又"原"

Mar 30, 2017, Thursday

今日慢魔魔同秘書小姐好有心, 佢兩個抽到獎, 夾份請我食午飯.

慢魔魔未去過原之味, 佢聽聞話的牛肉好味, 佢好想試吓.   哈哈, 我有咩所謂啫, 有人請食飯, 去邊道食都咁開心.

我地三個人叫咗一客二人套餐, 再加一份紅菜頭蟹肉壽司卷套餐


每人一份沙律加三小碟前菜

 二人餐先上刺身

 今日碟西冷牛肉好似細碟咗喎

 白飯加了芝麻藜麥

 的牛肉煎得好好, 五成熟但無血水.

 秘書小姐唔食牛, 佢就食呢份紅菜頭汁牛油果蟹肉卷, 仲有一碗稻庭秋冬.

仲有甜品及飲品.

埋單時我見四百幾文, 即刻睇吓單, 因為上次同型爸嚟, 叫一樣的餐都只係三百九十幾唔使四佰.  侍應小組話上星期五餐廳正式開業, Grand opening 之後就要收加一小費.  之前soft opening 就免加一.    哦, 原來係咁.

蕉徑觀音古廟

March 26, 2017, Sunday

上個星期日落大雨無得去行山, 點知今個星期日, 當我地預備出門, 即刻落下, 仲落到好密.   組長同副組長話無得去行山, 個個都起哂身, 不如去飲茶啦.

其實我同型爸食咗早餐啦, 不過組長同副組長叫到, 飲茶就飲茶啦.

開車去粉嶺新明苑飲茶.  平時都覺得的野食唔錯, 今日唔知個廚師攪咩鬼, 樣樣都鹹鹹鹹,

飲完茶出到嚟, 咦無落雨喎, 個胃又飽, 大家都心思思想行, 個天色又好暗.   一於決定, 行超短程, 一個多小時就攪掂.

我地由粉錦公路開始行入去

去到呢個蕪徑彭屋村57K綠巴站, 大約要15-20分鐘

跟著再由小徑, 經過呢個棕櫚樹林.   真係好奇怪, 唔知點解呢道會有幾百棵棕櫚樹

沿路有指示牌向觀音古廟

經過見到有棵大樹菠蘿樹....有收成啦.

到觀音古廟啦.   由57K站行過嚟, 又係大約20分鐘.

入廟就拜神啦.

其實呢道有條路上山, 但今日天色唔好, 我地唔行回程啦.

需要只係行咗個幾鐘, 但係個心舒服哂, 今日無偷懶呀!

莆田

March 25, 2017, Saturday

上星期六同型爸家人去拜老爺, 今個星期就輪到同我的家人去拜爸爸.    爸爸過身二十幾年, 應該早已再世投胎, 但去拜祭是我們的一份心意.

去鑽石山火葬場, 拜完都只係十一點幾.  早咗兩個星期去, 人唔多唔使迫呀!

拜完山姪女們提議一齊食午餐, 去就近讚石山荷李活廣場的莆田.

哈, 我同型爸都未嚟過喎.

去到大約十二點, 可能仲係早, 人唔多呀!

 

有幾款套餐, 但我地無叫, 姪女話散叫點心, 可以食多的款式

呢個黃花魚燜飯, 睇落好正

有好多款食法, 不過姪女叫咗福建炒飯, 咁睇吓夠唔夠, 唔夠先加單再叫.

呢個餐牌主要叫點心麵食, 午餐就最啱嘞.

原來呢間係米芝蓮一星餐廳, 銅鑼灣, 屯門, 荃灣, 馬鞍山都有分店.

落咗單啦.

一坐落就送上來的餐前小吃

鍋邊糊 & 黃金磚

呢個鍋邊糊入面的粉, 腍到真係好似糊仔粥咁

什菌炒麵

海藻春卷

黃豆燉豬手拌麵

莆田三寶湯麵

莆田鹹煎棵

共金千絲酥, 鹹鹹地好好味, 呢個叫咗兩客

福建炒飯

甜品有芝麻擂沙湯丸

要提一提呢道的辣椒醬好好味.

最後佢地介紹咗今日新鮮到的莆田枇杷, 一份HK$28, 有8 個

今日食得好開心, 姪女爭著埋單, 佢話平時食得我地多, 今日要論客....哈哈, 多謝哂!

深圳寶利來酒店公司周年晚宴

Mar 24, 2017, Friday

自2013年開始, 公司每年都在國內攪周年晚會, 為的是希望國內及香港的同事都可以一齊參與. 安排香港的同事到國內比較容易處理, 只要安排兩部中港旅遊巴接送就可以.  再邀請埋寧波的同事坐飛機落嚟, 哈哈, 我個老闆都真係好好啦.

成百人的晚會, 又要攪抽獎, 又要玩遊戲, 好多預備功夫要做.   我地公司仔唔會請司儀啦, 每年都係自家同事做, 我就一定走唔甩.

好不過多年經驗, 而家聰明好多架啦, Party 未開始, 先叫的同事影吓部門合照, 老闆一到就影大合照.   老闆演講完後, 大家坐定定先食野先.  頭一兩年, 一開始就玩遊戲, 食都無得食呀!

菜單都係我挑選的, 普普通通, 唔係太貴.  我將的budget放哂落的大抽獎道呀!

阿拉斯加大蟹伊麵

乳豬全體

雞絲翅

雀巢海參

炸明蝦

海鮮卷

花枝片

蒸海班

國內食晚宴有個好處, 一次過不停咁上哂的餸, 大部份我地都可以食到.   不過一睇時間, 我地要即時開始, 其他單尾有咩野食我就唔知啦.

周年晚會, 最主要就係派利是, 抽獎亦都係抽利是, 現金最實際, 無需諗咩野禮物, 個個都咁開心.
遊戲都係現金.

抽咗三十幾個獎, 就算抽唔到獎, 一樣有安慰獎(利是), 哈哈, 幫公司派利是, 皆大歡喜.

深圳陽光餐廳

March 24, 2017, Friday

呢個星期真係好忙, 有新客到, 仲要抽時間上深圳處理公司周年晚會.    星期三已經上嚟一次, 今天又要一早上來為今晚嘅party作最後準備.

午飯時間, 國內同事帶咗我同秘書小姐去陽光餐廳食午飯.  星期三嚟過, 我覺得的黃花魚蒸我好味, 今日再嚟過.

哈哈, 同事見我上次食得咁好味, 今次大家唔叫午餐, 一齊叫小菜.   今晚大魚大肉, 下午食清的啦.

要了白焯西蘭花

生炒排骨(佢地叫甜酸排骨)

我要的蒜椒蒜黃花魚, 一份再兩條呀!

三個人三個小菜, 每人叫一碗飯就攪掂.

呢道的小菜好經濟, 最貴反而係杯飲品,  我同國內同事都都無叫飲品, 因為餐廳送了個無味精例湯, 都唔錯呀!