蘿蔔糕 芋頭糕

Feb 15, 2018, Thursday, 年三十晚

年三十晚, 我的年假開始, 亦都是辛勞的開始.   其實我老闆都已經好好, 比多地放多幾日假期, 而年三十晚呢日係最重要 (係我每年都安排放架).   好多主婦年三十晚一樣要返工, 全部的野都要堆埋晚上做.

今天唔使返工就一早開壇作法.....

 好認真架, 將所有野分成四份, 因為要煮四次.  兩次蘿蔔糕, 兩次芋頭糕

所有配料都分別量好

蘿蔔切粗條

芋頭糕切丁

蘿蔔糕芋頭糕做法有點不同, 所以粉都分別量好

臘味有臘腸, 潤腸及臘肉

蝦米浸水後都分開量好.

一年整一次, 都唔好話無壓力, 整得唔好點算.   所以都係要靠每年寫好, 再加修改.  只要份量做好, 通常都會好食架啦.

蘿蔔糕(四盒份量)

蘿蔔 2公斤
臘腸 2條
潤腸 2條
臘肉 半條
蝦米 半碗 (80g)
粘米粉320 g
澄麵  55 g
鷹粟粉 80g (今年加了鷹粟粉, 令的糕無咁削), 明年試吓跟芋頭糕一樣加要120g
清雞湯 500 g
調味：片糖1/4片，胡椒粉，少許鹽

先爆臘味

再加蝦米一起爆香.  盛起

將蘿蔔條加雞湯, 蝦米水煮腍 (加一小塊片糖), 加胡椒粉

加臘味拌勻煮一陣.  熄火

將粘米粉, 澄麵, 鷹粟粉加一杯水先拌勻.   再加入煮好的蘿蔔條, 咁樣唔使篩的粉咁難拌

容易拌得多

拌幾拌就好"稠"架啦.

入盒...今次量過, 每盒都多過九百克...即有一斤半重呀!

 整完四盒再整多一次.


做好八盒就一齊放入蒸爐蒸一小時.

跟著就到芋頭糕.

芋頭糕:（四盒份量）
芋頭 １.5公斤
臘腸２條
潤腸２條
臘肉半條
蝦米半碗
粘米粉 240g
鷹粟粉 120g
澄麵 30g
清雞湯 1000 ml, (500 ml用來煮, 500ml 用來調粉漿)
水: 1.5杯 (用來煮芋頭)
調味：　胡椒粉，五香粉，少許鹽, 片糖少許(只係用嚟吊味)

 

用1.5杯水, 加500 ml 雞湯(加少許片糖) 煮腍, 加入胡椒粉, 五香粉, 熄火 

跟著加入爆香了的臘味蝦米

將所有粉類加500ml 雞湯拌勻

加入煮好芋頭丁

拌勻就會好稠.  可以入盒

整好八盒.  的蘿蔔糕已經蒸好, 又再入爐蒸一小時.

整好先用保鮮紙包好, 再入食物袋就得啦.

芋頭糕都係一樣.

整完攰到散哂, 真係好攰.   哼,女人就係咁有要呻又要做.

跟著趕去奶奶家團年....

咁多年第一次, 年三十晚打邊爐.   由姑奶主理.   佢話個工人姐姐唔係點識煮, 佢又無能力煮咁多....咁就大家一齊烚吓烚吓啦. 

其實食咩野都無所謂, 只要一家人齊齊整整, 高高興興就得啦.