2011年5月14日 星期六

薑蔥廣島蠔


2011年5月14日下午3:08公開累積瀏覽 545 1


 
之前去Sogo買野, 除咗買咗支貴賓大吟樣之外, 另外仲買咗一包冷凍嘅廣島蠔...

就係呢包啦, hk$126....大約有36隻1kg

我今次試用呢隻蠔嚟煮薑蔥生蠔..

材料: 廣島蠔12隻, 蔥適量, 薑6-8片(鍾意食薑蔥可以落多的), 蒜頭幾粒切碎

調味: 豉油, 糖, 鹽, 豆粉+水 用嚟埋茨

做法: 將廣島蠔解凍洗淨瀝乾水份.  煮滾一小鍋水, 將生蠔倒入拌勻, 熄火. 再將生蠔倒出澀乾水份. (因水大滾, 生蠔放入, 已經有幾成焯熟.  但切勿將蠔煮熟, 因為還要回鑊再煮.)   落油, 蒜頭起鑊, 加薑加蔥爆香, 跟著落蠔炒幾炒, 落調味埋茨略煮就ok啦.   
煮呢個餸要快手, 蠔唔可煮得耐, 煮得太耐會縮水變韌唔好食.
實在太忙, 煮嘅時候更加唔得閒影相....
煮好啦.
型爸話好味呀!    Ruby見到已經同我講, 太太唔使比呢的我, 我唔食架.  真奇怪, 的印尼人唔鐘意食海產背殼類, 以前Mina都係咁.  你唔食, 我無所謂, 我地每人食多隻囉.   我慳家煮咗12隻(呢碟餸都要四十幾蚊呀), 3個人每人4隻, 其實都幾理想, 不過型爸鍾意食蠔, 好似唔係好夠咁.
遲的大公子返嚟, 我諗剩返嗰三份二包要一次過煮哂先夠食(吓! 咁呢碟餸咪要八十幾蚊).
而家煮餐飯, 越嚟越貴啦!

沒有留言:

張貼留言