2011年5月13日 星期五

豉油雞


2011年5月13日下午3:28公開累積瀏覽 219 0


 
好耐都無整過豉油雞, 一早買定隻雞, 前一晚用鹽略醃, 預備今日佛誕假期整豉油雞.
下午同奶奶食完齋, 送咗佢地返屋企, 回家途中同型爸傾謁, 諗諗吓.....咦! 今日係我地搬嚟"山卡罅"三周年紀念喎!   型爸話不如我地又去食飯按摩啦....吓! 又出去食.... 呢排成日出去食, 又預備咗咁多餸, 唔好出去食啦, 不過按摩都可以嘅(kakakaka 超鐘意按摩)...
返到屋企, 拿拿林教Ruby整咗隻豉油雞, 再煲落湯就可以出去嘞.
呢隻雞之前一晚已經略醃
攞隻雞出嚟用二湯匙紹酒先擦勻雞身.  再用生抽半杯, 老抽半杯, 冰糖兩粒, 水一杯, 要嚟整豉油汁
用易潔煲加少許油將蒜頭, 薑爆香, 放雞落去將幾面略煎, 將雞盛起.   用易潔煲係因為豉油好易燶, 用易潔煲容易的處理
再將的豉油汁倒落煲煮滾.....
煮到呢道型爸就催我走啦, 我地要出去, 下半部就要Ruby整嘞......
我吩咐Ruby將隻雞放落去每邊煮十分鐘, 煮時要將的汁一路淋上面等隻雞可以一面煮一面上色, 最後煮滾再將隻雞焗20分鐘....
到我返到屋企, 見到隻雞已經係咁....有的失望...咁醜樣嘅... 不過我肯定佢係熟哂.
我見到的汁....點解仲多過我調的汁嘅...試味..略淡.  都唔使問Ruby, 佢應該係再加多咗水落去煮啦.... 費事問啦, 已經煮好.  唯有用大火收汁, 用嚟淋上雞面.  的汁煲濃咗, 當然好味的.
攪掂啦, 醜樣咗的, 隻雞過熟好腍, 味道只係普通, 唔夠惹味.  不過呢的唔關Ruby事嘅, 鬼叫我走咗去咩.   但係醮的豉油汁食, 都ok好味嘅.
唯有下次再整過啦.

沒有留言:

張貼留言