今日我地屋苑業主立案發團開大會, 討論新一年屋苑管理預算案. 而新年期間, 我地屋苑發生了一件不愉快事件, 其中一個部屋, 外出一天, 被盜賊break in, 損失慘重. 我地要管理公司加強保安.
昨晚去探媽媽時, 接到Mrs. Kua 電話, 佢話今日要開大會, 開完會後不如嚟個potluck dinner 啦. 咁當然無問題啦, 即興幾好吖, 點都要食飯架啦. 應承咗, 但未有idea整咩野, 亦都唔知其他部屋會煮咩野, 只知Mrs. Kua 會煮個糯米飯.
昨日晚飯後, 睇吓屋企有咩...咦! 有牛脷喎, 可以整咖哩牛脷. Mrs. Kua整糯米飯, 可能唔會煮白飯, 咁我整的蒜蓉包配牛咖哩牛脷都唔錯吖. 上次整鳳眼卷佢地都未食過, 仲有的靚臘腸, 潤腸加鵝肝腸, 呢個very easy....一於咁話啦.
早上出去買餸, 跟著又要去睇媽媽, 都好忙. 下午三點先返到屋企.
哈! 煮咖哩唔使我出手啦, Ruby可以攪掂. 我負責試味, 仲有唔鍾意的咖哩汁太稀, 要調控的稠度, 醮麵包食會好味的.
蒜蓉包就我整啦, 的蒜蓉香茜醬都係自已整架, 用咗橄欖油, 健康的. 用大爐焗真係好方便, 一次過焗哂兩條長法包...
焗好放落個tray幾靚仔.
係咪好靚呢? 响美亞買呢兩件套裝, 都係第一次用咋.
另外再整咗鳳眼卷, 兩條臘腸, 兩條潤腸, 兩條鵝肝腸
切起都幾靚仔. 今次我並無將的魚肉包得太厚, 我覺得咁樣效果幾好, 咬落去兩樣配合得好好, 的臘腸一的都唔油膩, 真係唔錯. 平時如果就咁蒸臘腸, 我諗幾靚嘅臘腸, 每一都只會食一片起兩片止.
大家好比面呀! 的蒜蓉包好快沽清, 鳳眼卷都食哂! 但係的咖哩牛脷就有剩嘞, 因為今日有其他兩個部屋都有用紅蘿蔔薯仔煮牛肉呀!
哈哈! 即興potluck, 無夾過煮咩, 好多牛呀!
八號部屋嘅蒜片牛肉
十五號部屋嘅法式牛腩, 佢仲煲咗個蘋果龍利葉湯, 好清潤好味呀!
十三號部屋嘅薯仔紅蘿蔔炆牛肋條
十三號部屋嘅西蘭花魚鬆
十八號部屋嘅煎素鵝
唔知係咪十號部屋整嘅煎雞翼
三號部屋嘅炒菜心, 今餐肉多菜少, 呢碟好搶手呀!
繼續三號部屋嘅糯米飯
有咁多樣餸大家一齊share嚟食, 真係好開心呀! 大家都覺得portluck比較好, 主人家唔使咁辛苦, 大家分擔一吓, 又可以試吓各部屋嘅手藝.
五點開大會時就已經開始飲白酒, 開完會開始食飯就飲紅酒, 今日無預備甜品, 大家傾吓傾吓, 不如飲ice wine配朱古力啦. 即刻返屋企攞咗兩支ice wine加一盒朱古力過嚟, 另外八號部屋就攞咗一盒朱古力薯片....
又一個開心嘅晚上.....
沒有留言:
張貼留言