2018年3月24日 星期六

蓮麻坑食盤菜

March 4, 2018, Sunday

星期日又去行山.  過年前後停咗三個星期, 今日好興奮好想去郁動一下.

今天行我地平時行得最多的南涌鳳坑谷埔, 行遠就回程, 組長佢地都唔行烏蛟騰, 因為領隊哈叔邀請我地去食盤菜.   其實我無興趣食盤菜, 但行完山大家湊吓興一齊去就無所謂.

就係因為湊吓興, 咁先會去到禁區睇到興建緊嘅蓮塘新關

好大型嘅建築呀!  我地架車開到呢道, 警察要求我地停响停車場,  泊車响呢道要登記身份証.  跟著我地再坐盤菜宴提供嘅shuttle bus入去蓮麻坑村.

沿路入去, 大部份地方都係封哂鐵絲網

Shuttle 唔可以直入村, 去到鐵絲網閘口, 我地落車再行入去...呢前面有個大紅牌嗰處就係啦.

入到去再要行入學校

跟著見到入面有好多大鑊....煮緊咩呢?

仲有呢的大蒸爐, 蒸咩呢?  後來知道啦, 係蒸飯呀!

再跟見到的廚師開蓋, 原來整緊客家炆豬肉呀!  仲係用柴火煮架!

即係話, 除了盤菜, 仲有柴火客家炆豬肉

的盤菜啱啱送嚟呀!

好野, 我地坐第一席...哈哈, 有咩好處, 就係坐咗响操場邊第一檯, 咁派野食派第一...嘻嘻, 走都可以走快的呀!

睇吓, 有百幾圍呀!  諗吓一陣走時的交通就知點解我咁講啦.

財神派朱古力金幣

醒獅表演

的人差不多到齊...真係好多人.   天公做美, 今早行山時落雨, 仲落到好大添.   點知十二點就開始無落, 如果唔係, 露天盤菜, 點攪呀!

仲有歌手獻唱, 呢位靚女係無線藝員, 以前選過港姐, 歌喉唔錯, 真係仲好靚女.  但係就唔記得佢個名 (講完都仲係唔記得)

第二個表演嘉賓係寶配如....哈哈, 呢個又知佢個名喎!  原來都好好歌喉.

嘩嘩嘩, 等咗好耐, 有野食啦, 客家炆豬肉先上.

我食的瘦, 再加埋木耳, 好好味喎!   見到型爸同組長, 肥一肥都食, 真係見到都打冷震, 咁肥食一兩嚿好啦, 唔好食咁多.   點知坐第一檯好有面, 佢地再整多一鍋....唔好食咁多啦, 一陣仲要食盤菜.

 
第三位表演者係方伊琪, 嘩, 呢道好多人鐘意佢, 有的仲派利是比佢....咁又唔公道啫, 要派應該派埋比前兩位表演者啦.
上盤菜啦, 係由農莊餐廳供應

寫到明要煮10-15分鐘, 等吓啦.   不過我地已經唔餓, 睇吓, 第二鍋的豬肉都差不多食哂.

呢幅係嘉賓提名

有位未來政星呀(那位女士).

盤菜食得啦....   我地食咗一大半, 跟著就走啦.  

為咗唔想同人迫, 都係走先好的.

多戲哈叔邀請, 咁先有機會嚟呢的禁區地方行吓.

沒有留言:

張貼留言