風乾火腿白汁長通粉

September 13, 2014, Saturday

星期六, 一早起身又要再調教一吓Cindy嘅清潔工作, 大部份都已經上手, 雖然手腳慢的, 唔緊要, 肯做就得啦.  我諗佢地响緬甸, 一向做野都係比較慢, 唔會好似我呢的心急人, 咩野都要快手快腳, 煮飯都要半個鐘攪掂.

今日又教Cindy煮一份簡單午餐.

快煮芝士通粉, 煮7分鐘, 焗8分鐘, 仲有少許Al Dente嘅口感,  正呀!

配料就仲簡單, 風乾火腿.   燒熱隻鑊, 熄火, 用餘溫烘熱, 的油香發出嚟.  成個廚房都香哂.

 

將的烘熱咗嘅火腿放上的煮好嘅意粉, 咁就攪掂啦.

 
加埋杯鈣思寶, 每人一份美味的午餐.

型爸比個likes, 我都覺得好好味.   至於Cindy, 佢以前跟本無食過呢的野, 佢梗係話好好味啦.

呢排佢日日都食好多, 哈哈, 咁攪法, 想唔肥都唔得啦.

富豪軒晚飯

September 12, 2014, Friday night

呢排真係公又忙私又忙, 一早要上大陸公幹, 出門前又要吩咐Cindy今晚煮咩野比型爸同二公子食.  至於我, 上完大陸要趕返落嚟同舊同事食飯.

今晚食飯嘅舊同事, 都係以前幫過我手嘅妹妹仔, 而家大部份已結婚作為人母.  大家各有各忙, 都有年幾兩年未見面.  上次見面係嚟我屋企BBQ呀.   雖然成日响facebook見, 但同出嚟食飯始終不一樣.

其中一位提議去Regal Court, 佢有張25% off card, 非常相熟, 抵好多.

每人負責叫一兩樣

 

我要了黑松露白汁琵琶豆腐

 

脆皮牛坑腩

另一位要了酒釀柚子排骨

花膠浸翡翠

籠仔清蒸什菌

呢道嘅例湯可以一位叩, 我地有四個人要例湯, 要了一鍋

 

另一位要了粟米瑤柱羹

 

 
另一位要了雞絲瑤柱羹

大家食吓傾吓, 七點幾食到十點幾, 時間過得真係好快.

佢地話要再嚟我屋企BBQ, 咁當然好啦.
 

今晚本來我要請, 但佢地話AA制得啦, 唔係第日唔出嚟食飯.

出嚟食又好, 去我屋企BBQ又好, 咁快的再約啦.

仍要身兼兩職

September 11, 2014, Thursday

放咗五日假教導緬傭姐姐, 基本清潔工作已經可以, 做到七八成就好滿意啦.  唔使我擔心屋企嘅清潔, 已經非常之好.   但煮食方面, 都係要我自己嚟.  每日要食咩煮咩都要自己諗呀!

日間上班, 晚間煮飯, 暫時都係要咁.  Cindy對我個雪櫃, 暫時一點感覺都無.

先一晚我要諗定今晚食咩, 肉類要先解凍, 有需要先醃好.  早上出門上班前, 將今日要煮嘅野拎出嚟, 教佢幾點要用電飯煲煮飯, 幾點煲湯, 幾點洗菜, 到我放工返到屋企, 就可以開始煮.

焗雞翼係最容易, 昨晚教佢點樣醃雞翼, 無需太多花功, 首先學識點樣用老抽, 生抽, 糖, 鹽, 豆粉, 胡椒粉及麻油.   開焗爐, preheat, 將雞翼入焗爐我就可以煮第二樣餸.

薯仔已叫佢預早烚好, 加的鹽, 牛油, 香蔥, 沾雞蛋煎薯餅.  個薯餅唔圓係因為我唔係用手搓, 只係用兩隻湯匙嚟整, 咁就無咁靚.

呢碟菜係佢炒.  我問親佢整咩野餸佢都話唔識, 淨係識炒菜, 咁佢炒我睇著, 咁上下就叫佢停.

雪耳螺頭瘦肉湯, 覺得個湯未夠火侯, 要再調教.

 
放工返嚟, 大約40分鐘就可以食飯, 三餸一湯, 都算唔錯啦(自己贊自己呀)!

希望佢盡快學識煮簡單嘅餸菜, 唔使日日急急腳放工趕返嚟煮飯啦.

追月夜

September 9, 2014, Tuesday night, 追月夜

昨晚過了一個安靜的中秋節, 今日可以同幾家鄰居一齊慶中秋, 好開心呀!

今晚唔止係追月夜, 亦都係我地同林家二小姐餞行的日子, 再提早慶祝佢生日.  所以今晚potluck在林家舉行.

我地大家都高高興興, 不過林太就有的眼濕濕, 唔捨得個女呀!

 
林老闆親自煎了烏魚子及台灣香腸, 要嚟送酒呀

 
 林太煮了冬菰鴨掌

 

炆牛肋條

 
 西芹炒潮汕魚蛋

陶媽炆了豬手

煎多春魚, 炒椰菜及西蘭花

Mrs Kua炒了米粉(哈哈, 張相影到咁差)

蓮藕炆腩肉(呢張又係矇查查)

五號屋的美極焗雞

焗黑豚燒腩

豉椒味菜大腸

我地十一個人, 但有十二碟餸, 仲碟碟都好大碟....哈哈, 她似好耐無一齊potluck, 大家都整多的.但邊食得哂吖.

我們的文明規定, 食唔哂的, 要自己帶回家.

今晚唔可以太夜, 明天我要返工, 今晚仲要諗明晚食咩, 如果唔係放工返嚟就煮唔切呀!  緬傭姐姐現只可做清潔工作,煮食仲要繼續訓練呀!

緬傭姐姐今晚輕鬆的, 因為potluck唔係响我屋企舉行.  初嚟步到呢幾日, 每天佢都好早瞓, 都好嘅, 佢休息夠, 第二天先有精神做野.

而我呢幾日, 每天响屋企上上落落十幾二十次, 樣樣都做, 真係超勞動, 早起晚睡, 身心都疲勞!

明天返工, 渴望一切回復正常.

豉椒味菜豬大腸

September 9, 2014, Tuesday

好耐無整過豬大腸啦.  通常整呢的餸都係等多的人食嘅時候先整.

只係買急凍的豬大腸, 乾淨, 比較容易處理.  通常我都會將腸內部份油脂剪去, 再用薑蔥汆水.  大約20分鐘直至豬大腸腍.

跟著切開一嚿嚿

要教工人姐姐煮, 我會預傭哂所有配料, 連汁都調配好, 等她可以用緬甸文寫著.

鹹菜先用水浸, 搾乾水再用白鑊加糖烘炒

再用蒜蓉起鑊, 加大腸爆炒, 加鹹菜加汁埋茨, 咁就攪掂.

我留起一的比傭人姐姐, 佢又話好好味.   哈哈, 最緊要佢話好味, 咁佢先有心機學煮麻.

焗黑豚燒腩

September 9, 2014, Tuesday

整燒腩, 對於緬傭姐姐嚟講, 又係好新鮮. 因為佢都未見過Air Fryer

今次買咗黑豚腩

早一晚用鹽, 五香粉, 紹酒放入雪櫃, 今日從雪櫃攞出嚟,用豬針狂插, 用錫紙包好.

唔知點解的皮有的變白, 塗的白醋响豬皮面

再鋪上粗鹽, 再放入 air fryer

180度焗了30分鐘, 的鹽乾哂, 再用豬插繼續插, 的油標出嚟, 希望豬皮爆得脆的.

有的失望呀, 的皮焗起有的脆有的唔脆.  唔知係咪我插的唔夠均勻呢.

我先請緬傭姐姐食一嚿, 佢又話好味. 

 用Philips Air Fryer焗燒腩真係有好處, 唔使霸著個焗爐

 

 個焗爐就可以用嚟焗美極雞, 隻雞今日風到好乾呀!

焗好燒肉時, 隻雞都焗好.

緬傭姐姐睇著我左騰右騰, 左整一碟, 右又整一碟.  佢Air Fryer未用過, 焗爐都未用過...哈哈, 唔識用唔緊要, 學識點清潔就得啦.
 

火雞腿辣腸XO醬炒烏冬

September 9, 2014, Tuesday, 中秋節假期

今日是緬傭姐姐來了的第五天, 亦是我五天假期的最後一天.   要教的東西仍很多, 傭人姐姐的清潔工作可算上手了, 當然仍有很多錯漏, 但這是人之常情, 一定要包容.   給了她最大的關懷及鼓勵, 一句責罵都沒有. 

早餐由她煮, 我在旁看, 提點她如何煮麥皮, 烘多士, 煮啡, 都是很容易, 她也很快上手.  教傭人最好的方法是重覆煮同一樣野, 第一次唔識, 再第二次, 兩三次之後, 一定會識煮. 

午餐晚餐仍是由我來煮, 對於我們下午吃的水餃烏冬麵食, 她很喜歡, 可能她很少吃這些什糧吧.

今天教她炒烏冬

只是用普通的北海道烏冬

 
用熱水浸鬆再用過濾水沖洗, 等麵身爽一點

配料用了辣腸及火雞胸肉.

用XO醬來炒

先爆好辣腸及火雞胸肉, 哈哈, 太忙, 忘記了加洋蔥.

不過炒得一樣好味.

今日仲係咁忙, 因為今晚追月夜potluck, 我要整三款餸呀!

焗燒肉, 美極焗雞, 味菜豬大腸...無咩新意, 呢排忙到頭都實埋, 真係求其整, 但算係同鄰居一起做節, 整幾款肉, 其他鄰居會煮菜.

都唔記得講, 我幫工人姐姐改咗英文名, 佢緬甸名好難叫, 我見佢個middle name有個Zin字, 取其同音, 就幫佢改咗個英文名Cindy, agent都話好呀!   個工人都好開心, 起碼我一叫佢即刻識應.