同愛煮私房菜 - 鄰居團年飯

February 4, 2018, Sunday

今日好高興, 約咗一班鄰居提早團年.  因為下星期開始有鄰居要出埠過年, 早的食, 可以多的人參與.   結果有十八人出席呀!

十六號部屋提議嚟呢間同愛煮食私房菜, 佢話上次同事介紹嚟呢道食都唔錯.   咁我地最鍾意試新野, 好或唔好, 唔試又點知呢!

有兩個餐牌給我們預訂, 我們選了每位HK$330那一個

我提議選這些餸, 鄰居話上次食了柚子蜜汁蝦幾好, 咁就唔要上湯蝦球伊麵, 改柚子蜜汁蝦

 

 呢間同愛煮响上水新成路, 廣成冰室樓上.   唐樓三樓, 無電梯, 如果有老人家就麻煩的.

入到去地方尚算ok, 放兩圍都唔迫呀! (地方大過紅廚) .   牆上貼了很多相片.

負責人預備了香茅青檸蜜, 基本上係任添任飲.  但今晚天氣太凍, 好想飲熱野, 但佢地煲好放涼, 就咁飲麻麻, 我地想熱飲, 但年輕人就話加冰.  但加冰後又淡咗呢!

後來那姐姐翻熱了一壺, 但天氣冷, 一陣又凍哂.

第一道菜花雕醉雞卷, 用話梅涼瓜嚟拌碟.   的涼瓜好食過的雞.  的雞去骨, 浸得唔夠味, 大大夠肉, 食兩件已經頂唔著.  

第二道菜係XO醬淮山烤麩炆爽肉, 呢碟味道稍成濃的, 比較有味.

呢碟紅燒炆釀柚皮, 我好大其望.  呢的真係手工菜, 但好失望, 整個菜淡而無味, 嘥了的工夫.  柚皮本身無味, 唔整濃味根本唔好食, 的蝦子又唔夠香.  入面釀咗又係淡而無味.  大家都夾了一嚿都無再添食.

鄰居話好味的柚子蜜汁蝦, 一嚟到佢話的蝦做咩細隻咗咁多.  的蝦肉唔爽, 柚子蜜都好麻麻, 一的都無驚喜, 亦唔覺好食.

粟米椰子合掌瓜湯.   個湯無問題夠熱夠濃, 肯定無落味精.

有個上湯浸時菜, 我都無咩心機影.  用咗竹笙什菌煮肇菜,  又係無咩味.

我對呢個黑椒蜜汁鱔球好大期望, 點知又係失望.  咁大嚿鱔, 諗著的肉應該有番咁上下咬口.  的鱔炸過, 但唔係外脆內軟, 食一嚿就夠了.

呢個香茅醬焗雞又係無咩味.

反而單尾嘅臘味糯米飯同紅豆沙湯丸仲ok 的.

HK$330以私房菜嚟講係算平, 但講明係食私房菜, 梗係希望有的驚喜, 但呢道一樣都無囉.  全晚嘅餸全部偏淡呀!

反而上次去紅廚, 雖然係HK$450一位, 但起碼有幾款餸有的特別, 淨係頭盤涼拌花膠, 松露醬蟶子沙律都好過前菜嚟個嚿嚿雞肉卷.

又係嗰句, 唔試過又點知啱唔啱食呢!