大埔滘林徑 + 陳漢記粥麵 + 南苑海鮮酒家

January 28, 2017, Sunday

組長仍在外公幹要明天先回港, 好多組員都偷懶請假.   副組長唔使氣餒, 仲有我同型爸撐你.   結果係上星期的翻版, 仲有鄰居兩夫婦, 五人行出席呀!

今日行大埔滘林徑, 紅路加藍路.  天氣涼涼地都幾舒服.   行林徑唯一不好之處就是要常望著地下行, 因好多樹根, 一不留神可能會跌倒或拗柴.

行呢道無咩難道兩個多小時就行完.   副組長提議去大埔陳漢記食粥麵, 又好啪啫...讚成!

去到陳漢記要等一張檯, 唔好嘥時間, 我要去樹記買腐皮及腐竹.  都要排隊, 不過都係等十幾個啫.

買完返到陳漢記, 佢地開始食緊

我要了碎牛魚片粥, 型爸要了蠔豉雞粥, 副組長要雞粥, 鄰居夫婦要了崩沙腩麵, 跟著佢地話唔夠喉, 佢兩夫婦再要多碗麵share, 我地見的崩沙腩咁正, 要一碟崩沙撈麵同副組長一齊食.   點知話無崩沙腩...咁坑腩都好啦.    大家食到飽飽都只係每人HK$67.

埋完單, 第一時間去Cycon買牛扒, 副組長舉手讚成, 佢話啱啱要入貨呀!  今日真係好, 行完山可以買腐皮腐竹, 再買牛扒.   平時同型爸嚟, 車停响另一邊, 就無行過嚟買.

唔止食午飯, 大家仲約埋今晚食晚飯...鄰居話佢啱啱上星期食過一間私房菜幾好味, 一陣打去睇吓有得食.  無得食私房菜都可以去南苑食.

私房菜就食唔成, 結果就去咗南苑.

呢間南苑响八鄉錦上路, 我第一次嚟食咋.

 

呢道隻燒豬真係無得頂, 我地打電話預頂即燒, 的皮好脆, 正呀!   結果叫佢地斬埋個頭嚟食.   其實我有的怕豬頭架.  

羊腩煲, 配唐生菜, 一碟菜唔夠, 再加多碟啦.

 

 呢個唔知咩野金沙骨都好好味

 

要咗兩碟炒芥蘭

龍蝦芝士伊麵...哈哈, 好有以前隆堡大酒樓feel 呀!

沙薑雞

芋頭油鴨煲

仲有碟义燒

食咗咁多野, 每位都只係兩百大元, 抵食啦.

我地已經約定, 下個星期等埋組長返嚟, 一齊去食私房菜呀!