油炸鬼雞蛋焗魚腸

2011年4月7日下午4:19公開累積瀏覽 255 1

April 3, 2011 Sunday

 

飲完茶就去買餸, 今日remind自己一定要去買油炸鬼, 因為我要整油炸鬼雞蛋焗魚腸.   嘻嘻! 仲要試用吓新換返嚟嗰個蒸又得, 焗又得, 雪又得嘅新焗盤.

去咗相熟嘅魚檔, 今日好彩可以有脆鯇魚腸, 普通魚腸會比較腍身. 整魚腸非常麻煩, 工序甚多花功夫, 不過型爸鐘意食, 久唔久都會整吓.

不過時下好多人都唔鐘意食呢的咁唔健康嘅野, 睇落肉酸, 整又麻煩.  但對我地嚟講, 呢味餸係平靚正.

魚腸魚肝洗乾淨, 用滾水燙熟, 瀝乾水份, 用鹽, 胡椒粉(我用咗好多胡椒粉)撈勻.   今次用咗4隻雞蛋, 2隻雞蛋嘅水, 2隻雞蛋嘅上湯, 加少許鹽蔥花將蛋打勻.

將蛋漿加入魚腸, 再加油炸鬼, 用鑊大火蒸6-8分鐘

預熱焗爐180c

入焗爐焗8-10分鍾, 再改用200c將油炸鬼焗至少許深啡色.  (每個焗爐唔一樣, 真係要睇火)

今次好成功呀!  的油炸鬼夠脆, 魚腸夠乾身.  味道淡咗少少, 但食時灑上少許海鹽&胡椒粉, 啱啱好!   連平時唔鐘意食魚腸嘅二公子都嚟幫襯.

仲要讚吓個焗盤....好用!