2019年6月4日 星期二

老友鬼鬼高雄開心四天遊 - Day 1

May 16, 2019, Thursday

今次旅遊, 非常開心, 係我地老友鬼鬼第一次人齊去旅行.

今日晨咁早要起身, 因為早上08:50 飛機, 習慣兩小時前到機場, 可以去Club Lounge食早餐

一個多小時的飛機, 好快就到....我地八個人, 真係好多野講, 講咩都咁好笑.

落咗機之後唔係即刻過關, 我地係去Duty Free Shop 買酒.....哈哈, 的酒係我同型爸要買的, 21年橙色盒Glenfiddich, 台灣好抵買, 成日都無貨, 索性一落機睇吓有無貨.....哈哈哈哈, 有貨10枝, 一次過比我地買哂, 仲有promotion, 每枝都送細枝裝200 ml...型爸好開心呢!   買酒送咗兩個手提行李箱, 可以放4枝大酒, 8枝細酒.    其他的要老友鬼鬼幫手拎.

跟著就排隊過關....仲要去撳錢....過關前部ATM, 好方便, 匯率又好, 3.94.   出到去行李帶, 剩番我地的行李未拎咋.

不過我地唔急, 我地只係坐地鐵去酒店, 買咗張類似八達通咭, 方便呢幾日用. 

 
好方便, 坐五個站就到三多商圈站

 
一出地鐵就行兩三分鐘就到

按電梯上30樓係酒店大堂

正常下午三點鐘先可以check in, 酒店很好, 先給我們一個房間放低所有行李, 咁我地可以安心出去玩, 夜晚返嚟先攞埋其他三間房.


放低哂的行李, 就馬上出去揾食.  本來諗著行去興中夜市那條街食台灣道地食物, 但天氣太熱, 行幾行就改變主要, 一定要有冷氣的....就近有百貨公司新光三越....哈哈, 唔使諗, 地庫一定有food court.

今晚我地要去食自助餐, 所以午餐唔食咁多, 要了四份餐八個人食.   每人食少少, 唔餓就得架啦.


每份餐大約HK$110.

食完型爸話去買雪糕.

淨係呢款雪糕, 我地已經笑到肚痛.  型爸負責去買, 另一位男士拎番嚟同我講呢道有一款比較酸的, 型爸專誠買給我吃, 我抓哂頭, 無理由吖, 型爸唔鍾意食酸野架.


當的雪糕拎哂返嚟, 點解杯杯都差唔多色嘅....味道亦都大同小異, 微酸, 中酸, 好酸....kakakaka, o無一杯係甜架...

原來型爸去咗呢間吃不胖冰淇淋


用水果Yogurt 打成.  坐部都係Cranberry, Blueberry, Raspberry and Strawberry...   哈哈, 結果係好酸嗰兩杯食唔哂, 真係頂唔著呀!

跟著我地坐車去美麗島站....

哈哈, 我地去個地鐵站打咭影相, 無出閘呀!

跟著著坐地鐵去駁二藝術館

落車行行吓, 咦, 呢道有間酒釀桂圓麵包店....我地要食呀!


間店都好大, 除了都包, 仲有飲品

呢幅牆上面的木盤有名人的簽名及合照.   中間那一塊係蔡英文的簽名.

我地要了一個大的酒釀桂圓都包, 要收銀的帥哥幫我地切片.  八個人食一個麵包都食唔哂呀!

佢地買咗幾枝不同口味的啤酒, 其中小滿及大暑都攞過獎.  但我飲落覺我都唔好味.  我飲水得啦.


跟著就周圍影相

 
 
跟著我地坐地面的鐵路, 可以坐响架車入面, 嘆冷氣沿路睇風景.

大約五點, 我地响就近今晚食自助餐的地方下車, 行路去漢來餐廳.

我地訂咗六點, 但五點半就比我地入去....

共實我麻麻地鍾意食自助餐, 但其他人喜歡, 咁無所謂.   我地在網上預早訂位, 如果唔係有排等位呀!   連稅NT935 一位, 即港幣二百幾一個人, 抵食呀!

食了魚生

白焯和牛.  的牛肉好靚好好味, 食咗兩次.

呢隻琵琶蝦就麻麻, 好腥呀!

我食咗好少野, 但自製珍珠奶茶就飲咗兩杯, 落咗好多珍珠, 都已經好飽.

呢個甜品好好味.  梳孚里配雪糕

大家食到飽飽飯酒店.

的房間都幾大.   係Family Suite 4 人房.


睇吓我地幾多行李...之唔係因為一落機買咗十支酒.  好彩送兩個細喼咋, 唔係都唔知點拎呀!


個洗手間設計都ok, 淋浴間同厠所分開, 比較方便.  通常都唔會浸浴.

今晚大家好好休息, 明天再出發.

沒有留言:

張貼留言