食得唔好嘥之炸雞皮, 豆蓉餅

May 18, 2020, Monday

今日要介紹吓今晚食咩餸...不過唔係我煮,  我要返工, 返到屋企, 見Cindy 咁有心機煮飯, 都真係要比個like佢.

首先要介紹一下呢一碟.....食得唔好嘥之炸雞皮....點樣食得唔好嘥呀?   呢排食嘅雞扒(例如整雞肉撻), 全部都會起皮.   以前起咗嘅皮, 全部順手掉咗佢.   但最近全部留番放冰箱.   儲到咁上下數量, 就會炸雞皮.   雞皮先用鹽及生粉搓洗, 瀝乾再用的蒜鹽醃好. 炸好次後再拌上炸蒜蓉及烤乾蔥, 香脆可口, 超好味呀!   不過有心理壓力, 始終係熱氣加唔健康....久唔久整嚟食吓啦.

哈哈, Cindy將炸雞皮出嚟嘅油都留起, 佢話用嚟炒菜呀!   雞油炒菜, 正呀!  

因為整咗炸雞皮, 平時整嘅反炸豆卜就改為釀豆卜.  再用佢緬甸式汁醬, 有少少辣, 但幾好味.

呢碟係什菌炒鴨胸, 入面有大蔥, 杏鮑茹, 金菇, 西芹...

仲有粉絲蝦米炒椰菜

四個餸

仲有一個湯...蓮藕鱆魚煲一字骨....

一煲呢個湯, 第二日又會出現食得唔好嘥菜式.

May 19, 2020, Tuesday

第二天.....

登登登登.....豆蓉煎餅

將煲完湯的什豆壓成蓉, 加雞蛋麵粉煎成薄餅, 中間仲加上芝士火腿....哈哈, 真係創意無限.

而蓮藕都係昨天煲完湯, 再二次入鍋加調味及鱆魚鬆再炒....

今晚勁呀, 兩款食得唔好嘥嘅餸, 讚!

白汁蘑菇雞肉撻

May 17, 2020, Sunday

今日行山去松記食完海鮮回到家都已經下午兩點....梳洗休息一陣, 又心思思想搵的野嚟整.

其實有的攰架, 不過嘆完兩小時冷氣...無事啦.

雞扒一塊切丁, 用牛油炒熟盛起

大的紅蔥頭三粒切碎, 蒜頭四粒切碎, 六粒蘑菇(我用了礶頭蘑菇)切碎, 炒香盛起

用牛油起鑊

加一湯匙麵粉炒勻, 加上湯, 我再加了cream

跟著加入雞肉及蘑菇蓉, 加蒜鹽, 蒜粉, 黑胡椒調味

煮好要稠的, 不能太多汁.   不

我同了急凍撻皮.   預熱焗爐180度10分鐘.   撻皮先入焗爐焗5分鐘, 再拿出來放入雞肉餡.   每個撻上面加了四份一塊芝士, 再入焗爐焗15分鐘.....咁就得啦.

個撻好好味, 二公子一口氣吃了三個.

整緊時好忙, 無影相, 下次會再整.

忙緊的咩.....

又整燒肉囉.

仲有韮菜花菜甫煎薄餅呀!

攪到自己咁忙, 自虐呀!

松記食海鮮

May 17, 2020, Sunday

自從限聚令放寬, 我同型爸又再出動同組員一齊去行.  今天是六人行.

每次行南涌鳳坑(我地叫行海邊), 都要去幫襯吓松記食海鮮.

行咗個幾鐘, 十一點幾就開始食.

呢道的蒸蜆係無得輸

呢道嘅煎蠔蛋無落薯粉, 真係煎蛋, 唔可以叫蚵仔煎

煙肉豆卜炒椰菜

呢道嘅蔥油鴨很好味, 比走地雞好吃

加辣了的豉油皇炒麵

還有蒸了一條超大條的黑鱲...超正呀!

六個人食了六碟, 真係撐到呢....

食到飽哂, 回程時又攰又眼瞓, 因為的血去哂個胃呀!

非常滿足.

涼拌茄子

May 16, 2020

今日除了整肥义, 仲整咗個涼拌菜

估吓呢三樣係咩....咦, 有雞絲呀?   唔係呀, 三樣都係素菜來的.

第一樣係茄子, 煮熟手撕, Cindy留了茄子皮, 最後都比我私了(撕了)

第二樣係杏鮑菇, 蒸熟手撕

第三樣係新鮮蟲草花, 蒸熟, 唔使撕都一條條

只要拌個醬汁就已經可以食....懶唔懶的呢....用日式麻醬唔使整....

最後都係唔懶, 用鎮江醋, 魚露, 糖, 麻油, 加少許辣油....好味呀!

整好食埋都唔記得影相, 最後剩番少少先記得.   撕咗的茄子皮, 好睇又好食的.

不過最近收到WhatsApp信息, 茄子唔好同菌類一齊食, 會中毒...

係咪架, 我地一家食咗都無事喎.  仲唔係第一次食.

資訊泛灠, 唔識分真偽呀!

焗肥义

May 16, 2020, Saturday

好耐無整义燒啦....原因係咩?  因為有時野買咗脢頭肉, 焗出嚟嘅义燒瘦肉的部份, 肉質有的嚡.  食食吓好似麻麻, 咁就少咗整.

不過嗰日响Facebook, 見到有人用腩肉嚟义燒...咦, 得咩?  得....點鮮唔得呀!

即刻去買嚿腩肉醃咗佢

 用咩野醃?  三湯匙义燒醬, 一湯匙海鮮醬, 一湯匙玫瑰露, 加一茶匙老抽.  下午醃, 晚証焗, 夠哂時間

220焗50分鐘...中間要翻轉一次

焗起掂呀!  切開薄片, 一的都唔乾

再加番焗完的醬汁上去.....好好味呀! 

型爸最終意食肥义燒, 二公子都話好食.   焗咗咁耐, 好多油都出咗嚟, 實質又唔係咁肥. 連我唔喜歡食肥肉都要食埋的肥...又真係幾正.

Air Fryer 蛋撻

May 16, 2020, Saturday

星期六又搵的野嚟整, 今日焗蛋撻

我唔想整得太多, 只係用了一隻蛋, 加兩份奶, 另外再加少少Cream, 另外用木糖醇20g

蛋漿過篩

我有急凍撻皮, 只要倒的蛋漿就得.今次試吓用AirFryer 炸蛋撻, 180度15分鐘

唔liker呀, 從未試過整蛋撻咁肉酸架

入面的蛋ok, 但的皮脆到好似餅乾.   型爸話都ok好食, 不過味道唔似蛋撻...係, 我加得奶多, 蓋過的蛋味.

唔憤氣, 即刻再整過, 今次用焗爐焗

都係用180度焗15分鐘

的蛋漿升起, 開爐門繼續焗多一陣

睇吓對比, 用焗爐焗靚好多呀!

當堂開心番!!!!

Pizza & Fish Finger

May 14, 2020, Thursday

有時我好勤力, 但有時都好懶.  星期六日唔使上班, 整咩都得, 但平時放工回到家都差不多七點, 唔想出街食, 咁就要整快餐啦. 

Cindy 放假, 只有我同型爸兩人, 好易攪掂, 半小時就得

Frozen Pizza 一個

仲有魚手指

呢個4 cheese pizza 睇落唔錯

我平時都好少買魚手指, 不特吃喜歡, 但型爸就鍾意食.

一爐兩樣一齊焗

呢個時候就預備飲品, 我用lime juice 整青檸梳打.   型爸就飲Apple Cider

pizza 要出爐, 因為只係翻熱, 15分鐘就得

魚手指焗耐少少, 因為入面的魚柳要由生焗至熟.

咁又攪掂一餐,  兩個人仲食唔哂呀!  要留起兩去pizza 明天食呀!