Macau 兩天遊 - 黃枝記 & 義順

2011年4月28日下午3:09公開累積瀏覽 164 0

April 22, 2011, Friday, Easter Holiday, Macau Trip

 

每次嚟澳門, 都盡量安排去六記食竹升麵, 米通鯪魚球, 錦滷雲吞, 鳳瓜, 蝦子撈麵.....但今次安排唔到時間呀! (好似要下午五點後先開門...有的掛著添).

家姊話好多年都無去過大三巴, 不如去影張相.  諗吓近年去澳門, 我地都從無去過大三巴, 咁去影張相都好吖.

我地响碼頭寄存的行理之後, 先返營地大街嗰邊, 諗著食完晏先去行大三巴.  午餐都係簡單的, 今次幫襯唔到六記, 就去幫襯黃枝記食竹升麵.

今日係假期, 好多人要等位, 不過呢間黃枝記有三層,  唔使等好耐就有位.

坐落飲杯茶先

將墊檯紙介紹黃枝記歷史

調味樽用個木盤仔裝著都比較企理

姊夫叫咗水餃麵, 的水餃响碗底睇唔到添

我同家姊都係叫咗雲吞麵, 送嚟嗰時的雲吞又係响碗底.  呢碗係我嘅, 我將的雲吞搬上嚟先影張相.   的麵硬硬地, 但我真係食唔出係唔係竹升麵, 淨係覺得的麵鹼水味好重.  的雲吞都ok嘅

型爸叫咗蝦子撈麵

另外叫咗碟牛筋腩.  覺得呢碟牛筋腩好味過梓記喎, 可能煮法唔同, 呢碟應該係用柱侯醬炆嘅, 惹味的, 的牛筋腩有的咬口, 唔會過腍.

再叫咗碟錦滷雲吞, 有五隻, 的雲吞炸得幾鬆脆, 但係的酸甜汁就絕對唔得.

再叫多一碟油菜.
一碗麵做午餐就唔係好夠嘅, 我地留肚, 預備一陣去義順食雙皮奶.
義順搬前咗一條街, 又變咗三層鋪(梗係好好生意嘞).  唔使等位, 上到二樓已經有位

嘩! 貴咗好多喎.  咦! 有新野喎(張價目表有張相寫著馳名紅豆雙皮奶), 可能呢款新咗好耐, 我地唔知啫.  咁就叫嚟試吓啦...

我地叫咗兩熱一凍, 點知我同家姊兩碗嚟到一的都唔熱, 我叫佢換過.   型爸好似叫咗薑汁奶, 我地換完佢都已經食完.

原來好熱嗰的係會漲起好高架.  不過對呢碗雙皮奶真係失望, 根本唔應該叫雙皮奶, 因為無咗面頭嗰片皮, 點可以叫雙皮奶, 不如就咁叫燉奶啦.  但味道亦唔見突出, 奶味唔香唔濃, 同好耐以前嗰的一的都唔同. 

咁嘅質素, 我諗都無興趣再嚟食...

Macau 兩天遊 - 大利來豬扒包 & 安德魯葡撻

2011年4月28日下午2:27公開累積瀏覽 648 0

April 22, 2011, Friday, Macau Trip, Easter Holiday

 

雖然Crown Towers Hotel 嗰張床比較軟, 但係可能行咗一日都幾攰, 昨晚都幾好瞓.  去旅行唔使咁緊張, 他他條條好的, 我地約咗9:30am先出去食早餐.
我地今早去路環大利來記食豬扒包早餐呀!

咁早去到, 已經頗多人, 户外的檯都差唔多坐滿...

呢個係鋪頭門口, 我地本來入去坐, 但覺得入面好焗,  天氣好, 都係坐户外仲清涼的.

佢地有個餐牌, 但我地睇都無睇就叫咗野食啦.

早餐係無豬扒豬仔包賣, 要下午先至有, 但我地下午唔會再嚟, 退而求其次食其他豬扒包啦.

姊夫叫咗菠蘿豬扒包

家姊同我都叫咗豬扒餐包

我咬咗一啖, 餐包同豬扒都好腍喎.  個餐包就過份軟咗(感覺濕的, 唔係出爐麵包), 但塊豬扒都幾好味.   上次(好似都成兩年前啦)下午嚟食個新鮮香脆嘅豬扒包真係好好味架.

型爸就叫咗豬扒公仔麵

姊夫同家姊都叫咗咖啡, 但我唔鍾意飲茶餐廳咖啡, 叫咗杯奶茶....有驚喜喎! 佢用杯裝咗大約2"奶, 再比一個不鏽鋼壺裝著的茶, 的奶茶好滑好飲喎, 好過响營地街市嗰的瓦煲奶茶.   即刻倒的茶比家姊, 等佢加的咖啡變鴛鴦, 因為佢話的咖啡太過苦澀.
食完就出去海邊行吓, 次次嚟都有影相.  跟著我地沿路行去譚公廟同天后廟, 但我地都無入去, 淨係經過啫.

經過見到呢間屋好攪鬼, 屋主用的攀籐植物圍著間屋, 我諗响入面住都會幾涼快.  不過唔知會唔會好多蚊滋呢?

行返出去就係安德魯葡撻, 頭先已經想買嚟食, 不過啱啱食完早餐.  而家梗係整番個先啦....

嘩! 貴咗好多呀! hk$8一個, 買6個hk$45(平三蚊), 型爸買咗6個啦.  我同家姊每人一個, 新鮮熱葡撻, 好味又鬆脆, 其他嗰四個葡撻就落咗姊夫同型爸嗰肚啦.
跟著仲買咗兩打攞返香港, 二公子都好鍾意食, 凍咗唔緊要, 到時入焗爐焗返, 一樣咁好味.
買完就坐的士去威尼斯人行吓, 家姊同姊夫都未去過,  等佢地影吓相.   我同型爸就行過一兩次, 上次同大公子&二公子一齊响呢道做咗張電腦水晶相, 而家放咗喺屋企, 覺得好有紀念價值. 
不過威尼斯人都無咩好行, 大部份都係名牌店或者香港品牌店, 香港的商埸都係咁啦, 點會响道買.  見到大部份都係"行人", 都無見到有人攞著shopping bag... 

行吓行吓, 見到間大利來記餐廳(仲未開門), 唔係阿麻, 响呢道食豬扒包咪無哂的風味囉!

再行吓行吓, 又見到好大個安德魯葡撻廣告, 唔係阿麻... 咁咩都無哂風味啦, 仲有鉅記同咀香園.... 澳門細細, 但處處都見到鉅記同咀香園, 唔知有幾多間呢! 

行完就返酒店check out.  為咗唔想攞著的行理走嚟走去, 又唔想將的行理keep著喺酒店(氹仔呢邊). 先去碼頭寄存的行理(以前有locker, 但而家已經全部拆哂), 收費hk$20一個行理箱(for 6 hours), HK$10輕便行理(又係for 6個鐘), 超過6個鐘就再計數.

跟著再去攞埋的船票, 咁一陣間走時就方便好多.

寄存完行理又出去搵食啦...

Macau 兩天遊 - 新寶粥麵水蟹粥宵夜

2011年4月27日下午3:14公開累積瀏覽 405 0

April 21, 2011, Thursday Night, Macau Trip

 

睇完水舞間都係九點幾, 要去宵夜都係尚早, 我同型爸講不如你同姊夫去用咗的泥碼啦.  每間房送hk$300, 兩間即係有hk$600.  但去到賭場門口, 先知道每hk$100泥碼雖要加hk$200先可以用, 只可以用嚟玩百家樂, 只可以買閒, 唔可以買庄(呢的我全部唔識, 佢講我聽).

 

我換咗的泥碼coupon就交比型爸, 當時都差唔多十點.  我同家姊連入賭場睇吓嘅興趣都無, 我地兩個上酒店房休息一下飲杯茶.  型爸同姊夫話十點半上房搵我地, 然後一齊出去宵夜.
哈哈! 點知我地煲緊水, 茶都未飲佢地就已經返上嚟.  型爸只係玩咗三鋪, 第一鋪已經無哂的泥碼, 第二鋪嬴番, 第三鋪再嬴, 咁就快的走啦... 嬴咗少少夠洗用就閃啦.

咁我地出去宵夜啦, 型爸本來想去一哥食水蟹粥, 但係我地由氹仔去都要20分鐘, 來回40分鐘, 加埋食野咪好花時間, 不如問吓酒店服務台, 氹仔呢邊有咩粥檔食水蟹粥好過啦. 

酒店服務台介紹咗呢間新寶粥麵, 佢地話有時收工都會去食.

亦都打定電話去問有無水蟹粥

去到見到都有好多人客, 大部份都係叫小菜
其實根本唔肚餓, 只不過係過吓口癮, 嚟到澳門同圍食.  (响香港根本唔會食宵夜)

即時叫一鍋水蟹粥, 睇餐牌hk$168.  型爸已經食咗兩碗我先記得影相

我自己嗰細碗仔仲未開始食.   對於我嚟講, 的粥真係唔得, 實在太好味, 好味到一食就知唔係水蟹嘅鮮味.  應該係加咗師傅煲嘅粥底, 然後斬的蟹加上去(的蟹超細隻).  真的非常一般,

叫咗豉油皇炒麵, 超細碟, 一般.  幸好我地全部都唔肚餓, 每人食少少.

再加碟蒜蓉炒菜心....嘩!呢碟比的油嚇親, 全碟睇落都係油, 我結果用咗好老土嘅方法, 用的水浸吓的菜先食.

型爸同姊夫就飲支啤酒解吓渴.

嚟嘅時候對呢間鋪頭一的期望都無, 所以亦都唔係太失望, 求其是但食的啦.   食完就返酒店休息啦! 

型爸好想食的好嘅水蟹粥架, 呢間就真係滿足唔到佢啦....

Macau 兩天遊 - 小飛象葡國餐廳

2011年4月27日下午12:19公開累積瀏覽 294 0

April 21, 2011, Thursday, Macau Trip

 

行到又熱又攰, Antonio又fully booked, 唯有去是但一間食葡國菜啦...

揀咗小飛象...

上到樓上, 原來地方好大, 即刻有位(就係想咁啫, 最緊要可以即時坐低歎冷氣), 我諗都應該係常常招呼旅行團.  

有套餐, 不過型爸話散叫好的.  鍾意食咩叫咩...

好肚餓, 嚟到個包仲係好熱, 牛油都有兩款, 覺得個包好味(肚餓食咩都咁好味).

燒沙甸魚, 唔知原來咁細條, 叫咗三條share嚟食

馬介休, 一的唔覺有鹹味, 似薯仔球多的, 可能咁仲啱口味的...喜歡食薯仔嘅就一定鍾意

咖哩蟹, 一的都唔覺得好味, 太多油啦

反而呢碟白烚椰菜非常好味又清甜.  成本幾蚊雞, 但係好味, 我返香港, 一定要試煮.

炆牛脷, 十分麻麻

牛仔骨, ok 嘅

葡汁海鮮焗飯就麻麻啦, 好似香港快餐店的焗飯仲好少少.

首先開咗支葡國紅酒, 不過覺得麻麻地

跟著再開多一支, 我都係覺得麻麻.

都係葡國酒

大家一齊飲少少酒, 高興的....

埋單hk$1,133, 同叫套餐差唔多
呢餐葡國餐嘅食物真係好一般, 不過可以同三家姊佢地一齊嚟澳門食葡國菜, 真係好開心又難得.  今次之後, 又唔知幾時會再嚟澳門,  所以食咩都要咁開心.

我地食完都係七點二, 仲有時間出去食番杯榴槤雪糕(未食飯前已經見到, 諗著食完飯就去食架啦).   買嗰時唔記得影返張相添.  不過一食又有的失望, 的榴槤味唔夠濃, 又無榴槤肉....嘻嘻, 好似好奄尖咁, 又咪成杯食哂...

Macau兩天遊 - 氹仔官也街搵食 - 葡國菜

2011年4月26日下午3:42公開累積瀏覽 887 0

April 21, 2011, Thrusday, Macau Trip

 

攞埋間房, 我地要出嚟搵食啦, 今晚水舞間20:00開show, 姨甥又訂咗20:00船飛返香港, 我地要食個早飯...  嚟到澳門, 梗係想食餐葡國菜啦.

嚟官也街, 的士司機比我地响對面馬路的士站落車, 一見到呢座建築物就好熟面口.

木偶葡國餐廳

綠色建築物旁邊嗰條就係官也街

呢道成條都可以講係手信街加小食巷

街口仲有個咁特別嘅郵筒, 影張相先

再行前的係小飛象葡國餐廳

行入內街, 就有公雞葡國餐廳.... 但係呢的都唔係我地想搵嗰間喎.....

再行, 咦, 街尾三個尖頂嗰間係野酒店, 原來係Galaxy

咦! 呢座建築物幾攪鬼喎!

佛笑樓都响呢道開咗一間喎

仲有呢間波爾圖葡國餐廳....唉吔...仲未搵到呀.....

新陶陶酒家, 食翅嘅喎, 但係今晚想食葡國餐呀!

過咗新陶陶酒家轉落去, 有條樓梯, 叫跛腳梯....  攪笑, 普通石樓梯, 無跛腳呀! (唔記得影埋條樓梯添)
跟著再問吓人, Antonio响邊道呀!  指咗我地嚟呢個方向.....

搵到啦....吓, 點解好似cafe 咁嘅..

睇吓! 真係咖啡室喎... 唔係阿麻, 我地搵葡國餐廳喎

再行多幾步, 卒之搵到啦..... 五點幾,  但未開門喎

响側面睇吓, 叫做買賣街

未開門就影吓門外咁多張牌

正宗葡國菜

唔知寫咩野...1248-1950

呢張都係唔知寫咩野

The Miele Guide 係咩野指標嚟架.

呢兩張就知啦, 米芝蓮recommended 2009 & 2010.

型爸响餐廳後面見到餐廳的人, 問佢地幾點鐘開門, 佢地話18:00, 我地見仲有10分鐘, 就企喺門口等吓啦.   等到18:00 再問吓開得門未, 嗰位唔知係葡藉定係菲藉嘅女士用英文話未ready好, 等多15分啦.  咁我地話好攰啦, 不如比我地入去坐著等得唔得, 佢話唔得架, 我未ready, 比你地入嚟老闆鬧架.  咁我話你慢慢啦, 幫我地reserve張檯, 我地去飲的野先, 15-20分鐘返嚟, 點知嗰位女士話, 咩你地無booking架, 我地今晚fully booked喎.   吓!唔係阿麻, 而家先講, 好彩都係等咗10分鐘啫.

今日又唔係假期(不過係假期前夕啫), 間餐廳好細, 得七八張檯, fully booked 都唔出奇.  不過心中有的奇怪, 咁細間餐廳, 就算日日fully booked都搵唔到好多錢, 有名唔知有無利呢...

無法啦, 我地要即刻搵過另一間餐廳, 唔係好多時間, 七點半前要食完呀!