格仔牛扒+三文魚骨腐皮秋葵湯

October 10, 2014, Friday

本來今晚唔使煮, Friday night,  型爸話出去食飯輕鬆吓.  但Cindy放假, 我又唔想出去食.

咁二人晚餐都好易啫, 今昭水嚟個fusion,  煎牛扒加個中式湯.
 

牛扒又唔使醃, 解凍煎成格仔牛扒, 焗爐焗蔬菜薯餅

再煮個三文魚骨腩腐皮秋葵湯, 煲一湯碗夠兩人飲啦.

 

一塊西冷加一塊肉眼

 

 

個湯仲落咗的上次食剩嘅龍躉翅

同型爸每半塊西冷半塊肉眼.   的牛扒煎得略生, 型爸就話啱啱好.

我煮到一半Cindy返到嚟, 但我嘅晚餐無預佢呀, 無理由佢放假我仲要煮比佢食.

我要佢自己煮比自己食.  佢唔會虧待自己.  炒咗一大碟火腿炒蛋, 再加埋的辣炒椰菜 (嘩, 真係好大碟) 我問佢點食得哂, 佢話留番一半明天食.

在我屋企, 食多的唔緊要, 最緊要做好屋企的野就得啦.

京蔥炒牛肉

October 9, 2014, Thursday night

放咗工返到屋企, 繼續都係要煮煮煮

 
平時好少買京蔥, 買咗一札三大枝, 平時好少煮, 只係用咗一枝份量, 切起好似好多.

牛肉切薄片醃好先走油(唔好炒到咁熟), 盛起備用

唔想咁單調, 用紫洋慕做配料

先爆香京蔥同紫洋蔥, 一爆起就知唔夠京蔥, 應該一次過用哂三大枝.  跟著將的牛肉回鑊, 跟著埋個茨就得啦.

好快攪掂.

但我要Cindy整嘅兩個餸, 粟米魚餅變成咁.

佢菜心炒小棠菜, 的菜心就諗咗, 但的小棠菜仲係好硬.

螺頭雪耳瘦肉湯

哈哈, 今餐當然係的京蔥炒牛肉比較好味啦.

食完飯有的唔likes呀, 卒之都知道Cindy點解的餸煮成咁, 原來佢話明天要放飯...吓, 咁突然.  之前唔係講好佢想要錢, 唔想放咁多假.  佢個個星期放一日假絕對無問題, 但預早講定, 唔好突然話明天要放就放.

我今次同佢講明, 只此一次(如果明天唔比佢放, 佢一定唔開心) , 每個月嘅假期, 要在日曆畫好, 咁我就會有預算.

本來型爸話明天同我出去食晚飯...現在又要諗吓先.

亞宝麻辣誘惑

October 9, 2014, Thursday

平時出去食晏, 日日都差唔多經過Hilton Tower, 發覺地庫多咗間食肆, 仲係食麻辣, 非常有興趣.  都唔等埋麻煩鬼同事, 同慢麼麼兩個人先去試吓.

呢間叫做亞宝麻辣誘惑 (個全名實在太長)

 
午市客飯套餐, 都幾抵食喎, 四十幾至五十幾文, 有湯, 有餸, 有飯, 有飲品

 
仲有麻辣湯麵, 米線, 薯粉, 金邊粉選擇.   麻煩鬼唔喺道, 我下次先同佢食湯麵

 
叫咗兩份套餐, 每人一款午市套餐

我要了重慶口水雞

 

慢麼麼要了煎蓮藕肉餅

  
睇落都唔錯, 而食落都幾好味.

 
每人仲有一杯熱飲

埋單HK$96, 去櫃面埋單, 唔使比貼士, 每人都只係HK$48.

下次再嚟食麵.

大閘蟹肉炒蛋

October 8, 2014, Wednesday

的大閘蟹食哂, 但係有後遺物.  通常食得幾隻蟹, 食食吓的人就唔食的蟹拑. 一隻蟹都唔平, 咁梗係唔好浪費掉咗佢, 留起用嚟拆蟹肉.


我同型爸昨天食食吓都唔食的蟹拑, 即時就拆肉留起.

加埋前天嘅蟹拑, 共有兩碗蟹肉.  以炒4隻蛋為例, 一碗蟹肉就夠啦.

都無需咩野技巧, 只係打蛋之後加鹽打勻加蟹肉, 喜歡就加的蔥粒.  想的蛋滑的就加的鮮奶

將的蛋倒落平底鑊

煎到咁下下推開的蛋就得, 唔係煎蛋餅, 無需煎到咁整齊

攪掂啦.

今晚二公子响屋企食晚飯, 即刻有餸加

拖羅刺身

  
赤貝及另一款魚刺身

焗香辣雞翼

炒椰菜

冬瓜瑤柱肉片湯

攪攪下咁多樣, 都好豐富架.

大閘蟹+豬扒菜飯

October 7, 2014, Tuesday

呢幾日都咁豐富, 但仲未完呀!  

星期日食咗三十幾隻大閘蟹, 仲有十八隻呀!  今早返工前, 做了人肉速遞, 送了十二隻大閘蟹比奶奶, 等佢地都試吓啦.  而我留起六隻, 今晚同型爸撐檯腳.   咁我地食蟹, Cindy都有份食啦.

為咗配合食蟹, 我今晚煮菜飯, 煎豬扒, 簡簡單啦.

放工返到屋企, 一樣都係要摩打手.... 先放蟹入蒸爐, 跟著就開始煮菜飯.

 
白菜洗淨切碎

 
先落鑊炒至略為軟身

 
用雞湯煮飯

  
煮到的米半熟就加入炒菜拌勻

  
跟著煮多大約5分鐘, 熄火焗20分鐘

 
用多士焗爐焗的雞泡魚干做小食.

  
用蒸爐蒸25分鐘, 貶吓眼咁快就得啦(我都未停過手

 
睇吓的膏幾正.   講真星期日大閘蟹宴客, 我一的都唔enjoy, 做主人家兼大廚, 騰來騰去鬼咁忙, 邊處會食得無滋味吖.   今日就唔同啦, 同型爸兩個慢慢食, 好滋味呀... 哈哈, 嗰個Cindy仲開心, 食到係咁笑話好好味....佢响緬甸邊有食過吖.

我仲影相whatsapp比姑奶同嬸母, 佢地食緊我今朝送去嘅大閘蟹呀!   哈哈, 分甘同味, 大家開心.

 
食完蟹先蒜豬扒, 的菜飯梗係得啦.

 
食完蟹唔肚餓, 但見到都開心呀!

我食一小碗得啦.

嗰個Cindy又係食到笑哂口, 我屋企咁好食用, 去邊道搵呀!

南亭焼き鳥

October 6, 2014, Monday

前晚打邊爐, 昨晚食大閘蟹, 今晚就食日本串燒.  哈哈, 日日咁食, 點攪!

平時好少過港島, 今日去呢間日本餐廳卻响中環士丹頓. 呢排佔中攪到中西區的交通亂哂籠, 我我地就唔開車, 架車泊留尖東, 坐地鐵再經行人電梯上去.   

約咗的鄰居一行八人去食日本串燒, 本來有十個人, 但其中一位太太, 昨天飲了兩款酒後胃部不適, 今日暫停唔敢再飲, 咁就少咗兩位.

呢間南亭係鄰局的朋友開嘅, 估唔到今日係星期一, 都好好生意呀. 

呢枝係私家酒, 朋友的兒子自己帶嚟一齊飲.  不過我今天只可以飲好少好少,  因為型爸飲酒, 咁我就要開車啦.

咁一的都唔飲就好無趣, 我飲梅酒呀!  一杯仔極少, 仲有呢道的梅酒有一粒大冰, 的冰入面有梅肉架.   哈哈, 呢個concept我要學吓先, 屋企浸咗咁多梅酒, 要整的梅肉冰先得啦.

每一位都有呢的新鮮蔬果, 配串燒就啱哂, 食完又要佢地refill, 使唔使比錢就唔知, 因為無問呀!

先來雞泡魚干送酒 (其實嚟呢道食串燒, 樣樣都啱送酒架啦)

串燒牛舌, 仲有串燒雞翼....幾好味, 但份量多咗的. 每人每款一串, 咁咪好快飽....

呢串燒豆腐好味呀!

飲完梅酒就飲呢款柚子酒....7.8%, 度數低, 似果汁多的.

燒銀杏, 煙肉車厘茄

燒廣島蠔

燒辣椒蒜頭

雞軟骨

燒粟米

大鱔

燒飯圑

燒芝士年糕

雞掌心

腩肉荔枝, 呢款好特別.  太甜, 因為的荔枝好甜呀!

食完有雪米茲做甜品.  又飲又食就梗係開心啦. 

食完跟鄰居去信德中心攞車(佢平時泊中環, 但封咗路要改泊上環)車我地返尖沙咀, 咁我攞車就方便好多.

哈哈, 我好安全, 雖然飲咗少少果汁酒, 但開車時係一的酒意都無架!