每年都會食黃油蟹, 通常都會去鴻星, 但黃油蟹季好短, 一路都無留意, 直到最近話就嚟有大閘蟹食, 先醒起黃油蟹季完就到大閘蟹, 嘩, 咁咪差唔多季尾, 都係快的試吓先.
東海有兩款套餐, 4位餐就唔啱我地, 我地叫咗每位HK$438嘅餐.
有一支180ml清酒送, 咁就同朋友飲番杯啦.
首先嚟到嘅係醬燒黑豚肉, 味道ok
蝦粉小籠包, 嚟到要即刻食, 凍咗就唔好食, 味道ok
呢個係冷盤粉皮白雲蝦, 因為要先食的熱盤, 呢碟等到最後先食, 味道我就覺得麻麻.
主角黃油蟹出場啦, 睇落邊有六七兩呀, 至多咪五兩. 睇落去的糕都好滿, 但唔知點解, 無爆油嘅, 有的失望喎! 唔知係咪我地食得慢, 的蟹已經唔係好夠熱, 咬落去都唔覺好香嘅.
雞湯大排翅, 麻麻地
黃蘑菇柚皮扣鵝掌, 黃蘑菇同柚皮都非常之淡...
白玉翡翠, 呢碟反而幾好味.
都唔知點叫台式煎餃子, 似日式餃子多的, 呢味又係唔可以攤凍, 要快的食, 如果唔係的皮變硬, 我地食嗰時, 上面的皮已經有少少硬. 味道一般.
我對呢個椰皇燉奶好大期望
但食落去味道比較淡, 無椰子味, 的燉奶唔夠滑. 不過我都食哂佢, 我favorite甜品嚟加麻(可能係咁, 所以要求高的).
呢個餐, 抵食就好抵食啦, 亦都好夠食, 但冒著咁大嘅生命危險嚟食黃油蟹呢的咁高危食物, 唔香唔爆油, 真係若有所失....
沒有留言:
張貼留言