每次嚟澳門, 都盡量安排去六記食竹升麵, 米通鯪魚球, 錦滷雲吞, 鳳瓜, 蝦子撈麵.....但今次安排唔到時間呀! (好似要下午五點後先開門...有的掛著添).
家姊話好多年都無去過大三巴, 不如去影張相. 諗吓近年去澳門, 我地都從無去過大三巴, 咁去影張相都好吖.
我地响碼頭寄存的行理之後, 先返營地大街嗰邊, 諗著食完晏先去行大三巴. 午餐都係簡單的, 今次幫襯唔到六記, 就去幫襯黃枝記食竹升麵.
今日係假期, 好多人要等位, 不過呢間黃枝記有三層, 唔使等好耐就有位.
坐落飲杯茶先
將墊檯紙介紹黃枝記歷史
調味樽用個木盤仔裝著都比較企理
姊夫叫咗水餃麵, 的水餃响碗底睇唔到添
我同家姊都係叫咗雲吞麵, 送嚟嗰時的雲吞又係响碗底. 呢碗係我嘅, 我將的雲吞搬上嚟先影張相. 的麵硬硬地, 但我真係食唔出係唔係竹升麵, 淨係覺得的麵鹼水味好重. 的雲吞都ok嘅
型爸叫咗蝦子撈麵
另外叫咗碟牛筋腩. 覺得呢碟牛筋腩好味過梓記喎, 可能煮法唔同, 呢碟應該係用柱侯醬炆嘅, 惹味的, 的牛筋腩有的咬口, 唔會過腍.
再叫咗碟錦滷雲吞, 有五隻, 的雲吞炸得幾鬆脆, 但係的酸甜汁就絕對唔得.
再叫多一碟油菜.
一碗麵做午餐就唔係好夠嘅, 我地留肚, 預備一陣去義順食雙皮奶.
義順搬前咗一條街, 又變咗三層鋪(梗係好好生意嘞). 唔使等位, 上到二樓已經有位
嘩! 貴咗好多喎. 咦! 有新野喎(張價目表有張相寫著馳名紅豆雙皮奶), 可能呢款新咗好耐, 我地唔知啫. 咁就叫嚟試吓啦...
我地叫咗兩熱一凍, 點知我同家姊兩碗嚟到一的都唔熱, 我叫佢換過. 型爸好似叫咗薑汁奶, 我地換完佢都已經食完.
原來好熱嗰的係會漲起好高架. 不過對呢碗雙皮奶真係失望, 根本唔應該叫雙皮奶, 因為無咗面頭嗰片皮, 點可以叫雙皮奶, 不如就咁叫燉奶啦. 但味道亦唔見突出, 奶味唔香唔濃, 同好耐以前嗰的一的都唔同.
咁嘅質素, 我諗都無興趣再嚟食...
沒有留言:
張貼留言