我見到呢張菜單, 覺得太多野啦, 提議唔要個意大利粉, 但係二公子話唔得, 一定要, 應該啱啱好. 咁佢三仔爺話事啦, 我一定食唔哂要靠佢地啦.
去到大埔東昌街, 地鋪6-16號, 尊賣入口凍肉(牛扒羊扒), 急凍海鮮(麵包蟹, 生蝦...) 魚生, 生蠔... 仲有入口醬料香料, 各類芝士, 魚子醬.
而佢地嘅私房菜就喺一樓, 上面大約有三四百尺, 一張好大嘅檯. 最多可招呼16 個人客. 我地四個人就非常寬敞啦.
無豪華裝修, 牆上掛了畫, 簡潔乾淨
餐檯另一邊係open kitchen, 我地可以睇蓍廚師即時煮比我地食....好多調味料....
見到呢兩隻蛋咁得意, 好似真蛋一樣, 但係用嚟放胡椒粉同鹽架.
七點我地開始食啦.
每人先嚟兩隻生蠔, Irish Rock & White Pearl, White Pearl唔錯喎, 夠味又夠creamy
法國鵝肝配多士, 都好大件喎, 件多士好厚. 我地問廚師, 件多士薄的唔係好的咩, 佢話咁樣先好睇的喎.
黑松露磨菇湯, 好香呀! 味道好濃, 我覺得鹹咗的, 但佢三仔爺話ok喎....仲添飲少少...我就夠啦, 飲咗半碗, 咁多樣我一定食唔哂
鮮帶子沙律, 個醬汁調得好好, 的味道令到的菜好清新
廚師炒呢碟意粉時, 因為係open kitchen 嘅關係, 非常之香. 炒咗一大碟, 呢碟係四人份量, 我都係食兩啖, 因為開始飽啦...仲有和牛未嚟呀!
M7和牛嚟啦, 嘩, 好大件呀....
煎得啱啱好, 睇落去好生, 但係無血水, 咬落去好腍, 好味, 只嫌少了點牛肉味. 我食唔哂, 食咗一半, 要大公子幫我攪掂佢.
甜品係New York Cheese Cake, 做咗一個 6" 比我地做甜品, 加支蠟燭做生日蛋糕啦. 不過唱完生日歌都無切啦, 真係食唔落, 我地個個都頂唔著啦, 打包返屋企, 明天先食啦.
我地耍揸車無飲酒呀! 如果自己要帶酒嚟, 開瓶費HK$80一支.
埋單無需加一, HK$580一位, 共HK$2,320
我地明晚仲有一餐, 响呢道訂咗的生蠔, 法國麵包蟹, 明晚放工嚟攞.
呢餐我地覺得唔貴, 因為有咁多道菜, 再加上每道菜都係份量十足, 仲係澳洲靚M7和牛. 如果去高級餐廳, 一定唔係呢個價錢.
响呢道食有的家嘅感覺, 可以睇吓電視, 每道菜都係慢慢上, 食完比的時間我地消化吓, 唔係急急忙忙上哂的菜.
對於的食物質素, 我地都覺得滿意. 有機會會再嚟食.
沒有留言:
張貼留言