出差寧波 - 20140408

April 8, 2014, Tuesday

今個星期, 又再出差寧波幾天.  今年都應該走唔甩, 一兩個月都要去一次.

每次都會搭呢班機,一日只得兩班, 如果搭下午嗰班,去到都收工, 浪費半天時間

雖然係十一點幾機, 但同平時一樣時間起床,  八點幾開車, 一的都無得偷懶.

每次都一樣, 响機場Premium lounge食免費早餐.   今阿姐咁重手, 比咁多腸粉我嘅. 

跟著整杯Yogurt加杯加啡, 午餐都唔使食.

今日算好彩, 準時boarding, 但都延遲了二十幾分鐘才起飛.   上兩次都遲成個鐘

飛機餐係海鮮意幌殼粉, 唔好味, 可以唔食啦.

落機先去酒店check, 再回寫字樓, 去到都差唔多三點.   今日好多野做, 但呢道的人都唔會加班, 做到六點就準時走.  只有我地呢的香港人同外藉同事留低繼續做.   七點先離開, 唔可以太野, 有的食肆八點幾就關門.

晚上約了外藉同事及另一位外藉朋友, 一行四人出外晚膳, 今次又去南塘老街.

註寧波的外藉同事帶我地嚟呢間東城名府

的裝修都幾華麗架

哈哈, 不過入咗去又即刻出留嚟, 唔係唔食, 突然醒起有一樣野要買, 買完再返嚟.

就係去呢間車塘油贊子, 八點半就關門, 我地急步行去, 仍然有很多人排隊

 

的工人仍很勞力在搓麵粉呢!

 

  
買了鹹甜每款兩袋.   送了兩袋給外藉同事

 

跟著回去東城名府食晚飯

呢道都係食寧波菜, 我地去到他們已關燈, 但我們出來點菜, 他們的廚師馬上出來開燈及介紹各款菜式.  服務態度很好呢.

見菜點菜, 真係唔錯, 咁樣唔會叫錯野.

我要了幾款冷盤, 醬帶魚, 蔬菜卷

蘿蔔乾, 海蜇青瓜

熱菜要了醬爆新鮮墨魚, 鹽水什螺

外藉同事喜愛的鐵板黑椒牛仔骨

另一位同事要了黑米梗, 係甜品嚟架, 原來好好味.

我唔知另一位同事要了甜品, 我又要了另一款.  嚟寧波咁多次, 都未試過食寧波湯丸, 今次要了脆皮湯丸.    一食落去.....嘩嘩嘩, 非常好味呀!
 

外面少少脆, 內裡鬆軟, 入面仲係流心餡, 實在太好味啦.  

我地食野唔多, 但係三位男士飲得多, 他們共要了七瓶啤酒.

我們叫的食物都唔貴, 減了七十元啤酒, 食物只是三佰六十元.  算是十分抵食呢!

食完要回酒店休息, 明天還有一天忙呢!

花開花謝

April 7, 2014, Monday Night

我office棵鐵樹開了花三星期了, update吓的情況先.

 

三月十七日長出了花冧, 踏入第二至三個星期, 的花就越開越靚

的花通常下午開, 整個房間都香到不我了, 最特別係, 的花開完又合埋, 第二天再開

看, 的花又再開大的

比個close up.  好靚呀!

未完全開時, 的花冧係咁架.  莖上分泌很黏的汁液

開完花後, 第二天合起來, 到下午又會再開

呢的係完全盛開.   一開花時, 整個房間都十分香.  花開的香氣斷斷續續, 維持了個多星期.

的花好香, 不過對我嚟講就有的問題, 唔知係咪對花粉敏感, 的花一開好香的時候, 我的面, 頸, 手背都非常之痕, 仲起了粒粒.   走去睇醫生, 醫生話如果知道致敏源就要遠離佢, 但我無理由棵樹開花我要搬走佢架.  一係我唔返工啦, 但又唔得, 唯有忍吓啦.   有的敏感, 唔係好大件事, 見到的花盛開都好開心.

踏入第四個星期, 今早一返嚟, 見到的花差唔多謝啦, 有好多乾枯咗啦.

到下午仲有的花繼續開, 依然很香.   但我今日無咁痕啦, 因為睇醫生食咗抗過敏藥.

我明天要出差寧波, 離開致敏源一定唔會痕啦.  返到嚟的花應該會謝哂啦. 

計吓計吓, 真係開足一個月呀!

唔知幾時再會開花呢?

Wing's Kitchen

April 7, 2014, Monday afternoon

呢排都係繼續搵緊我地午市飯堂.

今日阿麻煩同事呢道又話唔想去, 嗰道又話唔想去, 跟著又話想食西餐, 一陣又話自己唔舒服.   唉, 自從Sticky Finger午市摺咗, 呢道附近好似無咩好味西餐.


阿麻煩同事突然醒起有間 Wing's Kitchen, 上次我地去過.   仲好深刻添, 因為上次食完之後,我腸胃炎咗兩個星期.   不過我腸胃炎都未必關呢間餐廳事, 再去食都無問題喎.

坐落見到隔離幾位外藉人仕要了漢堡包, 好似好正咁喎!

今次唔敢食沙律, 改飲熱湯隱陣的.


飯桶同事要西冷牛扒漢堡, 睇落得喎!

我要了今日精選雞扒漢堡, 味道都唔錯, 不過剛啱飲完湯食包, 而家又包呀!

阿麻煩同事要了意粉, 但又話的汁too creamy, 攪到佢好滯喎.

突然醒起上次嚟有張咭, 有三個印, 睇吓日子, 原來係二月份嚟過.   今次我地又多三個印啦.

牛扒漢堡HK$49, 意粉HK$49, 我同麻煩同事要了餐湯, 每人HK$15.   埋單HK$167, 唔使加一.  價錢唔貴呀.

如果今次食完返去無事, 咁遲的多的嚟, 將呢間加入成午市飯堂之一啦.

粉嶺燕雲莊

April 6, 2014, Sunday Night

昨晚煮咗一餐, 今晚唔使煮, 型爸又約林老闆一齊出去食.  不過出去食到都唔知食咩好, 林老闆又提議去粉嶺燕雲莊.

不過林家小姐高考, 出嚟時又落雨, 林太唔想帶林小B走嚟走去, 結果我地一家三人加林老闆, 四個出嚟食, 跟著pack的野返去比林太林小姐啦.

燕雲莊嚟過幾次, 每次都係同林老闆一齊嚟, 上次嚟應該都有四五個月前

食上海菜林老闆都鍾意嚟呢道, 我地覺得呢間的野普普通通啦, 又搵唔到邊間上海菜比較好.

我地早到, 由型爸叫菜

川味水煮牛肉, 呢碟太麻太辣, 食到嗆喉龍.  牛肉只有上面嗰的, 下面全部都係芽菜.   咁梗係啦, 的牛肉咁貴, 唔通成煲都係咩.  不過太辣, 大家都食得有的辛苦.  出汗兼要飲豆漿.

煎鍋貼, 真係唔得, 呢的唔係鍋貼, 只係煎餃.  只係煎個底, 個面都唔熱.  次次嚟都係咁反個面上碟.

又係二公子要的椒鹽鮮魷

奄篤鮮, 味道一般, 的湯只有少許鹹味.

一坐落就叫了小籠包, 但其他野到哂的小籠包先到嚟.

最後叫咗個排骨菜飯, 唔記得影呀.

最後叫了一盒雞菜飯加豬扒, 三絲炒年糕返去比林太林小姐.

埋單五佰八十幾.   咁又攪掂一餐.