炆煮.   平時的魚煮咁耐邊好食, 但秋刀魚又無問題喎.   佢加咗少少辣椒, 都幾美味架!

今日仲有黑毛豬义燒

菇豆卜炒椰菜

蕃茄薯仔肉丸湯


三餸一湯, 呢餐樣樣都美味呀!

松茸發芽米飯

August 18, 2017, Friday

昨天剩低8隻松茸, 今日煮埋佢

不過唔係火鍋或煮麵, 係用嚟煮發芽米飯呀!

松茸洗淨切條

呢隻發芽米本來唔使浸, 不過我先落三杯水浸咗十分鐘

跟著落松茸

再落了三杯雞湯. 按制煮飯.

飯煮好, 睇落都OK, 不過拌勻時覺得的飯腍咗的

唔知係咪唔應該浸米, 定係松茸令到水份多咗, 下次如果再煮, 要少落的水.  的飯乾身的有咬口先似食發芽米.

今餐仲有椒鹽豬扒

蒜椒蒸黃花, 炒菜

青紅蘿蔔豬骨湯

三餸一湯加埋個松茸發芽米飯都幾好架!

Sky Bar - Yoho Mall

August 17, 2017, Thursday

生日大哂, 兩位男士招呼我, 哈哈, 型爸梗係要跟出跟入啦.  我地按完摩夾啱二公子放工嚟接我地跟著去食晚飯.

型爸話無訂檯, 去到我睇啱邊間就去邊間食.

平時好少嚟元朗, 兩仔爺話呢道咁多食肆, 梗有一間啱我.   二公子話今日食完飯就夜咗的, 唔係仲可以睇場戲.

睇來睇去, 一係Sky Bar, 一係胡椒廚房.  二公子話胡椒廚房似快餐店.  咁就決定去The Sky Bar.....哼哼...佢兩仔爺都係鐘意食西餐.

Sky Bar 响C007

門口棟咗幾個大menu, 睇落都ok喎

一行入去有三個擲飛標機, 入到去都好似幾大

我地坐的位置對著酒吧, 近窗位仲有張桌球檯.

研究一輪之後, 要了兩客Special Menu, 一客Dinner Menu

麵包先上...咦...唔係麵包, 係提子鬆餅.

Dinner menu 前菜係沙律

而Special menu 其中一客前菜係12隻生蠔

另一客special menu 前菜係牛肉刺身.

另外仲有一款係海膽刺身, 因為無貨所以我地第三客唔要Special Menu, 只係要了一客Dinner Menu.

今日餐湯是南瓜忌廉湯... 兩仔爺一飲落口.....媽咪, 妳煮的湯好飲好多.   哈哈, 多謝.   咁我覺得都係嗰的湯, 分別係餐廳無落奶或cream.

Dinner Menu 的青醬大蝦意粉

Special menu 的牛扒

及豬肉腸牛柳

其實Special menu 同 Dinner Menu 的分別最主要係前菜, 主菜就無咩分別.

最氣結係Special Menu本來有兩杯餐酒, 但食完哂先問我地飲咩, 咁就唔飲酒, 飲蘋果汁算啦.

每人一份甜品

原來呢間The Sky Bar 係under M. Steak個group.

埋單HK$786.  Special Menu HK$298一客, Dinner Menu HK$118 一客, 價錢都算好抵.

返到屋企切蛋糕....型爸在 B.Duck 訂的.

今天很開心呢!