竹絲雞燉翅

真係講唔出有幾忙, 過年前忙忙忙, 過年時又忙忙忙, 過完年都係忙忙忙, 忙到放完假, 阿仔返加拿大, 咁先可靜下來寫吓blog,  哈哈, 堆積了十幾二十日, 慢慢寫, 順便回憶一下呢兩個星期, 一家團聚開心嘅日子.    下一次一家相聚可能要過兩三年!

February 12, 2018, Monday

自從知道大公子會返來同我地一齊過年, 就諗著煲的咩野靚湯, 整的咩野比佢食.  但睇吓呢兩星期嘅schedule, 可以响屋企食晚飯的日子, 只有一兩天.   咁唔好諗太多, 先整個雞燉翅, 無時間食飯都飲個翅湯啦.

早上五時幾機到港, 型爸同二公子六時便開車去接佢.   二公子這兩星期都請了大假, 而我亦請了大假(只有2月12及14要上班), 大家都爭取多的時間相聚

 今次落重料呀!  兩大包急凍翅先用薑蔥汆水.   買到的咁靚嘅翅都係多謝組長咋.

 竹絲雞一隻, 塊面咁大嘅鮑魚一隻, 一斤豬展, 一嚿金華火腿(連皮), 全部先汆水

 先將的翅放煲底 (的翅勁大梳呀!) 跟著放埋其他配料

 

 加滿水

 

 放入蒸爐

 用110度 蒸燉三小時.   Cindy按了100度, 我叫佢加到110度,

 燉好啦...的湯好濃呀 (哈哈, 實在落咗好多料)

 的翅燉好都係一大梳

 隻鮑魚都仲係好大隻

 有幾大, 放在湯碗入面, 燉完湯依然大隻過個Iphone 6 plus.  哈哈, 大公子話要影相比佢女朋友睇呀!

 咁梗係裝大碗翅比大公子食啦....唔會偏心, 型爸二公子一樣大大碗.  Cindy一樣有得食.

加少少鹽吊一吊, 非常好味.   至於隻大鮑魚, 切片醮Washabi 加豉油....一樣好好味呀!